دۇيسەنبى كۇنى ءۇندىستاننىڭ تريۆاندرۋم (كەرالا شتاتىنىڭ استاناسى) قالاسىندا وتكەن حالىقارالىق كينوفەستيۆالدىڭ اياسىندا كينوتەاترعا كەلگەن 12 ادام سوتتالدى. ولار مەملەكەتتىك ءانۇران وينالعاندا ورىندارىنان تۇرماعانى ءۇشىن ايىپتالادى.

كەشىرەك ولاردى بوساتقان. الايدا، 12 ادامعا «لاۋازىمدى تۇلعانىڭ بۇيرىعىن ورىنداماي، باسقا ادامدارعا ىڭعايسىزدىق تۋدىرىپ، اشۋ-ىزاسىن كەلتىرگەن» دەگەن ايىپ تاعىلۋى مۇمكىن.

ال جەكسەنبى كۇنى چەنناي قالاسىنىڭ كينوتەاترىندا ءانۇران وينالعاندا ورنىنان تۇرماعان ادامداردى سوققىعا جىققان. كەيىنىرەك ولارعا گيمندى سىيلامادى دەگەن ايىپ تاعىلدى. ولاردى ەكىنشى كۇنى تۇتقىنعا الدى.

وتكەن ايدا جوعارى سوت كينوتەاتردا كورسەتىلەتىن ءار ءفيلمنىڭ الدىندا مەملەكەتتىك گيمن ويناۋى كەرەك جانە بارلىعى ونى تۇرىپ تىڭداۋى قاجەت دەگەن قاۋلى شىعاردى.

تۇتقىندالعانداردىڭ ءبىرى Indian Express گازەتىنىڭ تىلشىسىنە، تۇرعان جاعدايدا، ورنىمىزدى جوعالتىپ الامىز دەپ قورىقتىق دەپ تۇسىندىرگەن.  

سوڭعى كەزدەرى ءۇندىستاندا مەملەكەتتىك گيمندى سىيلاماعانى ءۇشىن زاڭ تۇرعىسىنان قۋدالانعانداردىڭ سانى ارتىپ كەلەدى.

قازان ايىندا جۇرە المايتىن ادامدى مۇگەدەكتەر ارباسىنان ورىندىققا وتىرعىزعان. گيمن باستالعاندا تۇرا الماعانى ءۇشىن كورەرمەندەر وعان اۋىر سوزدەر ايتقان ەكەن.  

سوڭعى 3 جىلدا ءانۇران وينالعاندا تۇرعىسى كەلمەگەندەردى كينوتەاتردان شىعارىپ جىبەرىپ وتىرعان. ءتىپتى، بۇل ارەكەتتەرىن بۇلىككە شاقىرۋعا باعالاعان.

1971 جىلى قابىلداعان زاڭعا سايكەس، ءانۇراننىڭ وينالۋىنا نەمەسە ونى ورىنداپ تۇرعاندارعا  كەدەرگى كەلتىرگەن ادام 3 جىلعا باس بوستاندىعىنان ايىرىلادى نەمەسە ايىپپۇل سالىنادى.

جاڭا زاڭعا سايكەس كينوتەاترلاردا ۇلتتىق ءانۇران وينالعاندا ەكراندا ءۇندىستاننىڭ تۋى كورسەتىلۋى كەرەك. ال كينو تاماشالاۋعا كەلگەندەر ءانۇران اياقتالعانشا  اياعىنان تىك تۇرۋ قاجەت. ەشكىم كەدەرگى كەلتىرمەۋى ءۇشىن ءانۇران ايتىلعاندا كينوتەاتردىڭ ەسىكتەرى جابىلادى. كەيىنىرەك مۇمكىندىگى شەكتەۋلى ادامدارعا تۇرۋ مىندەتتى ەمەس دەگەن زاڭعا وزگەرتۋلەر ەنگىزىلگەن.

سىنشىلار، جوعارى سوتتىڭ شەشىمىن زاڭگەرلىك ۋاكىلەتتىلىكتى اسىرا پايدالانۋمەن ءسوز بوستاندىعىن جانشۋ دەگەن باعا بەرگەن.

الەم بويىنشا مەملەكەتتىك ءانۇراندى پاتريوتيزممەن ۇشتاستىرادى.