مەملەكەتتەر - ءارتۇرلى ايدىندار مەن سۋلاردا ءجۇزىپ بارا جاتقان كەمە، قايىقتارعا ۇقسايدى. ءبىرى، مۇxيت تولقىندارىن قاق جارعان الىپ كەمە سەكىلدى. كەۋدەسىن كەرە شالقىپ، كەڭ دۇنيەگە دابىسىن جەتكىزىپ، دەگەنىن وتكىزىپ وتىرادى. جولىنا كەسە-كولدەنەڭ تۇرۋعا بولمايدى، قاقىراتىپ وتە شىعادى. بارلىق جۇيەسى اۆتوماتتاندىرىلعان، قاي ماۋسىمدا، قايدا كەتىپ بارا جاتقانىڭدى بايقامايسىڭ دا. ىشكى جاعدايدىڭ جايلىلىعىنان ساپاردا ەكەنىڭدى ۇمىتىپ، ءوزىڭدى ءقاۋىپسىز مەكەن، مۇلگىگەن تىنىشتىقتا جۇرگەندەي سەزىنەسىڭ. كەمەنىڭ الىپتىعى مەن جۇيەنىڭ بەرىكتىگى سونداي، كەمە كاپيتانىنىڭ بار-جوعىن، بىلىكتى-بىلىكسىزىن، اۋىسقان-اۋىسپاعانىن دا بايقامايسىڭ. تىپتەن، ءتۇبى تەسىلىپ سۋ كىرىپ جاتسا دا، تاۋداي مۇزعا سوعىلۋدىڭ الدىندا تۇرسا دا، قاتەر تۇمسىعىڭنىڭ تۇبىنە ءتونىپ كەلمەي ەشتەڭە سەزبەيسىڭ. جانىڭ سۇيسىنگەن كومفورت پەن جۇرەگىڭدى باۋراعان سيقىرلى اتموسفەرانىڭ اۋانىندا تەربەلىپ كەتە بەرەسىڭ...

ەندى بىرەۋلەرى- وزەن ورلەگەن شاعىن كەمەلەر ىسپەتتەس. جولى بەلگىلى، باعىتى ايقىن. جىلدامدىعى قالىپتى، ءوزى كۇشەنبەسە دە، وزەن اعىسى جولدا قالدىرمايدى. ءجۇرىسى جۇيەلەنگەن، توتەننەن تونگەن ءقاۋىپ جوق، العان ادامى، ارقالاعان جۇگى قاۋىسىزدىكتە. دالا مەن دالا، قالا مەن قالانىڭ اراسىن ەركىن شارلاپ، تاۋارىن وتكىزىپ، ادامىن جەتكىزىپ، ساپارى- ساپالى ومىرگە اينالادى. جولاۋشىلارى جايلىلىقتان داندايسىپ، كەنەتتەن اپاتقا ۇشىراپ قالماسا، ونداي كەمەنىڭ جەلكەنى جىرتىلىپ، ارقانى ۇزىلە قويمايدى. تەمىرى توزىپ، ەدەنى تەسىلە بەرمەيدى...

ەندى ءبىرى- تاۋ وزەنىنەن تومەن قۇلديلاعان جەڭىل قايىق سەكىلدى. اعىستىڭ قاتتىلىعى سونشالىق، قايدا، قاشان باراتىنىڭدى ءوزىڭ شەشە دە، جوسپارلاي دا المايسىڭ. تايانىش تاياعىڭدى تاس قىپ ۇستاپ، تاعدىرىڭدى ءبىر قۇدايعا تاپسىراسىڭ. ءوز باعىتىڭدى ءوزىڭ تاڭداماق تۇگىلى، تاسقا سوعىلماي، اۋدارىلىپ ءتۇسىپ، اپات بولماي امان ساقتالساڭ، سوعان دا قاتتى ريزا بولاسىڭ. ونداي ەسكەكتى قولعا ۇستاعان جاننىڭ قارىمى قاتتى، جۇرەگى تاۋەكەلشىل، اقىلى الىستى بايقاعىش بولادى. سارقىراعان كوبىكتى سۋعا ءبىر باتىپ، ءبىر شىعىپ، ۇرىنباي وتكەن قوي تاسقا قورقاقتاي قاراپ، العا جىلجيسىڭ. وزەننىڭ جايپاقتاۋ جەرىنە جەتىپ، جايلى قايىققا جايعاسىپ مىنگەنشە، ارتىندا وتىرعان الدىنداعىعا، الدىنداعى ارتىندا وتىرعانعا كەدەرگى كەلتىرمەي، كەرىسىنشە تەپە-تەڭدىك پەن ورتاق ۇيلەسىمدى ساقتاۋعا تىرىسادى. ونى ساقتاماعانداردىڭ، كوبىندە، قايىعى ورتا جولدا توڭكەرىلىپ، دىتتەگەن جەرىنە جەتە الماي تيتىقتايدى...

كەلەسىلەرىنىڭ تاعدىرى تىپتەن ايانىشتى. تارتىلعان تەڭىزدىڭ ورىنىندا قاۋقيىپ قۇر قاڭقاسى قالعان، ىشىنە يت-قۇس دارەت سىندىرىپ، قىبىرلاعان جاندىك قيىن قالدىرعان كەمە مەن قايىقتار دا بار. اتىزدا اڭتارىلىپ، قويىن-قونىشىندا سىڭسىعان جەل ۋلەپ، جەر باۋىرلاپ جاتقان ونداي كەمەلەردىڭ ءبىر كەزدەرى، اق ايدىندا جەلكەنى جەلبىرەپ، جال-جال تولقىندى جارىپ كەتىپ بارا جاتقان "قۋاتتى كۇش" بولعانىنا سەنگىڭ كەلمەيدى...

اللا بىزدەردى پاناسىنا العاي!!!

شۋاقتى ەلدە قۋاتتى مەملەكەت قۇرىپ، ەكى دۇنيەنىڭ يگىلىنە قول جەتكىزە بەرەيىك!

تاۋەلسىزدىك تويى قۇتتى بولسىن، اعايىن!!!