قازنەتتە 16 جەلتوقساندا بيىل ماۋسىمدا اقتوبەدە قىرعىن جاساعان لاڭكەستەر جايلى ۆيدەو پايدا بولدى. قىلمىسكەرلەر ءوز ىستەرىنە وكىنىپ، كەشىرىم سۇرادى دەپ حابارلايدى tengrinews.kz تەلەارناسى.

"ورازاداعى ويران" دەپ اتالاتىن تۋىندىدا لاڭكەستەردىڭ وزدەرى بولعان وقيعانى بۇكپەي ايتىپ بەرەدى. بەيبىت كۇندە بۇلىك شىعارعاندار جۇزدەرىن جاسىرماي، وكىنىشتەرىن حالىققا جەتكىزۋدى سۇراعان ەكەن. سوندىقتان وزگەلەرگە ساباق بولار دەگەن نيەتپەن ءفيلمدى ازىرلەۋگە جەرگىلىكتى بيلىك تاپسىرىس بەرگەن. ونى ازىرگە جەرگىلىكتى ارنالار مەن ارنايى سايتتار ارقىلى عانا كورسەتىپ جاتىر.

بۇل كورىنىستەگى اتىس ورتاسىندا قالعان ويىن بالاسىنىڭ داۋسىن ەستىگەن جاننىڭ دەنەسى تىتىركەنەدى. وسىدان-اق اقتوبەدە جازدا سويقان سالعان سودىرلاردىڭ بەيقام كوڭىلدى بالانى دا اياماعانىن بايقايمىز. وسى كۇنگە دەيىن ەش جەردە كورسەتىلمەگەن بۇل بەينەكادرلاردى «ورازاداعى ويران» اتتى دەرەكتى فيلمدە قولدانعان. جەرگىلىكتى بيلىك پەن قۇزىرلى ورگاندار تۋىندى ارقىلى ماۋسىمداعى لاڭكەستىك وقيعانىڭ قالاي بولعانىن جانە باستى كەيىپكەردىڭ كىم ەكەنىن اشىق جاريالاۋدى ءجون دەپ شەشىپتى.

قارۋ-جاراق دۇكەنىنەن باستاپ، اسكەري بولىمگە دە شابۋىل جاساعاندار سول كۇنى دميتريي تاڭاتاروۆتىڭ شىلدەحاناعا شاقىرعانىن ايتادى. جالدامالى پاتەردە ءدام اۋىز تيگىزىپ، ءبىر ساعات بويى جيھاد جايىندا ۋاعىز ايتىپتى.

"تاماقتاندىرعان سوڭ تەلەفوندارىن الىپ العان. كەيىن ءوشىرىپ تاستاعان"، - دەيدى اسحات راحمەتوۆ.

ءقازىر لاڭكەستەر اتىسقا نە يتەرمەلەگەنىن ناقتى ايتا المايدى. ءبىرى ۋاعىزعا ۇيىعانىن ايتسا، ءبىرى سۋ ىشكەن سوڭ ەسىمىزدەن اداستىق دەپ وتىر. مۇنى ساراپشىلار دا جوققا شىعارمايدى. ويتكەنى سودىرلاردىڭ قان قۇرامىنان ەستەن تاندىراتىن امفەتين مەن پەتانيل تابىلعان. دەسە دە، ولار حاق ءدىننىڭ جولىنان تايعاندارىن مويىندايدى.

"نامازدا جۇرگەن باۋىرلارعا ايتارىم قاتەلەسپەڭدەر. ادام ءولتىرىپ، ءجاناتقا ءتۇسۋ مۇمكىن ەمەس"، - دەيدى الىبەك اقپانبەتوۆ.

سودىرلار وسىلاي، كوزدەرىنەن جاستارىن سورعالاتىپ، حالىقتان كەشىرىم سۇرادى. ەندى وكىنگەنىمەن اتىستا ءتىرى قالعان جەتەۋى ءومىر بويى بوستاندىق كورمەيدى. ايتسە دە ەركىندىكتە قالعان بالالارى ءۇشىن الاڭدايدى ەكەن. 

"وتىرمىن الدارىڭىزدا. ماما، كەشىر دەيمىن بولدى. بالالارىما قاراشى"، - دەدى باقىت قۋانىشبايەۆ.

 "ورازاداعى ويران" دەپ اتالاتىن بۇل دەرەكتى فيلم اقتوبەدەگى جەرگىلىكتى ارنالار مەن عالامتورداعى سايتتار ارقىلى كورسەتىلىپ جاتىر. جەرگىلىكتى بيلىك ەندى ونى جاستار اراسىنداعى لاڭكەستىكپەن كۇرەسۋ قۇرالى رەتىندە قولدانباقشى. ول ءۇشىن ايماقتاعى بارلىق وقۋ ورىندارىندا كورسەتىلەدى.