تاۋەلسىزدىك كۇنى قارساڭىندا رەسپۋبليكالىق قوعامدىق-ساياسي «پرەزيدەنت جانە حالىق» گازەتى مەن رەسپۋبليكالىق «ۋاقىت تاڭداۋى –ۆىبور ۆرەمەني» اگەنتتىگىنىڭ بىرلەسكەن جوباسى بويىنشا جەڭىمپازدار انىقتالدى. «جىلدىڭ ۇزدىك وبلىس اكىمى» نوميناسياسىندا قىزىلوردا وبلىسىنىڭ اكىمى قىرىمبەك ەلەۋ ۇلى كوشەربايەۆ جەڭىمپاز دەپ تانىلدى. ول جىل ىشىندە وبلىس ەكونوميكاسىن داعدارىسقا قارسى شارالارعا ىسكەرلىكپەن جۇمىلدىرا الدى. تۇرعىن ءۇي كوممۋنالدىق شارۋاشىلىق سالاسىن مودەرنيزاسيالاۋ جەدەل جۇرگىزىلدى. يندۋستريالدىق جوبالاردى جۇزەگە اسىرۋ مەن باسپانا ماسەلەلەرىن شەشۋدە  ايتارلىقتاي ىلگەرىلەۋشىلىكتەرگە قول جەتكىزدى.

تۇركى مادەنيەتىنىڭ حالىقارالىق ۇيىمى تۇركسوي «جىلدىڭ ۇزدىك حالىقارالىق ۇيىمى» اتالىمىندا  جەڭىسكە جەتتى. قازاقستاننىڭ بۇرىنعى مادەنيەت ءمينيسترى دۇيسەن قاسەيىنوۆ باسقاراتىن بۇل حالىقارالىق ۇيىم تۇركى حالىقتارىنىڭ ورتاق مادەني مۇرالارىن الەمدىك دەڭگەيگە كوتەرۋ ماقساتىندا قىرۋار شارۋالاردى جۇزەگە اسىردى.

تەحنيكا عىلىمىنىڭ دوكتورى، پروفەسسور ءابدىمۇتالىپ ءابجاپپاروۆ باسقاراتىن شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى «جىلدىڭ ۇزدىك جوعارى وقۋ ورنى» اتاندى. ۋنيۆەرسيتەت ءۇش دەڭگەيلى وقىتۋ جۇيەسىن رەسپۋبليكادا العاشقىلاردىڭ ءبىرى بولىپ جۇزەگە اسىردى.

الماتى قالالىق كارديولوگيا ورتالىعى حالىققا كەپىلدى مەديسينالىق كومەك كورسەتۋ بويىنشا «جىلدىڭ ۇزدىك ەمدەۋ مەكەمەسى» اتاندى. جوعارى ساناتتى كارديوحيرۋرگ المات تۇرىسبەك ۇلى قوداسبايەۆ باسشىلىق ەتەتىن ۇجىم تەك 2016 جىلدىڭ وزىندە 4 مىڭعا تارتا كوروناگرافيا جانە مىڭ جارىمداي كورونارلىق ارتەريالاردى ستەنتتەۋدى جۇزەگە اسىردى. بۇل وسىنشاما ادامدى ومىرگە قايتا ورالتتى دەگەن ءسوز.

سىدىق بەكەت باسقاراتىن «داۋلەت-بەكەت» كومپانياسى شۇبات ءوندىرۋ تەحنولوگياسىن وندىرىستىك جولعا قويعانى ءۇشىن «جىلدىڭ ۇزدىك كومپانياسى» نوميناسياسىنىڭ جەڭىمپازىنا اينالدى. بۇگىنگى كۇنى 5 مىڭنان استام تۇيە ءوسىرىپ وتىرعان شارۋاشىلىق جىلىنا 1600 توننا ءسۇت، 300 توننا ەت، 12 توننا ءجۇن وندىرەتىن مەجەگە جەتتى. شۇبات تەك قازاقستان ەمەس كورشى مەملەكەتتەرگە دە ەكسپورتقا شىعارىلادى.

«ۋاقىت تاڭداۋى» جوباسىندا «قازاقستاننىڭ ەڭبەك سىڭىرگەن قايراتكەرى» ەركىن تۇرسىنعالي ۇلى شۇكىمان  «2016 جىلدىڭ ۇزدىك ءانشىسى» اتاندى. ارقا اندەرىنىڭ ناسيحاتشىسى انشىلىك قىزمەتپەن عانا ەمەس قازاق مۋزىكا ونەرىنىڭ زەردەلى زەرتتەۋشىسى رەتىندە دە كوزگە ءتۇسىپ ءجۇر.