ەسىك قالاسىندا بىرنەشە ەر ازاماتتان زورلىق كورگەن جىبەك مۋسينوۆا ەندى سول قىلمىسكەرلەردىڭ تۋىستارىن دا سوتقا بەرمەكشى. ول تۇرمەگە جابىلعان جىگىتتەردىڭ تۋىستارىن جالا جاپتى دەپ ايىپتاۋدا. بۇل تۋرالى Informburo.kz حابارلادى.

ج.مۋسينوۆانىڭ قابىلداعان شەشىمىن 18 جەلتوقساندا ونىڭ قورعاۋشىسى مالىمدەدى. زاڭگەر ايمان ۋماروۆا جىبەكتىڭ نە ماقساتتا سوتقا جۇگىنبەكشى ەكەنىن ايتىپ بەرگەن.

"ءبىز سوتتا جەڭىپ شىقتىق، كىنالىلەردىڭ ءبارى ءتيىستى جازاسىن الدى. ءبىراق، ۇكىم وقىلعاننان كەيىن سوتتالۋشىلاردىڭ تۋىستارى ءبىزدى جايىمىزعا قالدىرعان جوق. ولار باسپا ءسوز ءماجىلىسىن وتكىزىپ، جىبەككە جالا جاپقان. ءقازىر ول سوتقا ارىز دايىنداپ جاتىر. سوتتالۋشىلاردىڭ تۋىستارىن جالا جاپقانى ءۇشىن جازالانۋدى تالاپ ەتەمىز. جالا جاپتى دەپ وتىرعانىم، ولار جىبەكتى توبەلەستى باستادى دەپ ايىپتايدى. راسىندا ول توبەلەسپەگەن، وعان شابۋىل جاسالعان. ءتىپتى، سوت-مەديسينالىق ساراپتاما جىبەكتىڭ قانىندا الكوگولدىڭ وتە از مولشەردە بولعانىن انىقتادى. ياعني، ول ماس تا بولماعان"، - دەيدى ايمان ۋماروۆا.

زاڭگەردىڭ ايتۋىنشا، جابىرلەنۋشىگە الىگە دەيىن سوتتالعانداردىڭ تۋىستارى تاراپىنان قىسىم كورسەتىلىپ كەلەدى ەكەن.

"سوتتالعاندار تۋىستارىنىڭ باسپا ءسوز ءماجىلىسىن وتكىزىپ، ب ا ق وكىلدەرىنە بەرگەن اقپاراتتارى جالعان. ءبىزدىڭ ويىمىزشا، ولار وسىلايشا اپەللياسيالىق كوميسسياعا اسەر ەتپەكشى"، - ءوزىن ءتۇيدى جىبەك مۋسينوۆانىڭ قورعاۋشىسى.

ەستەرىڭىزگە سالايىق، ەسىك قالاسىنىڭ تۇرعىنى جىبەك مۋسينوۆانى زورلادى دەگەن كۇدىكپەن ءتورت جىگىت ۇستالعان بولاتىن. سوتتا ولاردىڭ كىنالارى تولىق دالەلدەنىپ، بارلىعى دا ۇزاق مەرزىمگە باس بوستاندىعىنان ايرىلدى.

ايتا كەتەر بولساق، بۇعان دەيىن دە سوتتا شۋ شىعارعانى ءۇشىن سوتتالعانداردىڭ جاقتاستارىنا ايىپپۇل سالىنعان ەدى.