تايلاندتىق فيتنەس-ترەنەر جانە مودەل سيۋزي ەيگ بىشكەكتە تۇرىپ جاتقانىنا جارتى جىل. ەكى ۇلدىڭ اناسىنىڭ جاسى قىرىقتا، ءبىراق دەنە سىمباتىنا قاراساڭىز 25 جاسار قىزداي. "سپۋتنيك-كىرگىزستاننىڭ" ءتىلشىسى ءسيۋزيدىڭ سۇلۋلىق سىرى مەن قىرعىز ەلىن جاقسى كورۋىنىڭ سەبەبىن انىقتاپتى. 

«ۇزاق جىلدار بويى مەن تايلاندتا بي ساباعىنان ءدارىس بەردىم. سوسىن ماگيستراتۋراعا ءتۇسىپ، اقش-قا قونىس اۋداردىم. وقۋدان كەيىن فيتنەس-ترەنينگپەن اينالىسا باستادىم. بالالىم شاعىم تايلاندتا ءوتتى. ازيالىق ايەلدەر كوبىنەسە ۇيدە وتىرادى، بالاعا قارايدى، ءسويتىپ وزىنە ۋاقىت تاپپايدى. اقش-تا جاعداي باسقاشا. مەن مىسالى نازىكجاندىلار دا شتانگى كوتەرە الاتىنىن دالەلدەگىم كەلەدى» دەيدى سيۋزي.

ءسيۋزيدىڭ ايتۋىنشا دەنە سىمباتى مەن سۇلۋلىعىن ساقتاعىسى كەلەتىن ايەل باستىسى دۇرىس تاماقتانىپ، دەنە جاتتىعۋلارىن جاساپ تۇرۋى قاجەت.

«كەز كەلگەن جاستا ايەل ادام ادەمى قالپىن ساقتاپ قالعانى شارت. دەنساۋلىقتىڭ قالپىنا كەلمەيتىندىگىن ەستەن شىعارماۋى كەرەك. دۇرىس تاماقتانۋ دەگەن كۇندەلىكتى ىرىمشىك قانا جەۋ دەگەندى بىلدىرمەيدى عوي. پايدالى تاماقتار كوپ ىزدەگەنگە» دەپ كەڭەس بەردى تايلاند قىزى.

ءسيۋزيدىڭ ويىنشا ول قىرعىز ەركەكتەرىنە ۇنامايدى. «مەنىڭ فوتولارىما قاراپ، ولار عايبات، اۋىر ءسوز جازۋدان جالىعار ەمەس. ونداي پىكىرلەردى وقىعاندا باستاپقى كەزدە كوز جاسقا ەرىك بەرەتىنمىن. ءقازىر ەتىم ۇيرەنىپ كەتتى. قانشا دەگەنمەن مەنتاليتەت ءارتۇرلى» دەيدى ول.

سيۋزيگە قىرعىزستان قاتتى ۇناپتى. قىرعىزدىڭ ۇلتتىق تاعامدارىن ول ءسۇيسىنىپ جەيدى ەكەن. "قىرعىزدار وتە قاراپايىم حالىق. مەيىربان جانە تاربيەلى جاندار. قىرعىزشا دا، ورىسشا دا تۇسىنبەسەم دە قيىندىق كورىپ جۇرگەن جوقپىن» دەپ ويىن قورىتىندىلادى.