نۇرشات ازىنبەك
اپا
قارعاشىڭنىڭ قارعا وراماي كوكتەمىن،
قالاۋىمدى قاباعىڭمەن شەكتەدىڭ.
ۇزاق تۇندە نەعىپ ايتتى ەكەنسىز
باعى اشىلماي جۇرگەن قىزدىڭ وتكەنىن؟!
توبەگە ءۇنسىز تەلمىرەمىن توزگەندەي،
توگىلەدى ءوز كوزىمەن كورگەندەي.
سول قىز جايلى اڭگىمەنى جالعايدى،
سان مىڭ جۇلدىز بىر-بىرىنە ءسوز بەرمەي.
بۇلدىر- بۇلدىر بۇلتى قالىڭ كۇن كەلسە،
كۇلدىر- كۇلدىر عۇمىر عوي بۇل تىم كەلتە.
قۇراق ۇشىپ كوزىن ءسۇيىپ جۇرمە ەكەن،
سونادايدان مەن سەكىلدى قىز كورسە؟!
وزگەرتسەمدە بەكىمىمدى ب ا ق سۇراپ،
كولدەتسەمدە كوزدەرىمنەن جاس قۇلاپ.
باۋىرىڭا باسىڭىزشى اپاشىم ،
الدىمەنەن ۇرسىپ الىپ قاتتىراق.
قارعاشىڭنىڭ قارعا وراماي كوكتەمىن،
قالاۋىمدى قاباعىڭمەن شەكتەدىڭ.
باۋىرىڭدا تىڭداپ جاتىپ قالعىسام،
الگى قىزدىڭ باقىتتى بوپ كەتكەنىن. . . .
اكە
ءسىز ايتاسىز :
" جۇلدىز-جانار قاراڭعىعا جاعىپتى وت،
قۇدىرەتتەي سەزىنگەنگە بۇكىل الەم جارىق "دەپ.
مەن ايتا الماي وتىرامىن ەكى كوزىم جاۋتاڭداپ ،
مۇڭعا بەرگەن كۇندەرىمدى الدىڭىزعا الىپ كەپ.
وكپەلەۋىن وسالدىققا جاسىرمايتىن بولعاندا،
كوكتەمەگىر قاتالدىققا اشىنبايتىن بولعاندا.
بويجەتتىم بە، قىسقا كۇنىم بارا جاتتى قىسقا اۋناپ،
ەركەلەپ كەپ مويىنىڭا اسىلمايتىن بولعاندا.
اتتاندىرعان وزىڭ ەدىڭ بۇل ساپارعا ءسال جۇدەي،
ماقتاندىرعان كوزىڭ ەدىم ماراپاتى ماڭگىدەي.
ءبىر بيىكتى كۇتەتىنىن تۇرعانىمەن كوزى ايتىپ،
التىن قىزىن قيمايتىنىن جاسىرا الماي قالدى عوي.
باتار جەرى كۇننىڭ بىردەي-بارار جەرى ءبىر كەشىڭ،
شاھار مەنى كوزگە ىلمەيدى ، تۇك ەتپەيدى ىلمەسىن !
ساعىنىشتى ساناسىنان ءۇزىپ العان ولكەدە،
اق بۇلتتارعا قونىپ قالعان نۇردى قۋىپ ءجۇر دەسىن.
باعى سودان جاندى ما دەپ تىلەك بولىپ باستاسىن،
الىس ەمەس جولدارىنا تىرەك بولىپ جاتقاسىن .
تۇنگى ۇيقىسىن بولمەيىنشى تۇسىنەدە كىرمەيىن،
جانى جاۋراپ قالدى ما دەپ جۇرەگىنە باتپاسىن! ! !
ءسىڭىلىم
بۇرىمىڭدى بۋعانىڭدا سانىمەن،
ءسابي كۇنىڭ بۇلدىرايدى ساعىم ءوڭ.
گۇلگە جايىپ بولعان شىعار كوبەلەك،
بويجەتتى دەپ جۇرگەن جۇرتقا نالىپ ەم .
ەلدىڭ ءسوزىن قايتارمادىم قاتەگە،
باعىنبايسىڭ باسقا ۋايىم جات ەمەن.
باياعىداي جىلاتاتىن تەنتەكتىڭ،
اتىن ايتىپ شاعىنبايسىڭ اكەمە.
جىمياسىڭ الاڭىمدى جەل ەمدەپ،
جۇرەگىڭە باتا بەرەم تەرەڭدەپ.
مەن سىرىمدى توگىپ الدىم بايقاماي،
ءومىر جايلى اڭگىمە ايتىپ بەرەم دەپ. . .
نالاسى اسقان تىرلىگىمدى سەزگەندە،
سوراسى اققان سورعا جاقىن سوزدەندە
الىستاتىپ كورسەتپەگىم كەلەدى،
قاتالىراق قارايتۇعىن كوزدەندە.
ەندى نەدەن جابىرقاتام كىم بىلگەن،
مولدىرەگەن ارمانىڭدى ءسۇيدىم مەن .
تارقاتا الماي تاعى وتىرمىن قايتەم دەپ،
بۇرىمىڭدى ءورىپ الىپ كىل مۇڭمەن. . .
قاناتتى ەرتەكتەر
سۋرەتىڭدەي جىرىڭ جىلى، پەيىل ءجۇز،
مەندە سونداي ساعىنشقا بەيىم قىز .
باستاپ الدىق تۇگەمەيتىن ءبىر ەرتەك،
ەڭ العاشقى تانىستىقتان كەيىن ءبىز .
بۇعان دەيىن ءومىر سۇرمەي، كۇن كەشپەي .
جۇرگەندەي-اق، سىرلاسقانبىز تىم كەشتەي.
بۇگىنگى ايعا وكپەمدى ايتام ءۇنسىز ول،
بۇرىن قايدا ءومىر كەشتىك جۇزدەسپەي.
ءسىز دالانى سۇيەتىنسىز، ۇندەمەي،
ولەڭىڭنەن وقىپ ۇققام، بىلمەگەي.
شەگارانى قيالمەنەن قيراتىپ،
جاقىندىقتى ارماندايتىن تۇندەر-ەي.
كوكتىڭ سۇلۋ پەرىلەرى جاسقانا
جەرگە قونىپ، جاساپ جاتىر اق قالا .
بۇگىنگى قار ءبىز جازاتىن جىرلاردىڭ،
سويلەمىندەي اپپاق ءارى تاپ-تازا .
"ساعىندىم "دەپ ءسوز ايتتىڭىز نەگە ءمىن؟!
جىميدىم مەن، كەرەك بولماي نە دەرىم.
باعى جانباي جۇرگەن قانشا تاعدىرلار،
بالكىم، تۇنىق ساعىنىشى جوق ونىڭ!
ءبىراق سول ءسوز قايتالانسا سەزەمىن:
"اعا، مەنى ساعىنباڭىز " دەر ەدىم. . . .
شەكسىز كوشە
جاعاڭ التىن جان ەدىڭ عوي، كوزىڭ نۇر،
جاعالاۋعا ۇيا سالسام ورتەنبە.
ءبارى سەنىڭ الەگىڭ عوي، ءوزىڭ ءبىل
بايقاماعان بولىپ جۇرە بەرسەڭدە. . .
مولدىرەگەن قاراشىعىڭ قالعيدى،
ەندى مەنەن ەلەس جىراق كەتەمە؟!
قالتامداعى قالعان-قۇتقان قايعىمدى،
شاشىپ كەتتىم سەن جۇرەتىن كوشەگە
جاۋتاڭداتىپ جۇرەگىمدى جۇتتىڭ دا،
قالاي اعىپ بارا جاتسىڭ بەۋ ىلە. . .
قاناتىما جارا جازىپ ۇشتىم با،
تۋعان جەردىڭ كوكجيەگىن كومىلە؟!
ەكى جولمەم كەتەيىكشى بولدى ءبىز،
قوشتاساردا نە دەۋشى ەدى، ۇمىتتىم؟!
ساعىنىشتان شەكپەن كيگەن شەرلى كۇز،
"ارمانىڭنان اداستىڭ " دەپ كۇلىپ تۇر .
اداستىرىپ تابىلارمىز جول ءبىزدى،
جولىقتىرماي جۇرگەنىنە وكىنسىن.
ەركەلىگى باتىپ كەتكەن سول قىزدى،
كوشەلەردە كوشكەن مۇڭدار كەشىرسىن!
دايىنداعان: بۇلعىن سۋسار
