قىتايدىڭ قازاقتار شوعىرلانعان ءوڭىرى التاي ايماعىندا تۇراتىن وتانداسامىز، 22 جاستاعى كاسىپقوي بوكسشى بەيسەنبى ءناسيوللا ۇلى (10-0-1، 5كو) 12 كەزدەسۋىندە قارسىلاسىنان باسىم ءتۇسىپ، سۋپەر جەڭىل سالماق دارەجەسى بويىنشا (WBA) جۇڭگو چەمپيونى بەلبەۋىن قورعاپ قالدى دەپ حابارلايدى dodasport.kz.

قىتايدىڭ حانچجوۋ قالاسىندا بولعان كەزدەسۋدە بەيسەنبى جاڭازەلانديالىق لەكي ماكانى (9-0-0، 3كو) 10 راۋندقا سوزىلعان ايقاستا ايقىن باسىمدىلىقپەن (99:92،98:92،98:92) تىزە بۇكتىردى.
قىتايلىق جانكۇيەرلەرى گولوۆكيننىڭ ءىزباسارى دەپ «OneG» اتاپ كەتكەن بەيسەنبى كاسىبي رينگتە جالپى 12 كەزدەسۋ وتكىزىپ، 11 ايقاستا جەڭىسكە جەتكەن (5 نوكاۋت) جانە بىرەۋىندە تەڭ تۇسكەن. ال بۇل بەيسەنبىنىڭ 2016 جىلى وتكىزىپ وتىرعان 5 كەزدەسۋى، سونداي اق ەكىنشى رەت جۇڭگو چەمپيونى بەلبەۋىن قورعاۋى. «بۇل مەنىڭ العاشقى رەت ەرەسەكتەر اراسىنداعى ايقاسقا شىعۋىم، قارسىلاسىم ءالى جەڭىلىپ كورمەگەن تاجيربەلى بوكسشى. بۇل مەنىڭ ەكىنشى رەت جۇڭگو چەمپيونى اتاعىن قورعاۋىم. ەندى ازيا قۇرلىعىنىڭ اتاعىنا تالپىناتىن جوسپارىم بار. قازاق ەلىنىڭ 25 جاسقا تولىپ وتىرعان قۋانىشتى كۇنىندە جەڭىسكە جەتكەنىمدى ماقتان تۇتامىن جانە بۇل جەڭىسىمدى الىستاعى اعايىن اتىنان تاۋەلسىز قازاقستاننىڭ 25 جىلدىعىنا ارناعىم كەلەدى»، — دەدى ول قازاقپارات تىلشىسىنە بەرگەن سۇحباتىندا.

ەسكە سالا كەتەيىك، بەيسەنبى بۇعان دەيىن WBC نۇسقاسى بويىنشا بوكستان جاستار اراسىنداعى الەم چەمپيونى (WBC World Youth Champion) جانە WBA بويىنشا جۇڭگو چەمپيونى اتانعان بولاتىن.