سەرىك قۇلجاقان
دومبىرا مىنەزدى وزەن
ەسسىز وزەن !
سەن ءتىپتى سۋ عاناسىڭ !
بوگەلەسىڭ ، قۇريسىڭ ، بۇلعاناسىڭ !
كوكتەم كەلسە بۇلقىنىپ جىنداناسىڭ !
يەسىز توستاعاندا تۇنعان اسىم !
تاسپەن تاستى سوقتىرىپ ، ورعىپ ، ۇدەپ ،
بۇلقىنعانىڭ بار بولسىن جالعىز رەت !
باعدارى جوق بايانسىز بۇلتقا اينالىپ.
تاۋعا جاۋىپ كەتكەندە تاعدىرىڭ كەپ …
سالىندىدان سارى الا قاسپاق تۇرىپ ،
سابىرىڭا تۇسەرسىڭ ساپ- ساپ تىنىپ !
مەن مۇسىركەي قارايمىن ، شىلىم سورىپ ،
سەن مازاقتاپ باراسىڭ ساق- ساق كۇلىپ …
التاي
(التاي قالاسىنا)
1
تاس قالا!
تانىس كوشە!
تاسباۋىرلاۋ!
جايدارى جولىقپايدى دوس، باۋىر دا.
تۇياعى اسپالتقا تاڭبا سالىپ،
دۇركىرەپ كوشىپ جاتىر قاسقا جىلدار…
بەتون ءۇي بەرىك قورعان، قاداۋ- قاداۋ.
مەن جالعىز،
اسپان سىنىق،
عالام ناراۋ…
شىڭداردىڭ شىلاۋىشى جاماۋ- جاماۋ،
قىزداردىڭ ەرىندەرى بوياۋ- بوياۋ…
القىزىل كوكجيەككە جاسىڭدى وراپ،
مەنىمەن سىرلاساتىن كەشىڭ عانا!
ۇشەۋدەن وقشاۋ قالعان شەرمەندەسىڭ،
التاۋدان الىس قالعان جەتىم قالا!
جەردىڭ بەتىن جۋسادا جەتى نوسەر
جەتىمنىڭ قۇشاعىندا جەتىم وسەر!
سابىلعان سامارقاۋلار ،
ايقايلاساڭ
كۇيبەڭدەپ قۇمىرسقاداي ەسى كەتەر…
التىن كۇن الا تاۋدىڭ باسىندا تۇر…
اسپالتتىڭ استىندا باسىم جاتىر!
تاس ەمشەگىن توسەيدى تاس قالاعا
قىرىق توعىز قۇبىلعان قاتىن عاسىر!
2
قادالار قىزىل جالاۋعا بولا
قىپ قىزىل تاستان قالانعان قالا …
كولەڭكە قۋعان كوگالدا بالا
ابىرجىپ تۇرعان الاڭداۋلى انا …
كۇلكى شىقپايدى
كونتابان جولدان ،
قاۋھارى كەتكەن شارشاعان جاندار …
قازان قاباعى قىراۋ بوپ قاتقان
قالجىراپ اتقان قاۋساعان تاڭدار …
قۇدايدىڭ عانا
(سەن اسپانداما! )
جالعىزدىعىنا تالاسقان قالا !
جىلاپ بارادى جولدىڭ شەتىندە
كولەڭكەسىنەن اداسقان بالا …
ىزعار جارىقتار …
ونى دا ايتپايمىن،
تۇندەر عارىپتار
ونى دا ايتپايمىن.
تاڭدار تابىتتەر ونى دا ايتپايمىن …
جىلاعان بالا ، كولەڭكەڭ قايدا
جوعالعان قالا جولىنا ۇقسايتىن …
التايدىڭ قىناسى ەم
سەكسەندى قويىپ توقسانعا كەلسەم ءبىر كۇنى ...
شاشىمدى قويىپ اعارىپ قاسىم ، كىرپىگىم …
قالارمىن ءوزىم !
ورىندىقتا ياكي توسەكتە ،
تونالار ءبارى …
جاستىقتىڭ جالعان جىلتىرى !
قالجىراپ جۇرىپ ، ىستىقتا سۋىق كۇن كەشىپ ،
الدىمدا جالعىز اجال دەيتىن ءبىر سىرلى ەسىك .
التايدان- مىناۋ اكەمدى كومگەن توپىراق !
بۇيىرار ما ەكەن ءبىر بەسىك؟!
كوزى بوپ قونباي اكەمنەن قالعان سايعاققا !
كوبەلەك تاعدىر تارتاسىڭ ەندى قاي جاققا ؟!
كۇل بولىپ ءتانىم شاشىراپ كەتەرمە ەكەن- اۋ
ورتەنىپ جاتقان وسىناۋ سورلى ايماققا !
جانىمدا قالىپ العىزدىق ۋىن بولە ىشكەن ،
التايىم مەنىڭ !
وزىڭدە كەشسەم نە كەشسەم !
بابامنىڭ قانى تاسىڭا تامىپ كەتكەندە
ايازىڭدى ەمىپ قارىسقان قىنا ەمەسپە ەم !
دايىنداعان: بۇلعىن سۋسار
