قازاقستاندا قۇقىققورعاۋ ورگاندارى پەدوفيلدى ۇستادى. «تيمۋر اعا» ەسىمدى پەدوفيل ءبىر جىل بويى 8 جاسار قىزعا تەلەفون ارقىلى سەكسۋالدى نەگىزدەگى اڭگىمەلەر ايتقان دەپ حابارلايدى newsru.com. كۇدىكتى 55 جاستا. ءقازىر ول ۋاقىتشا ۇستاۋ يزولياتورىندا.

8 جاسار قىزدىڭ اناسى ەلەنا گ، ۇستالعان ەر ادام ءوزىنىڭ كورشىسى، بۇرىڭعى پوليسيا قىزمەتكەرى ەكەنىن ايتتى. «ول ەكىنشى قاباتتا تۇرادى. زەينەتكە شىققان. ءبىراق، ءبىر جەردە جۇمىس ىستەيتىن كورىنەدى. ونىڭ ايەلى، ۇلكەن بالالارى بار. كەشە ونىمەن پوليسيادا كەزدەستىم. ول ارينە ءوز كىناسىن مويىنداماي وتىر» دەيدى ول.

جاقىن ۋاقىتتا فونوسكوپيالىق ساراپتاما دايىن بولادى ەكەن. دەسەك تە، پوليسيا ونسىز دا ەر ادامنىڭ كىناسىن ايقعاقتايتىن دالەلدەر كوپ ەكەنىن ايتادى.

ءوزىن «تيمۋر اعا» دەپ اتاپ كەتكەن پەدوفيل ءبىر جىلدان اسا 8 جاسار قىزدى قوڭىراۋلارىمەن مازاسىن العان. ول تەلەفون ارقىلى ءوزىنىڭ جىنىستىق قارىم-قاتىناستاعى ءومىرى تۋرالى ەگجەي-تەگجەيلى ايتىپ، ءوزىنىڭ ەروتيكالىق قيالىمەن بولىسكەن. اناسىنىڭ ايتۋىنشا ونىڭ بۇل ارەكەتتەرى ءبىر جىلعا سوزىلعان. اناسىنىڭ جۇمىستان شىعۋىنا تۋرا كەلگەن. ول بالاسىن  جالعىز ءوزى اسىرايدى.

پەدوفيل 2015 جىلدىڭ قازان ايىنان باستاپ قىزعا قوڭىراۋ شالا باستاعان. ءتۇننىڭ ورتاسىندا ونىڭ تەلەفون قوڭىراۋلارى قىزدىڭ ۇيقىسىن بۇزعان. قىز تەلەفوندى كوتەرگەندە ەر ادامنىڭ داۋسى ونىڭ دەنەسىن قالايتىنىن ايتىپ، تەلەفوندى قويا سالادى ەكەن.

«بەيتانىس ەر ادام ۇياتسىز سوزدەردى ايتۋدان ەش قىمسىنبايتىن. مەنىڭ جۇيكەم ابدەن جۇقاردى. ول تەك تۇندە عانا ەمەس، تاڭ ەرتەڭدە قوڭىراۋ شالاتىن بولدى. مەن ونى پوليسيامەن دە قورقىتتىم. الايدا، ودان كەيىن ول جيىركەنىشتى ارەكەتىن توقتاتپادى».

قاراعاندى وبلىسى ىشكى ىستەر دەپارتامەنتى باسپا ءسوز قىزمەتىنىڭ باسشىسى باقىتجان قۇدياروۆ قىلمىسقا قاتىستى سوتقا دەيىنگى تەرگەۋ جۇمىستارى جۇرگىزىلىپ جاتقانىن حابارلادى. «تيمۋر اعانى» ۇستاۋ ءۇشىن ارنايى جەدەل تەرگەۋ توبى قۇرىلدى.