ماسكەۋلىك كرەملدىڭ قارۋلار پالاتاسىندا الەكساندر نيەۆسكييگە تيەسىلى دۋلىعا ساقتالىپ كەلەدى. ءبارى ادەتتەگىشە كومكەرىلگەن: حرام كۇمبەزى فورماسىنداعى قىزىل تەمىر، الماز، رۋبين، زۇمىرەتتەرمەن كوركەمدەلگەن تاستار. كەنەت ارابشا جازۋ! پراۆوسلاۆتىق كنيازدىڭ دۋلىعاسى! قۇراننىڭ 61-سۇرەسىنىڭ 13-اياتى: «تاعى باسقا سەندەر جاقسى كورەتىن ءبىر نارسە بار: اللا جاقتان ءبىر كومەك جانە جاقىن ءبىر جەڭىس بار. (مۇحاممەد ع.س.) مۇمىندەردى قۋاندىر».

اڭىزعا سۇيەنسەك، نيەۆسكييدىڭ دۋلىعاسى XVII عاسىردا قايتا وڭدەۋدەن وتكىزىلىپ، ارنايى وزىنە قايتا جاساتقان. ساراي ادامى نيكيتا دانيلوۆ قىمبات تاستى اشەكەيلەرمەن تولىقتىرعان. جاڭادان وڭدەلگەن باس كيىم « پاتشا ميحايل فەدوروۆيچتىڭ ەريحوندىق دۋلىعاسى» دەگەن اتاۋ الادى.  

XX عاسىردىڭ تاريحشىلارى اڭىزعا سەنبەي، دۋلىعانىڭ الەكساندر نيەۆسكييگە تيەسىلى ەكەنىنە كۇمان كەلتىرەدى. ولاردىڭ توپشالاۋىنشا، «ەريحوندىق باس كيىم» شىعىستا وڭدەلگەن، ءبىراق ميحايل فەدوروۆيچتىڭ قولىنا كەزدەيسوق تاپ بولادى.

دۋلىعاداعى ارابشا جازۋدى نە سەبەپتى الدىرتىپ تاستاماعانى جايلى ەشكىم ناقتى تۇسىندىرە المايدى. نەمقۇرايلىق پا؟ بۇلاي بولۋى ەكىتالاي. بىلمەستىكتەن بە؟ مۇمكىن ەمەس. حان سارايىندا اراب كالليگرافياسىن بىلەتىن تاتارلار از بولعان جوق. ءبىر قىزىعى،  ارابتىڭ ورمە جازۋى يۆان گروزنىيدىڭ دا دۋلىعاسىندا كەزدەسكەن. ارينە، مۇنى جاۋدىڭ قولىنان تۇسكەن ولجا دەۋگە بولادى. ءبىراق، بىلدەي اتى بار پاتشا كيىلگەن دۋلىعا كيەدى دەپ ايتۋ اقىلعا قونىمسىز.