الماتى قالالىق قىلمىستىق ىستەر جونىندەگى مامانداندىرىلعان اۋدانارالىق سوتىندا №1 بالالار ۇيىندەگى سەكسۋالدىق زورلىق دەرەگى بويىنشا سوت ۇكىمى وقىلدى. بالالار ءۇيىنىڭ 19 جاستاعى تۇلەگى سەرىك اسىلبەكوۆ كىنالى دەپ تانىلدى، - دەپ حابارلايدى kaz.tengrinews.kz

ق ر قىلمىستىق كودەكسىنىڭ 121-بابىنىڭ 4-بولىگى بويىنشا اسىلبەكوۆ 15 جىلعا باس بوستاندىعىنان ايىرىلدى. سونىمەن قاتار، ول پەداگوگيكالىق قىزمەتتەردى اتقارۋدان ءومىر بويىنا شەكتەلدى.

ۇكىمدى سۋديا ايتگۇل ارعىمبايەۆا وقىدى.

ايتا كەتەيىك، بۇل باپتىڭ سانكسياسى ءومىر بويىنا باس بوستاندىعىنان ايىرۋدى قاراستىرعاندىقتان، سوتقا القا بيلەردى تارتۋ قاراستىرىلعان، ءبىراق اسىلبەكوۆتىڭ قورعاۋشىلارى بۇدان باس تارتتى.

ەسكە سالايىق، الماتىداعى №1 بالالار ۇيىندەگى داۋ باق-تاردا 13 جاستاعى بالانىڭ وسى مەكەمەنىڭ تۇلەگىنەن بىرنەشە مارتە زورلانعانىن مالىمدەگەنى جايلى اقاپاراتتار جاريالانعاننان كەيىن شىققان بولاتىن.

باستاپقىدا بالالار ءۇيىنىڭ باسشىلىعى كامەلەتكە تولماعان بالانىڭ مالىمدەمەسىن "ويدان شىعارعان" دەپ مالىمدەگەن. ال كەيىن ءبىلىم باسقارماسىنداعىلار بۇل دەرەك بويىنشا قىزمەتتىك تەكسەرىس جۇرگەنىن، ونىڭ قورىتىندىسى بويىنشا سەكسۋالدىق ءتيىسۋ وقيعاسىنىڭ راستالماعانىن حابارلاعان.

الايدا بۇدان كەيىن 19 جاستاعى كۇدىكتى ۇستالىپ، قاماۋعا الىندى. كەيىنىرەك مەكەمە ديرەكتورى قىزمەتىنەن كەتتى. ال تەرگەۋ بارىسىندا ساراپتاما جۇرگىزىلىپ، ونىڭ قورىتىندىسى بويىنشا تاعى ءبىر بالا مەن قىزدىڭ زورلانعانى دالەلدەنگەن.