سان-فرانسيسكودا ءبىراز جىلدان بەرى تۇراتىن، وسىندا تۇراقتى جۇمىستارى، جاپ-جاقسى تابىستارى بار ءۇش وزبەك وتباسى اياق استى ەلدەرىنە كوشەتىن بولىپ جاتىر ەكەن. ولاردىڭ بىرىمەن، بەكزات ەسىمدى جاس جىگىتپەن، شامالى كوزتانىستىعىم بار-تىن. باياعىدا ءبىر جۇما نامازدا از-ماز تىلدەسكەنىمىز ەسىمدە. سول بەكزاتپەن كورشى تۇراتىن قازاق قىزىنان الگى ءۇش وتباسىنىڭ نە سەبەپتى كوشكەلى جاتقانىن ەستىگەندە تاڭ-تاماشا بولدىم. بىلاي بولىپتى. جاڭاعى بەكزاتتىڭ باستاۋىشتا وقيتىن ۇلى ءبىر كۇنى مەكتەپتەن ءبىر سۇمىراي مالىمەتپەن كەلىپتى. 
- دادا، مەن ۇلكەيگەندە قىزعا ۇيلەنسەم دە، ۇلعا ۇيلەنسەم دە بولادى ەكەن. 
داداسى شايىنا شاشالدى ما، كەسەسىن ءتۇسىرىپ الدى ما، الدە ودان دا ۇلكەن ءبىر نارسە بولدى ما ەكەن، ايتەۋىر شوك العانى انىق. 
- ونى قايدان شىعاردىڭ؟ 
- ءمۇعالىم ايتتى. 
بەكزات كوپ ويلانباپتى. سول كۇنى-اق تاشكەنگە بيلەت قاراي باستاعان. مىنا جايتتى ەستىپ، تاعى ەكى وتباسى دەرەۋ جولعا قامدانىپتى. مىنا اڭگىمەدەن سوڭ ەموسيونالدى اسسورتي كۇيىن كەشتىم. بىرەسە، انا ءمۇعالىمنىڭ زۇلىمدىعىنا اشۋىم كەلدى، بىرەسە، الگى وزبەكتەردىڭ قالتاسىنىڭ قالىڭدىعىنا ەمەس، ادامدىق قالىبىنىڭ ساقتالۋىنا قام جەگەن تاقۋالىقتارىنا ءسۇيسىندىم. ارتىنشا، ءوز بالالارىمدى ۋايىمداي باستادىم. باتىستىڭ ءبىلىم بەرۋدەگى جەتىستىكتەرىن ءجيى ايتىپ ءجۇرمىز عوي، دەگەنمەن تاياقتىڭ ەكى ۇشى بارىن كوپ رەتتە ەسكەرە بەرمەيدى ەكەنبىز. عۇلامالار بىلاي دەگەن ەكەن: "ءۇش نارسە ادامنىڭ ءولىم الدىندا يمانىنان اجىراۋىنا سەبەپ بولۋى مۇمكىن. 1. يمانىنىڭ بار ەكەنىنە قۋانباۋ؛ 2. يمانىمنان اجىراپ قالام دەپ قورىقپاۋ؛ 3. مۇسىلمانعا زيان تيگىزۋ." 
وسىندا تۇبەگەيلى قالۋدى ماقسات تۇتقان قازاق وتباسىلارىن بىلەمىن. "ءوزىمىز ءۇشىن ەمەس، بالالاردىڭ بولاشاعى ءۇشىن عوي ءبارى دە" دەپ اقتالىپ جاتادى. دۇرىس قوي، اركىمنىڭ ءوز جولى، ءوز تاڭداۋى بار. دەسە دە، بالالارىنىڭ يمانى ءۇشىن جىلى ورىندارىن سۋىتىپ بارا جاتقان الگى ءۇش جىگىتتىڭ ارەكەتى ۇلگى الارلىقتاي كورىندى ماعان. بالانىڭ بولاشاعىن شىن ويلاعان ادام سولارداي-اق بولسا كەرەك. يمانىم - جيعانىم دەپ، دوللاردى پالەن ەسە تومەن سۋمعا ايىرباستاپ بارا جاتقان ول باۋىرلاردىڭ الدىنان پالەن ەسە ارتىق يگىلىكتەر كۇتىپ تۇرعانىنا ءوز باسىم كۇمان كەلتىرمەيمىن.

مۇرات ەسجاننىڭ facebook الەۋمەتتىك جەلىسىندەگى پاراقشاسىنان الىندى