تۋعان جەردى تاستاپ مۇسىلمان مەملەكەتىنە كوشۋ مۇمكىن بە؟ مۇسىلمان جىگىتىنە عاشىق بولىپ قالعان جاعدايدا، بۇل ابدەن مۇمكىن. سول سەكىلدى lenta.ru سايتىندا جاريالانعان مۇسىلمان جىگىتكە عاشىق بولعان 29 جاستاعى كريستينا اتتى ماسكەۋلىك قىزدىڭ ابۋ-دابيدەگى ءومىرىنىڭ قالاي ءوتىپ جاتقاندىعى جايلى اڭگىمەسىنىڭ قازاقشا نۇسقاسىن «قامشى» پورتالى وقىرمان نازارىنا ۇسىنادى.
«بۇل جاقتا اۋا-رايى وتە ىستىق، جازدىڭ كۇنى +50-گە دەيىن جەتەدى. سول سەبەپتى جازدا ماسكەۋدەگى اتا-انامنىڭ جانىنا ءۇش ايعا كەلىپ قوناقتايمىز.
اتا-انام مەنى، مەنىڭ تاڭداۋىمدى تۇسىنە الدى ما دەگەن سۇراق مەنى ءالى كۇنگە دەيىن مازالايدى. ءوزىم دە انا بولعاندىقتان ولاردى تۇسىنەمىن، مەن ءۇشىن الاڭدايدى، قورقادى. ولارعا كۇنىگە تەلەفون شالىپ، سويلەسىپ تۇرامىن، الايدا، مۇنىڭ جەتكىلىكسىز ەكەنىن تۇسىنەمىن. مۇمكىن، ولار ماعان رەنجۋلى شىعار. ءبىر جاعىنان، ءبىز جىل سايىن جازدا ءۇش اي اتا-اناممەن بىرگە بولىپ، قاستارىنان ايىرىلماۋعا تىرىسامىز. ەگەر ءبىز كورشى اۋداندا تۇرعان بولسا، تەك دەمالىس كۇندەرى عانا كورىسەر ەدىك.
ءار كەزدە دە وتباسىممەن قوشتاسقان وتە قيىن، قاستارىندا قالعىم كەلەدى. الايدا، بالالارىما قارايمىن دا، ابۋ-دابيدە تۇرعان دۇرىسىراق دەپ ويلايمىن. ماسكەۋدەگى بالالار الاڭىنا بارعانىمدا بالالارىما بۇل جەرگە ۇيرەنۋ قيىن ەكەندىگىن بايقايمىن. ۇلكەن ۇلىمنىڭ ەسىمى بريتاندىق بولعاندىقتان، ونى كوپ مازاقتاپ، ءتىل تيگىزەدى. ماسكەۋدە ۇلىمدى «چۋركا» دەپ تە اتايدى. مۇنداعى كىشكەنتاي بالالار ويىن الاڭدارىنا كەلەدى دە، كىم بارىنەن كۇشتى ىستەيدى، كىم كوبىرەك بىلەدى، كىمنىڭ ويىنشىعى جاقسى دەپ ءوزارا تالاسقا تۇسەدى. مەنىڭ بالالارىم ونى تۇسىنبەيدى، ولار ءجاي عانا ويناعىسى كەلەدى.
ءبىز ابۋ-دابيدە ماڭگىلىك قالامىز با، بىلمەيمىن. الدىڭعى جىلدارى بالالارىمدى باسقا ەلدەگى مەكتەپتە وقىتۋ كەرەك دەپ ويلايتىنمىن. سودان انگلياعا بارىپ كوردىك تە، ابۋ-دابيدە قالعانىمىز دۇرىس دەپ شەشتىك. ۇلى بريتانيا جامان مەملەكەت ەمەس، الايدا بىزگە وسى جاقتا جاقسى. اراب امىرلىكتەرىندە قىلمىس دەگەن جوقتىڭ قاس، الكوگول مەن ەسىرتكىگە قاتاڭ تىيىم سالىنعان. ارينە، قاجەت ەتكەن ادام تابادى عوي، دەگەنمەن، انا رەتىندە مەنىڭ جۇرەگىم وسى ەلدە تىنىشتىق تابادى.»
اۋدارعان: نازەركە لابيحان
