ىستامبۇلداعى لاڭكەستىك ارەكەت سالدارىنان زارداپ شەككەندەر اراسىندا قازاقستان ازاماتتارى جوق. بۇل تۋرالى ەلىمىزدىڭ سىرتقى ىستەر مينيسترلىگى حابارلادى. ءقازىر جەرگىلىكتى ديپلوماتتار قوسىمشا اقپارات الۋ ماقساتىندا قۇقىق قورعاۋ ورگاندارىمەن جۇمىس جۇرگىزىپ جاتىر.

انۋار جايناقوۆ، ق ر ءسىم باسپا ءسوز قىزمەتىنىڭ جەتەكشىسى:

 - الدىن الا اقپارات بويىنشا ىستامبۇل قالاسىندا بولعان تەررورلىق ارەكەت سالدارىنان زارداپ شەككەندەر اراسىندا قازاقستان ازاماتتارى جوق. ءبىزدىڭ ديپلوماتتار جەرگىلىكتى قۇقىق قورعاۋ جانە اكىمشىلىك ورگاندارىمەن تىعىز بايلانىستا بولىپ، ءتيىستى اقپارات الۋ جۇمىستارىن جالعاستىرۋدا. ىستامبۇلدا تۇراتىن ازاماتتارىمىزعا ەسكەرتەمىز، ەگەر قانداي دا ءبىر جاعداي بولسا، شۇعىل تۇردە ىستامبۇلداعى باس كونسۋلدىقپەن بايلانىسۋدى سۇرايمىز.

قازاقستان رەسپۋبليكاسى سىرتقى ىستەر مينيسترلىگىنىڭ ىستامبۇل قالاسىنداعى تەررورلىق اكتىگە بايلانىستى:

"2017 جىلدىڭ 1 قاڭتارىندا ىستانبۇل قالاسىندا جاسالىپ، ونداعان ادامداردىڭ قازاسىنا سەبەپ بولعان تەررورلىق اكتىنى كەسىمدى تۇردە ايىپتايمىز.
وسى جيىركەنىشتى قىلمىس ارقىلى تەرروريزمنىڭ كەزەكتى ارەكەتىنە كۇا بولىپ وتىرمىز، ونىڭ ۇيىمداستىرۋشىلارى مەن دەمەۋشىلەرى انىقتالىپ، ءتيىستى جازالارىن تارتۋعا ءتيىس.
قازا بولعانداردىڭ وتباسىلارىنىڭ قايعىسىنا ورتاقتاسا وتىرىپ، جاراقات العاندارعا تەزىرەك جازىلىپ شىعۋىن، ال باۋىرلاس تۇركيانىڭ بيلىگىنە جانە حالقىنا تەرروريزممەن كۇرەستە كۇش-جىگەر، شىدامدىلىق پەن تاباندىلىق تىلەيمىز"،- دەپ مالىمدەمە جاسادى.