تەرروريستىك ۇيىم دەپ تانىلعان «يسلام مەملەكەتى» ۇيىمى جەتەكشىلەرىنىڭ ءبىرى لاۆدريم مۋحاكسەرى وزىنە باعىنىشتى 300-400 شاماسىنداعى سودىرلارمەن بىرگە ەۋروپا ەلدەرىندە بوي تاسالاپ ءجۇر،  دەپ حابارلايدى Qamshy.kz تاسس-قا سىلتەمە جاساپ.

ول سيريا اۋماعىنداعى انتيتەرروريستىك شابۋىلدار ۇدەگەننەن كەيىن ۇدەرە كوشكەن بوسقىندارمەن بىرگە كارى قۇرلىققا ءوتىپ كەتكەنى ايتىلۋدا. مۋحاكسەرىنىڭ بۇل قۋلىعى تۋرالى يتاليانىڭ بارلاۋ قىزمەتى دە حابارلاعان.

Daily Mail-دىڭ جازۋىنشا ل. مۋحاكسەرى سيرياعا 2012 جىلى كوسوۆادان بارعان. لاڭكەستەر اراسىندا ءابۋ ابدۋللا ال-كوسوۆا دەگەن لاقاپ اتقا يە. سودىرلار اراسىندا ول ءوز جەرلەستەرىنە باسشىلىق جاساپ قانا قويماي، ۇگىت-ناسيحات جۇمىستارىمەن دە بەلسەندى اينالىسقان. عالامتور ارقىلى تاراعان ۇگىت ماتەريالدارىندا دا مۋحاكسەرىنىڭ تۇتقىنداردى جازالاپ جاتقان ساتتەرى بەينەلەنگەن.

باسىلىم مۋحاكسەرىنىڭ بۇعان دەيىن 2013 جىلى دا كوسوۆاعا ءبىر بارىپ قايتقانىن، وندا سىبايلاسى ريدۆان حاكيفيمەن بىرلەسىپ سەرب پراۆوسلاۆ شىركەۋىندە جارىلىس جاساۋدى، يزرايل فۋتبول قۇراماسىنا شابۋىل جوسپارلاعانىن جازۋدا.