تۇركيا سىرتقى ىستەر ءمينيسترى ميەۆليۋت چاۆۋشوگلۋ سيريا پروبلەماسىن رەتتەۋگە ارنالعان كەلىسسوزدەر 23 قاڭتاردا استانادا وتەتىندىگىن ءمالىم ەتتى.
بۇعان دەيىن تۇرىك ءسىم باسشىسى رەسەي ساراپشىلارى سيريا بويىنشا كەلىسسوزدەرگە دايىندىق ماسەلەلەرىن تالقىلاۋ ءۇشىن 9-10 قاڭتاردا تۇركياعا كەلەتىندىگىن ءمالىم ەتكەن بولاتىن، دەپ جازدى رەسەيدىڭ جاڭالىقتار اقپارات اگەنتتىگى.
بۇعان دەيىن پرەزيدەنت پۋتين تۇرىك كوشباسشىسى تايىپ ەردوعانمەن سيريادا قاقتىعىسۋشى تاراپتارعا استانادا جاڭا الاڭدا بەيبىت كەلىسسوز ۇدەرىسىن جالعاستىرۋدى ۇسىنۋ جايلى ۋاعدالاسقانىن حابارلاعان. ونىڭ ايتۋىنشا، بۇل جەنيەۆا كەلىسسوزدەرىن تولىقتىرادى. قازاقستان پرەزيدەنتى نۇرسۇلتان نازاربايەۆ پۋتين جانە ەردوعانمەن تەلەفون ارقىلى سويلەسۋ بارىسىندا بۇل باستامانى قولداپ، قازاقستان ەلورداسىندا مۇنداي كەلىسسوزدەر جۇرگىزۋ ءۇشىن قاجەتتى جاعداي جاساۋعا دايىن ەكەنىن مالىمدەدى.(inform.kz)
ەو سيريا بويىنشا كەلىسسوزدىڭ استانادا ءوتۋىن قولدايدى
سيريا ماسەلەسى بويىنشا كەلىسسوزدىڭ استانادا ءوتۋىن ەۋرووداق قولدايدى. بۇل تۋرالى ەۋروپالىق وداقتىڭ سىرتقى ىستەر جانە قاۋىپسىزدىك ساياساتىنىڭ جوعارعى وكىلى فەدەريكا موگەريني مالىمدەدى. ەگەر سوعىستى توقتاتۋ كەلىسىمى ورىندالاتىن بولسا، بۇۇ قاۋىپسىزدىك كەڭەسى اياسىندا سيريانىڭ ىشكى ماسەلەسىن رەتتەۋگە جول اشىلادى، - دەيدى ەۋروپالىق ديپلومات. ەۋرووداق سيرياداعى قاقتىعىستاردى بەيبىت جولمەن شەشۋگە ۇمتىلاتىن كەز-كەلگەن حالىقارالىق قادامدى قولدايدى. ءبىز استاناداعى كەزدەسۋ سەكىلدى باستامالار وزگە تاراپتاردان دا بولعانىن قالايمىز. ول كەلىسسوزدەر جەمىستى اياقتالىپ، سيريانىڭ ىشكى ماسەلەسىنە قاتىستى بۇۇ اياسىندا جەنيەۆادا وتەتىن باسقوسۋعا اسەرىن تيگىزسە دەيمىز. ەۋرووداق ايماقتارمەن جۇمىس ىستەۋىن جالعاستىرا بەرەدى. ءبىز قاڭتار ايىنىڭ ورتاسىندا بريۋسسەلدە باس قوسىپ، سيريا قاقتىعىسىن شەشۋگە باعىتتالعان ەكىجاقتى كەلىسسوزدەر وتكىزۋدى جوسپارلاپ وتىرمىز، - دەيدى فەدەريكا موگەريني. (24.kz)
سيريا وپپوزيسياسى كەلىسسوزدىڭ استانادا وتۋىنە قارسى
بىرنەشە سيريالىق باسكوتەرۋشى توپ وكىلدەرى قازاقستاندا وتەتىن بەيبىت كونفەرەنسياعا قاتىسۋدان باس تارتاتىندىقتارىن ءمالىم ەتتى.
ولار اساد كۇشتەرىن سوعىستى توقتاتۋ رەجيمىن بۇزدى ايىپتاپ وتىر. مالىمدەمەدە كوتەرىلىسشىلەردىڭ تاتۋلاستىق شارتتارىن قاتاڭ ۇستانىپ وتىرعاندىعى ايتىلعان. الايدا، ۇكىمەت كۇشتەرى يراندىق وداقتاستارىنىڭ قولداۋىن پايدالانا وتىرىپ، دامسك، شىعىس گۋتا مەن ۆادي-بارادا القابىندا كەلىسىلگەن شارتتاردى بىرنەشە مارتە بۇزعان.
كوتەرىلىسشىلەر ەگەر اسادتىڭ كۇشتەرى تاتۋلاسۋ كەلىسىمىن پايدالانىپ، باسكوتەرۋشىلەردىڭ قاراماعىنداعى ايماقتاردى باسىپ الۋعا تىرىساتىن بولسا، وزدەرىنىڭ كەلىسىمنەن باس تارتاتىندىقتارىن مالىمدەدى.
بەيبىت كەلىسسوزدەر وسى ايدا استانادا باستالۋى قاجەت بولاتىن. 31 جەلتوقسان كۇنى بۇۇ-نىڭ قاۋىپسىزدىك كەڭەسى سيرياداعى سوعىستى توقتاتۋ مەن داماسكىنىڭ وپپوزيسيا وكىلدەرىمەن كەلىسسوزدەر جۇرگىزۋدى باستاۋ جونىندەگى رەسەي تاراپىنان دايىندالعان كەلىسىمدەردى قولداۋ تۋرالى رەزوليۋسيانى ءبىراۋىزدان قابىلدادى. رەزوليۋسيا ۇكىمەت پەن كوتەرىلىسشىلەر اراسىندا كەلىسسوزدەر جۇرگىزۋ جولىمەن قاقتىعىستى ساياسي تۇرعىدا رەتتەۋگە شاقىرادى. 30 جەلتوقساننىڭ تۇنىنەن باستاپ، تاتۋلاستىق تۋرالى كەلىسىم كۇشىنە ەندى.
الايدا كەلىسىمنىڭ رەسەي مەن وزگە دە مەملەكەتتەردە قىزمەتىنە تىيىم سالىنعان «يسلام مەملەكەتى»، «دجابحات فاتەح اش-شام» سياقتى كەيبىر توپتارعا ەشقانداي قاتىسى جوق.(naryk.kz)
