3 قاڭتاردا قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەسى قۇقىعىندا كەڭەستىڭ 2017 جىلعى ءبىرىنشى وتىرىسىنا قاتىستى. بۇل تۋرالى قر-نىڭ سىرتقى ىستەر مينيسترلىگى حابارلايدى.

وتىرىس بارىسىندا قاۋىپسىزدىك كەڭەسىنىڭ 2017 جىلعى قاڭتار ايىنا جۇمىس باعدارلاماسى بەكىتىلدى. وتاندىق دەلەگاسيانى قازاقستان رەسپۋبليكاسىنىڭ ۋاقىتشا سەنىمدى وكىلى بارلىباي سادىقوۆ ۇسىندى.

سول كۇنى قاۋىپسىزدىك كەڭەسىنىڭ مۇشەلەرى – اقش، بوليۆيا، جاپونيا، يتاليا، قازاقستان، جۇڭگو، مىسىر، رەسەي، سەنەگال، ۋكراينا، ۋرۋگۆاي، ۇلىبريتانيا، فرانسيا، شۆەسيا جانە ەفيوپيا جانە دەلەگاسيالار باسشىلارىنىڭ ءداستۇرلى كەزدەسۋى بولىپ ءوتتى. ءىس-شارا 2017 جىلعى قاڭتار ايىندا قك باسقاراتىن شۆەسيا كورولدىگىنىڭ ميسسياسىندا وسى ەلدىڭ تۇراقتى وكىلى ولاف سكۋگتىڭ توراعالىعىمەن ءوتتى.

بۇۇ قاۋىپسىزدىك كەڭەسى مۇشەلەرىنىڭ الدىندا سويلەگەن سوزىندە ب. سادىقوۆ وسى ورگاننىڭ جۇمىسىنداعى پريەۆەنتيۆتى ديپلوماتيا جانە سەنىم شارالارىن نىعايتۋ، يادرولىق قارۋدى تاراتپاۋ، داۋ-جانجالدى رەتتەۋ جانە حالىقارالىق تەرروريزمگە قارسى ارەكەت ەتۋ سياقتى قازاقستان ءۇشىن باسىمدىققا يە ماسەلەلەردى اتاپ ءوتتى. وسى مانماتىندە ول قازاقستان پرەزيدەنتى نۇرسۇلتان نازاربايەۆتىڭ وسىدان 25 جىل بۇرىن بۇۇ قابىرعاسىندا جاريالانعان ازياداعى ءوزارا ىقپالداستىق جانە سەنىم شارالارى جونىندەگى كەڭەستى شاقىرۋ تۋرالى باستاماسىنىڭ تابىستى ىسكە اسىرىلعاندىعىن جانە وسى ءۇنقاتىسۋ فورۋمىنىڭ ازيا قۇرلىعىندا قاۋىپسىزدىكتى نىعايتۋعا قوماقتى ۇلەس قوسىپ كەلە جاتقاندىعىن اتاپ ءوتتى. وتاندىق ديپلومات مەملەكەت باسشىسىمىزدىڭ «الەم. ءححى عاسىر» مانيفەسىنىڭ وزەكتىلىگىن اتاپ كورسەتە وتىرىپ، 2045 جىلى بۇۇ قۇرىلۋىنىڭ ءجۇز جىلدىعىنا يادرولىق قارۋسىز، سوعىسسىز جانە داۋ-جانجالسىز الەم قۇرۋعا بىرلەسىپ كۇش-جىگەر جۇمساۋدىڭ ماڭىزدىلىعىنا نازار اۋداردى.

4 قاڭتاردا سيرياداعى (ەلدەگى حيميالىق قارۋمەن بايلانىستى احۋال) جانە يراكتاعى (گۋمانيتارلىق اسپەكت) جاعداي بويىنشا كەڭەستىڭ جابىق كونسۋلتاسياسى بولادى.

ايدىڭ نەگىزگى ءىس-شارالارىنىڭ ءبىرى وسى جىلدىڭ 10 قاڭتارىنا جوسپارلانعان بۇۇ قك-نىڭ «داۋ-جانجالداردىڭ الدىن الۋ جانە بەيبىتشىلىكتى ساقتاۋ» تاقىرىبىنداعى جوعارى دەڭگەيلى اشىق پىكىرتالاستارى بولماق، ولاردىڭ بارىسىندا كەڭەس مۇشەلەرى وزدەرىنىڭ وسى سالاداعى باسىمدىقتارى مەن بۇۇ جاڭا باسشىلىعىنا قولداۋلارىن بىلدىرەدى دەپ كۇتىلۋدە. پىكىرتالاستارعا بۇۇ باس حاتشىسى انتونيۋ گۋتەرريش جانە قاۋىپسىزدىك كەڭەسىنە مۇشە مەملەكەتتەردىڭ سىرتقى ساياسي ۆەدومستۆولارىنىڭ ءبىرقاتار باسشىلارى، سونىڭ ىشىندە قازاقستاننىڭ سىرتقى ىستەر ءمينيسترى قايرات ءابدىراحمانوۆ قاتىسادى.

17 قاڭتاردا تۇراقتى وكىلدەر دەڭگەيىندە تاياۋ شىعىستاعى جاعداي، سونىڭ ىشىندە  پالەستينا ماسەلەسى بويىنشا توقسان سايىنعى ءداستۇرلى اشىق پىكىرتالاستار وتەدى.

قاۋىپسىزدىك كەڭەسىنىڭ شەشىمىنە سايكەس، جىلدىڭ العاشقى ايىندا بريفينگتەر مەن جابىق كونسۋلتاسيالار بارىسىندا يەمەن، كونگو دەموكراتيالىق رەسپۋبليكاسى، ورتالىق افريكا رەسپۋبليكاسى (وار)، سۋدان (سونىڭ ىشىندە دارفۋر جانە ابەي پروۆينسيالارىنداعى) جانە وڭتۇستىك سۋدان، باتىس افريكا جانە ساحەل، مالي، چاد، سومالي، كيپر، كولۋمبيا ەلدەرى مەن وڭىرلەرىندەگى احۋال، سونداي-اق يران يادرولىق باعدارلاماسى بويىنشا 2231 قارارىن ورىنداۋ ماسەلەلەرى تالقىلانادى.

قازاقستان توراعالىعىمەن سومالي مەن ەريترەيا جونىندەگى جانە تەرروريستىك توپتارمەن كۇرەس جونىندەگى بۇۇ قك كوميتەتتەرىنىڭ وتىرىستارى وتەدى.

2017 جىلعى قاڭتار ايىندا كيپردەگى جانە وار-داعى احۋال، سونداي-اق قك مۇشەلەرىنىڭ اراسىندا ءباتۋالاستىققا قول جەتكىزىلگەن جاعدايدا سيريا اراب رەسپۋبليكاسىنداعى حيميالىق قارۋمەن بايلانىستى احۋال بويىنشا قاۋىپسىزدىك كەڭەسىنىڭ جوسپارلى قارارلارىنىڭ قابىلدانۋى كۇتىلەدى.