كاسىبي حوسپيستە كومەك كورسەتۋ اسسوسياسياسى مەن قايىرىمدىلىق «ۆەرا» (سەنىم) قورى 2 جىل قاتارىنان دارىگەرلەر مەن مەيىربيكەلەرگە ارناپ كونفەرەنسيا ۇيىمداستىرىپ ءجۇر. بۇل جولى تىڭداۋشىلاردىڭ سانى وتكەن جىلمەن سالىستىرعان بەس ەسە كوپ بولدى. شۆەسيا، پولشا، يزرايل، گەرمانيانىڭ ماماندارى ءوز تاجىريبەسىمەن ءبولىستى. لينن حالاميش جاقىن ادامدارمەن قالاي قوشتاسىپ، مەديسينانىڭ مۇمكىندىگى جەتپەيتىن اۋرۋلارعا قالاي كومەكتەسۋ كەرەكتىگىن ايتىپ بەردى.
سوڭعى قوشتاسۋ سوزدەرى...
قوشتاسۋعا بەس سويلەمدى قولداۋنعا بولادى
- «كەشىر مەنى»
- «مەن سەنى كەشىردىم»
- «مەن سەنى جاقسى كورەمىن»
- «بارلىعىنا راقمەت»
- «قوش بول»
ەستەرىڭىزدە ساقتاڭىزدار باستاپقى ءۇش ءسوزدىڭ ولىمگە ەشقانداي قاتىسى جوق. مەن ول سوزدەردى بالالارىم مەن كۇيەۋىمە ءجيى ايتامىن. سىزدەر دە سولاي ىستەڭىزدەر. ەشكىش ءدام تۇزى قاشان تاۋسىلاتىنىن بىلمەيدى عوي. توتەنشە جاعدايعا تۇسكەن ادامدار بارىنەن دە جاقىندارىنا مەيرىمدىلىك تانىتىپ، جاقسى كورەتىندەرىن سيرەك ايتقانىنان وكىنەتىنىن ءجيى ەستيمىز.
ادامدار ءولىم اۋزىندا جاتقاندارمەن نەلىكتەن سويلەسۋگە قورقادى؟
جانى قينالعان جاننىڭ نەمەسە ءولىپ بارا جاتان ادامنىڭ كوزىنە قاراۋ قيىن. ءبىز كوزدەرىنە تىك قاراماۋعا تىرىسامىز. دارىگەر پالاتاعا كىرەدى دە امانداسىپ، قال جاعدايىن سۇرايدى. بۇل ۋاقىتتا ەمدەلۋشىنىڭ كوزىنە ەمەس، جاستىققا نەمەسە كورپەگە قاراپ تۇرادى. مەيىربيكەلەردە ءدال سولاي. ءتىپتى تۋىستارىنىڭ ءوزى دە ءولىم اۋزىندا جاتقان اداممەن وڭاشا قالماۋى ءۇشىن ەكى-ەكىدەن كەلەدى نەمەسە پالاتاعا كىرە سالا گازەت وقي باستايدى.
ءبىز كوزگە قاراۋ ارقىلى ادامدى ەلەپ تۇرعانىن بىلدىرەمىز. اۋرۋ اداممەن ونداي بايلانىس بولماسا، ولار ءۇشىن بۇل الەۋمەتتىك ولىممەن تەڭ.
ءولىم سەبەپتەرى جايلى...
اۋىرىپ جاتقان اداممەن جانە ولاردىڭ تۋىستارىمەن مىندەتتى تۇردە اۋرۋىنىڭ سەبەبى جايلى سويلەسۋ كەرەك. سەبەبى كوپ جاعدايدا ادامدار ومىردە بىردەڭكەنى دۇرىس ىستەمەگەنى ءۇشىن جازامدى الىپ جاتىرمىن دەپ ويلايدى. مەن بالالاردان «قالاي اۋىرىپ قالدىڭ؟» دەپ سۇراعاندا، كوبىنە «مۇمكىن مەن جامان بالا بولعاننان كەيىن شىعار» دەگەن جاۋاپ ەستيمىن. مۇنداي جاعدايدا مەن جاي عانا «مۇمكىن سەن جامان بالا بولعان شىعارسىڭ. ءبىراق بۇل سەنىڭ اۋرۋىڭا ەشقانداي قاتىسى جوق» دەپ جاۋاپ بەرەمىن.
اۋرۋ بالالار «نەلىكتەن مەن؟» دەگەن سۇراق قويمايدى. ولار وزبەتىنشە جاۋاپ تابادى. مەن ءولىم اۋزىندا جاتقان 16 جاسار بالامەن سويلەستىم. «مەن وتكەن ومىرىمدە جامان ىستەر ىستەدىم. سوندىقتان قازىرگى ومىرىمدە سونىڭ جازاسىن الىپ جاتىرمىن. الايدا ەندىگى ءومىرىم كەرەمەت وتەدى» دەگەنى ەسىمدە. مۇنداي جاۋاپتى ەستىگەندە ونىمەن تايتالاسۋدىڭ قاجەتى جوق. سەبەبى بۇل ونىڭ ىشكى ويى، تۇيسىگى.
جاعىمسىز جاڭالىق جايىندا...
دارىگەرلەر "ەمدەلۋشىنىڭ وتباسى وعان دياگنوزى تۋرالى ايتۋعا رۇقسات بەرمەسە نە ىستەۋ كەرەك؟" دەگەن ساۋالدى ءجيى قويادى. ءبىرىنشى تۋىسقاندارىنا ما، الدە وزىنە ايتۋ كەرەك پە؟ دارىگەردىڭ مورالدى مىندەتتەرى بار. تاعدىر دا، ءومىر دە ەمدەلۋشىنىكى ەكەنىن ءتۇسىنۋىمىز كەرەك. كەرىسىنشە اۋىرىپ جاتقان ادام ءوز ىسىنە جاۋاپ بەرە الاتىنداي جاعدايدا بولسا، دياگنوزى تۋرالى تۋىستارىنا ايتۋ كەرەكتىگىن ەمدەلۋشىدەن سۇراۋىمىز قاجەت. ەشقاشان ەمدەلۋشىنى الداماڭدار، ولارعا جوعارىدان قاراماڭدار. ول شەشىم قابىلداي الاتىن ەرەسەك ادام ەكەنىن ەستەن شىعارماۋ كەرەك.
جامان جاڭالىققا ۇنەمى تەك قارسىلىق بولمايدى. ەگەر ادام ۇزاق ۋاقىت بويى حوسپيستە جاتسا، جان-جاعىندا نە بولىپ جاتقانىنا ءمان بەرۋدەن قالادى. ونىڭ وتباسى دا شارشايدى. ولار جاقىنىنىڭ قينالىپ وتكەن ءومىرى ۇزىلگەندە ولار دا جەڭىلدەگەندەي بولادى. ءبىراق ول ءۇشىن تۋىستارىن جازعىرۋدىڭ قاجەتى جوق. سەبەبى ودان كەيىن اۋىرلىق سەزىمى كەلەدى. ءبىز ول ادامداردىڭ ەسىن جيناۋىنا كومەكتەسۋىمىز كەرەك.
دەرەككوز: lenta.ru
اۋدارعان: اسەم المۇحانبەت
