ىستامبۇلداعى لاڭكەستىك ارەكەتكە قاتىسى بار دەپ جالعان ايىپتالعان قىرعىزستان ازاماتى ياحە ماشراپوۆ تۇرىك ب ا ق وكىلدەرىنە سوتقا جۇگىنبەيتىنىن ايتىپ، ءبىراق جۋرناليستەردەن بۇل مالىمەتتى تەرىسكە شىعارۋىن تالاپ ەتتى.
ياحە ماشراپوۆتىڭ ايتۋىنشا، تەلەديداردى قوسىپ، گازەتتى وقىعان ونىڭ تۋىستارى قاتتى قورقىپ كەتكەن. قىرعىزستان كاسىپكەرى تۇركياعا ۇنەمى تاۋار الۋ ءۇشىن كەلىپ تۇرادى ەكەن. وتانىندا كيىم ساتۋمەن اينالىسادى.
جۋرناليستەر ءوز ءتولقۇجاتىن كورسەتىپ، ونى تەرروريست دەپ اتاعانىن ماشراپوۆقا قايران قالعان دوستارى حابارلاعان.
ياحە ماشراپوۆ: «ولار ينتەرنەتتەن مەنىڭ ءتولقۇجاتىمنىڭ سۋرەتىن كورىپ، ماعان تاڭ قالىپ حابارلاستى. ويتكەنى لاڭكەستىك بولعان كۇنى ءبىز ءبارىمىز بىرگە مەرەكەلىك ۇستەل باسىنا جينالىپ، پالاۋ جەگەن بولاتىنبىز».
كاسىپكەر «ينتەرفاكسكە» بەرگەن سۇحباتىندا ونىڭ قاماۋعا الىنۋى مەن تەرگەۋ بارىسىن ەگجەي-تەگجەيلى ايتىپ بەردى.
ياحە ماشراپوۆ: «تۇرىك مەديا وكىلدەرى ءتولقۇجاتىمنىڭ سۋرەتىن تاراتىپ، مەنى لاڭكەستىك ارەكەتكە قاتىسى بار دەپ ايىپتادى. ەش دالەلسىز قالاي ولاي ايتۋعا بولادى؟ تۇرىك پوليسياسى مەنى تەرگەپ، ەشقانداي تەراكتىگە قاتىسىم جوق ەكەنىن انىقتادى. 1 قاڭتار كۇنى جاڭا جىلدى تۋىستارىم مەن دوستارىممەن تويلاپ، 1 قاڭتار كۇنى ىستامبۇلعا ۇشىپ كەلدىم، تاۋار الىپ بولعان سوڭ، 3 قاڭتار كۇنى قايتادان ۇشىپ كەتتىم. 3 قاڭتار كۇنى ۇشاققا وتىرعانىمدا، سالوندا ەكى كىسى جاقىنداپ، تولقۇجاتىممەن بىرگە شىعۋىمدى ءوتىندى. ۇشاقتان شىققانىمدا، 20 شاقتى ادامدى كوردىم، اراسىندا پوليسەيلەرمەن قاتار ازاماتتىق كيىمدەگى ادامدار دا بولدى. ولار مەنىڭ ءتولقۇجاتىمدى تەكسەرىپ، تەرگەي باستادى. كەيىننەن كەشىرىم سۇراپ، قايتادان ۇشاققا وتىرعىزدى. سودان كەيىن ءبىر ساعات كەشىگىپ، ستامبۇلدان بىشكەككە ۇشىپ كەتتىك».
Reina كلۋبىنا جاڭا جىل تۇنىندە شابۋىل جاسالعان بولاتىن. قارۋلانعان قىلمىسكەر اۆتوماتتان وق جاۋدىرىپ، سالدارىنان 39 ادام قازا تاپتى. ودان بولەك 70 ادام جارالاندى. پوليسەيلەردە كۇدىكتى قىلمىسكەردىڭ فوتوروبوتى جانە بىرنەشە ۆيدەوجازبالار بار. بۇگىن تۇركيانىڭ ءسىم پوليسياعا بۇلىكشىنىڭ كىم ەكەنى انىقتالدى دەپ حابارلادى. سونداي-اق، يگيل-دىڭ بەس بۇلىكشىسى ۇستالدى. وعان قوسا، ب ا ق وكىلدەرى حابارلاعانداي، تەراكتقا قاتىسى بار دەپ 23-تەن 40 ادامعا دەيىن ۇستالعان.
پىكىر قالدىرۋ