"ءبىرىڭعاي جيناقتاۋشى زەينەتاقى قورى" اكسيونەرلىك قوعامى باسشىلىعى تۇتقىندالدى، دەپ حابارلايدى "قامشى" پورتالى Tengrinews.kz-كە سىلتەمە جاساپ.
"ولار جاڭا جىلدىڭ الدىندا قاماۋعا الىنعان. اتى-جوندەرىن بىلمەيمىن، ءبىز ولاردى اتامادىق. جەتەكشى مەن ورىنباسارلارىنىڭ ءبىرى قاماۋعا الىنعان"، - دەدى ق ر ۇلتتىق بانكىنىڭ قارجى قىزمەتتەرى تۇتىنۋشىلارىنىڭ قۇقىعىن قورعاۋ دەپارتامەنتىنىڭ ديرەكتورى الەكساندر تەرەنتيەۆ.
ايتا كەتەيىك، تەرەنتيەۆ 6 قاڭتارداعى باسپا ءسوز ءماسليحاتىندا بجزق-عا قاتىستى قىلمىستىق ءىستىڭ ۇلتتىق بانكتىڭ وتىنىشىنەن كەيىن قوزعالعانىن مالىمدەگەن.
ەسكە سالايىق، 2016 جىلدىڭ 21 جەلتوقسانىنان باستاپ ق ر ۇلتتىق بانكىنىڭ قاتىسۋىمەن "ءبىرىڭعاي جيناقتاۋشى زەينەتاقى قورى" اكسيونەرلىك قوعامىنىڭ قىزمەتىنە تەكسەرىس جۇرگىزىلگەن بولاتىن. سول كەزدە تەكسەرىستىڭ بجزق اكسيونەرلىك قوعامىنىڭ مەنشىكتى اكتيۆتەردى ينۆەستيسيالاۋعا قاتىستى جاسالعان وپەراسيالارى بويىنشا جۇزەگە اسىرىلىپ جاتقانى ايتىلعان ەدى. "بجزق" اق-تىڭ مەنشىكتى اكتيۆتەرى ونىڭ كاپيتالى جانە شارۋاشىلىق قىزمەتىنىڭ ناتيجەلەرى ەسەبىنەن قالىپتاستىرىلادى ەكەن. "بجزق" اق مەنشىكتى اكتيۆتەردى دەربەس باسقارادى"، - دەگەن ەدى بانكتەگىلەر.
"ازاماتتاردىڭ زەينەتاقى جيناقتارى "بجزق" اق-تىڭ بالانسىنان بولىنگەن جانە بولەك ەسكەرىلەدى. ۇلتتىق بانك زەينەتاقى جيناقتارىن ينۆەستيسيالاۋدى قازاقستان رەسپۋبليكاسىنىڭ ۇلتتىق قورىن باسقارۋ جونىندەگى كەڭەس ماقۇلداعان 2016 جىلعا ارنالعان باعىتتار بويىنشا عانا جۇزەگە اسىرادى. بۇل رەتتە 2016 جىلى زەينەتاقى اكتيۆتەرىن ەكونوميكانىڭ ناقتى سەكتورىنىڭ جەكە كومپانيالارىنىڭ قارجى قۇرالدارىنا ينۆەستيسيالاۋ كوزدەلمەيدى"، - دەلىنگەن ەدى ۇب حابارلامادا.
ال، Kapital.kz جازۋىنشا، ۇستالعاندار بجزق-نىڭ باسقارما ءتوراعاسى رۋسلان ەردەنايەۆ جانە ونىڭ ءبىر ورىنباسارى بولعان.
