كەشە، «قامشى» پورتالىندا «قۇران اقىسىن قۇداي اتىنان تالاپ كەتكەن يمام قۇل ەكەنىن ۇمىتتى» اتتى ماتەريال جاريالانعان بولاتىن.
گانيۋشكين سەلوسىنداعى «تەمىرالى» مەشىتىنىڭ ءدىني قىزمەتكەرىنە قاتىستى ماتەريالدا يمام مەن ونى شاقىرعان اس يەسىنىڭ جازىسقان سكرينشوتى جاريالانعان ەدى. وندا قۇرمانعازى اۋدانى گانيۋشكين سەلوسىنداعى مەشىتتىڭ يمامى دەلىنگەن ادامنىڭ اسقا بارىپ، اقشا الا الماعانى، سوسىن اس يەسىنە مەسسەندجەر ارقىلى اۋىر ءسوز جازىپ، قۇراندى بۇلداعانى كورىنەدى. بۇل ءوز كەزەگىندە الەۋمەتتىك جەلىدە قاتتى تالقىلاندى.
«قامشى» پورتالىنا وسى ماسەلەگە بايلانىستى اتىراۋ وبلىسىنىڭ تۇرعىندارىنىڭ بىرىنەن ارناۋلى حات كەلىپ ءتۇستى. ءاتى-جونىن جاريالاماۋدى وتىنگەن ازامات اتالعان وقيعا بويىنشا ءوز تۇسىنىكتەمەسىن بەرە كەلە، اس يەسىنە بۇلاي حات جازعان ادامنىڭ بەكىتىلگەن يمام ەمەس ەكەنىن، يمام جوق كەزدە ورنىنا قىزمەت ەتەتىندەردىڭ ءبىرى ەكەنىن باياندادى. سونداي-اق، وسى ماسەلەنىڭ يسلام دىنىنە كولەڭكە تۇسىرە المايتىنىن ايتتى. حات يەسى مۇسىلمان قاۋىمدى اتالعان ماسەلەنى دابىرا قىلماي، ءتۇرلى ءدىني الاۋىزدىق ءورشىپ تۇرعان زاماندا بەرەكە-بىرلىكتە بولۋعا شاقىردى.
