قازاقستانداعى ۇلتتىق قاۋىپسىزدىك كوميتەتىنىڭ بۇرىنعى ءتوراعاسى نارتاي دۇتبايەۆتىڭ ۇستالىپ، قاماۋعا الىنۋى، تاياۋدا ورنىنان تايدىرىلعان مينيستر ق. بىشىمبايەۆتىڭ ۇستىنەن تەرگەۋدىڭ ءجۇرىپ جاتۋى، كەزىندە «ەكىنشى بەريا» اتالعان اسلان ءمۋسيننىڭ ەلشىلىكتەن بىردەن زەينەتكە كەتىرىلۋى، زەينەتكەرلەر قورىنىڭ باسشىسى ر. ەردانايەۆتىڭ اقشا جەپ قاماۋعا الىنۋى، ت.ب. شەنەۋنىكتەردىڭ ءجيى پارامەن ۇستالىپ جاتۋى، «تىركەۋ» تۋرالى زاڭنىڭ اياعىنىڭ كۇن وتكەن سايىن ۇلكەن ايعايعا ۇلاسا باستاۋى، بىرەۋلەردىڭ اشىقتان-اشىق استانا جەزوكشەلەرىن باي قىتايلارعا ساۋدالاماق بولۋ ارەكەتى، ورتا ءبىلىم بەرەتىن مەكتەپتەرگە زورلاپ ەنگىزىلگەن «ءۇش تىلدىلىك»، ت.ب. قوعامداعى تۇيتكىلدەر قوردالانىپ كەلىپ، ەلدى جايلاعان ەكونوميكالىق داعدارىستىڭ سوڭى ۇلكەن ساياسي داعدارىسقا اپارىپ سوقپاي ما دەگەن دە كۇدىك جوق ەمەس.

وسى ارادا باسىن اشىپ الاتىن ءبىر نارسە، حالىقتى وزدەرىنە اشىق قارسى قويىپ وتىرعانداردىڭ ءوزىنىڭ تەك بيلىك تاراپىنان بولىپ وتىرۋى - تاعى دا تاعى دا امالسىز ويعا قالدىرادى. سوندا بۇل ارانداتۋشى بيلىك وكىلدەرى اشىقتان اشىق قازىرگى پرەزيدەنت ن. نازاربايەۆقا اشىق قارسى شىعىپ وتىرعانداي اسەر ەتەدى. سونىمەن بيلىكتىڭ جوعارى ەشەلونىندا تاق تالاسى مەن ب ا ق تالاسى باستالىپ كەتكەن جوق پا دەگەن كۇدىك قىلاڭ بەرەدى.

ونىڭ ۇستىنە ءدال وسى تۇستا مۇحتار ءابىلازوۆتىڭ فرانسيا اباقتىسىنان بوساپ شىعىپ، بىزدەگى ساياسي جۇيەگە اشىقتان اشىق قارسى شىعىپ، كۇن سايىن ءارتۇرلى دەڭگەيدەگى ساياسي اقپاراتتار تاراتۋى، ونسىز دا ىشتەرىنەن ازەر تىنىپ جۇرگەن حالىقتار اراسىنا، اسىرەسە، ءوز وتانىندا وگەي بالانىڭ كۇيىن كەشىپ وتىرعان وسى مەملەكەتتى قۇرۋشى قازاق ۇلتىنىڭ اراسىنا ۇلكەن ءبىر دۇربەلەڭ اكەلمەي مە دەگەن دە كۇدىك جوق ەمەس.

الەمدىك ساياسي اقۋالدىڭ كۇردەلەنۋى، ءبىزدىڭ بيلىككە ۇنەمى «اكەلىك قامقورلىق» جاساپ كەلگەن جانە شەتەل تاراپىنان ءارتۇرلى ەكونوميكالىق سانكسيالارعا ۇشىراعان رەسەيدىڭ ءوزىنىڭ ەكونوميكالىق جاعدايىنىڭ كۇن سايىن ناشارلاۋى، اقش-قا سان قۇبىلعان ترامپتىڭ پرەزيدەنت بولىپ كەلۋى، ۋشىعىپ تۇرعان سيريا مەن ۋكراينا جاعدايى دا ءتۇپتىڭ ءتۇبى قازاقستانداعى ساياسي اقۋالعا ءوز اسەرىن تيگىزبەي قويمايتىن سياقتى ما، قالاي؟ ۇلت بايلىعىن ۇرلاۋمەن، توناۋمەن، ولارىن ۇنەمى شەتەل اسىرۋمەن كەلگەن، شەتەلدەردەگى قاپتاعان وففشورلارعا جۇزدەگەن ميللياردتاعان دوللارلار جاسىرعان ناعىز قازاقستاندىق ەليتانىڭ دا تاعدىرى قىل ۇستىندە تۇرعانداي اسەر ەتەدى... ەندى ولار قيت ەتسە، ۇرلاعاندارىن شەتەل اسىرىپ، وزدەرى ارتىنان قاشىپ بارىپ، جاسىرىنا قوياتىن ول قۋلىقتارىنىڭ دا بولاشاعى سەنىمسىز ءارى بۇلدىر بولايىن دەگەندەي مە، قالاي؟

09.01.2017 جىل.