بەكبولات اعانى ونەرگە قايتىپ كەلدى دەپ نەگە شۋلاپ جاتىرسىزدار؟ 2009 جىلى استانادا، سول كەزدەگى پرەمەر كارىم كوكەمىزدەن باستاپ، ۇكىمەت مۇشەلەرىنىڭ كوپشىلىگى تاپجىلماي وتىرىپ تاماشالاعان "ەلىم مەنىڭ" كونسەرتىن كورمەگەنسىزدەر-اۋ. يۋتۋبتا بار. سوسىن 2011 جىلى تاۋەلسىزدىكتىڭ 20 جىلدىعىنا ارناپ كونگرەسس-حوللدا زالدى لىق تولتىرىپ تاعى ءبىر كونسەرت بەرگەنى ەستە. 2014-تە جۇڭگو قازاقتارىنا ارنايى كەش وتكىزىپ قايتتى. ول دا جەلىدە ءجۇر. ازىرەت سۇلتان مەشىتى تەرمە بايگەسىن وتكىزگەندە، قاتەلەسپەسەم، 2012 جىلى، بەكبولات اعانىڭ قاجىلىقتان كەلگەن كەزى بولسا كەرەك، تىقىر شاشپەن، باسىنا تاقيا كيىپ شىققانىن كوردىك ساحناعا. ونەردى حارام دەگەن ادام ولاي ەتپەسە كەرەك ەدى. جىل سايىن تاۋەلسىزدىك مەرەكەسىنە ارنالعان ۇلكەن سالتاناتتى جيىندا ءان شىرقاپ جۇرگەنىن بىلاي قويعاندا، ەكى-ۇش جىل ىلگەرىدە “جۇلدىزدار وتباسى” ۇيىمداستىرعان جىل ءانى كونسەرتىندە ءان شىرقادى. استانا مەن الماتىداعى، ايماقتارداعى ءجيى ۇيىمداستىرىلىپ تۇراتىن كەزدەسۋلەرىنىڭ سوڭى كىشىگىرىم كونسەرتكە ۇلاسىپ جاتاتىنىن سول كەشتەرگە كەلگەن جاستار جاقسى بىلسە كەرەك. توي-تومالاقتاردا قولقالاعان اعايىننىڭ كوڭىلىن قالدىرعان كەزىن كورمەدىك، قوناق كادەسىن ۇسىنىپ، ايماق-ايماقتىڭ جىرلارىنان اسسورتي جاساپ شاشۋىن شاشىپ كەتىپ جۇرگەنىنە ءبىر ەمەس، بىرنەشە رەت كۋا بولعان جايىمىز بار. الىپقاشپا اڭگىمە تۋدىرىپ جاتقان اعايىننىڭ رەنىشى “جىلتىڭداپ ەفيرگە شىعا بەرمەدى” ءراپاتتى بولسا، ونىڭ جاۋابى دىندەگى ەمەس، ونەردەگى ۇستانىمىندا، قىزمەتتەگى مۇمكىندىگىندە جاتسا كەرەك دەپ توپشىلايمىن ءوز باسىم. 
قايتىپ كەلدى دەپ كەتكەن ادامعا عانا قاراتا ايتىلاتىنىن ەسكەرسەك، تىلەۋحان ونەرگە قايتىپ كەلگەن جوق. ول سوندا ءجۇر.