سوت رەسەيدىڭ بۇرىنعى ەكونوميكالىق دامۋ ءمينيسترى الەكسەي ۋليۋكايەۆقا تيەسىلى بولعان 564 ملن رۋبل مەن 15 جىلجىمايتىن مۇلكىنە ارەست سالىندى. بۇل تۋرالى «كوممەرسانتقا» بەرگەن سۇحباتىندا رەسەيدىڭ تەرگەۋ كوميتەتى باسشىسىنىڭ ورىنباسارى يگور كراسنوۆ ايتتى.

2016 جىلدىڭ جەلتوقسان ايىنىڭ ورتاسىندا سوت سمولەنسك وبلىسىنداعى ۋليۋكايەۆتىڭ ءۇيى مەن 10 سوتتىق جەرىنە ارەست سالىنعان بولاتىن.

ءقازىر بۇرىنعى ەكونوميكالىق دامۋ ءمينيسترى ءۇي قاماعىندا وتىر. ەستەرىڭىزگە سالا كەتەيىك، رەسەيدىڭ ەكونوميكالىق دامۋ ءمينيسترى الەكسەي ۋليۋكايەۆ «2 ميلليون دوللارعا جۋىق پارا الدى» دەگەن ايىپپەن تۇتقىندالعان بولاتىن.

سەيسەنبى كۇنى 10 قاڭتاردا ماسكەۋ سوتى بۇرىنعى ءمينيستردىڭ ءۇي قاماعىنىڭ مەرزىمىن 15 ساۋىرگە دەيىن ۇزارتتى.

تەرگەۋ وكىلدەرى سوتتا ەكونوميكالىق دامۋ مينيسترلىگى مەن مۇلىكتى باسقارۋ جونىندەگى قىزمەتكەرلەرى ۋليۋكايەۆقا قارسى كۋالىك بەردى.

بۇرىنعى ءمينيستردىڭ ءوزى كەتىپ قالماۋ جونىندە قولقات ارقىلى بوساتۋىن سۇراپ وتىر. ول كۋاگەرلەردى قورقىتپايتىنىن، پاسپورتتى الىپ قويعاندىقتان ەشقايدا كەتە المايتىنىن ايتتى.

دەگەنمەن سوت ءۇي قاماعانىڭ مەرزىمىن ۇزارتتى. ۋليۋكايەۆ سوتتان بالالارىن كورۋگە، ولارمەن ءۇيدىڭ ماڭىندا سەرۋەندەۋگە رۇقسات بەرۋىن سۇراعان بولاتىن. ءبىراق سوت قابىلدامادى.

رەسەي فەدەرالدىق تەرگەۋ كوميتەتىنىڭ حابارلاۋىنشا، ۋليۋكايەۆ فەدەرالدىق قاۋىپسىزدىك قىزمەتىنىڭ (نەمەسە فسب) كەشەندى تەرگەۋ شارالارىنىڭ ناتيجەسىندە ۇستالعان.  تەرگەۋ كوميتەتىنىڭ حابارلاماسىندا ۋليۋكايەۆ ەكونوميكالىق دامۋ مينيسترلىگىنىڭ روسنەفت كومپانياسىنا باشنەفت كومپانياسىنىڭ 50 پايىز اكسياسىن يەلەنۋىنە وڭ باعا بەرگەنى ءۇشىن ەكى ميلليون دوللار پارا العانى ايتىلادى. كرەملدىڭ باسپا ءسوز حاتشىسى دميتريي پەسكوۆ اتالعان ايىپتاۋدىڭ بۇلتارتپاس دالەلدەر نەگىزىندە قويىلعانىن سويلەدى. الەكسەي ۋليۋكايەۆ رەسەيدە 1991 جىلدان بەرى تۇتقىندالعان جوعارعى شەندى مەملەكەتتىك قىزمەتكەرلەردىڭ ەڭ ۇلكەنى بولىپ وتىر. ونىڭ ايىبى سوتتا دالەلدەنسە 15 جىلعا باس بوستاندىعىنان ايىرىلۋى مۇمكىن.