استانادا ق ر ينۆەستيسيالار جانە دامۋ مينيسترلىگى قىزمەتكەرلەرى اراسىندا قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان سپارتاكيادا اشىلدى.

«نۇر وتان» پارتياسى «بىرلىك» فيليالىنىڭ «دامۋ» باستاۋىش پارتيا ۇيىمى مۇرىندىق بولعان سپورت سايىسىنا مەملەكەتتىك ورگانداردىڭ قۇرىلىمدىق بولىمشەلەرىنىڭ قىزمەتكەرلەرى قاتىسۋدا. ەكى اپتا بويى مەملەكەتتىك قىزمەتكەرلەر سپورتتىڭ التى تۇرىنەن – شاعىن-فۋتبول، ۆولەيبول، ۇستەل تەننيسى، توعىزقۇمالاق جانە ارمرەستلينگتەن جەڭىمپازداردى انىقتايدى.

«سپارتاكيادانى وتكىزۋدەگى باستى ماقسات – دەنە شىنىقتىرۋ مەن سپورتتى ناسيحاتتاۋ. سونداي-اق، قىزمەتكەرلەرىمىزدىڭ دەنساۋلىعىن نىعايتىپ، جاقسى دەمالۋىنا جاعداي جاساۋ. ءبىز ءاردايىم بيىك مەجەلەردى كوزدەپ، ماقساتتارعا قول جەتكىزۋگە تىرىسامىز. وسىنداي سپورتتىق شارالار ارقىلى ءار ازاماتتىڭ الەۋەتىن نىعايتىپ، بولاشاققا دەگەن سەنىمىن كۇشەيتۋدى جانە قاراپايىم ادامي قاسيەتتەردى دارىپتەۋدى كوزدەپ وتىرمىز»-دەپ اتاپ ءوتتى، سپارتاكيادانىڭ اشىلۋىندا مينيسترلىكتىڭ جاۋاپتى حاتشىسى زامير ساعىنوۆ.

شاعىن-فۋتبولدان وتكەن العاشقى ماچ پەن توعىزقۇمالاق باسەكەسى سپارتاكياداعا قاتىسۋشىلاردىڭ جەڭىسكە دەگەن ۇمتىلىسى كاسىبي سپورتشىلاردان ەش كەم تۇسپەيتىنىن كورسەتتى. جارىسقا قاتىسام دەۋشىلەرگە ەشقانداي شەكتەۋ جوق.

توعىزقۇمالاقتان وتكەن سايىستا اۆتوكولىك جولدارى كوميتەتىنىڭ قىزمەتكەرى ايگۇل شەگەبايەۆا جەڭىمپاز اتانسا، ەكىنشى ورىنعا كولىك كوميتەتىنىڭ وكىلى ەركەبۇلان بايبولوۆ، ءۇشىنشى ورىنعا گەولوگيا جانە جەر قويناۋىن پايدالانۋ كوميتەتىنىڭ قىزمەتكەرى نۇرسۇلتان بورانباي ۇلى يە بولدى. شاعىن-فۋتبولدان فينالدىق ماچتا يندۋستريالدىق دامۋ جانە ونەركاسىپتىك قاۋىپسىزدىك كوميتەتى كومانداسىن ۇتقان مينيسترلىكتىڭ ورتالىق اپپاراتىنىڭ ۇجىمى جەڭىمپاز اتاندى. ءۇشىنشى ورىن – كولىك كوميتەتىنىڭ كومانداسىنا بۇيىردى. سپورتتىڭ باسقا تۇرلەرىنەن وتەتىن جارىستار كەلەسى دەمالىس كۇندەرى جالعاسادى.