«قامشى» پورتالىنا قىتايدان الىمبەك نۇعىمان(ءاتى-جونى وزگەرتىلىپ الىندى) ەسىمدى ەتنيكالىق قازاق حابارلاستى. ول گۋان دجوۋ قالاسىندا تۇرادى. كاسىپكەرلىكپەن اينالىساتىن الىمبەك ءوز باسىنداعى ماسەلەسىن بىلاي دەپ تۇسىندىرەدى:

«بۇل حاتتى جازا وتىرىپ، ءبىر ەمەس ءجيى قايتالانا بەرگەن قىتايدىڭ ءجونسىز تەكسەرىستەرىنە شاعىمدانامىن. رەسەيدەگى كليەنتتەرىمنىڭ تاپسىرىسىمەن شاندۇڭ قالاسىنا بارعانمىن. ۇشاقپەن جەتىپ، ارى قاراي جۇردەك پويىزبەن ونەركاسىپتىك قالالاردى ارالادىم. سوندا مەنى ءاربىر اۋەجايدا، ءار ءبىر پويىز بەكەتىندە «شىڭجاڭنىڭ قازاعى» دەپ تەرگەدى. پاسپورتىم، قۇجاتىم ءبارى دۇرىس بولسا دا، جوعارى جاقتان بۇيرىق بار دەپ تەكسەرە بەرەدى. ولارعا «مەن دە سەندەرمەن تەڭ قۇقىلى جۇڭگو ازاماتىمىن، نەگە تەكسەرە بەرەسىڭدەر» دەسەم دە سەبەبىن تۇسىندىرمەيدى. جوعارى جاعىنىڭ بۇيرىعىمەن دە تانىستىرمايدى.

كۇنى كەشە عانا، 3 كۇننىڭ الدىندا كەشقۇرىم ينتەرنەت كلۋبتا وتىرعانمىن. 8 جۇڭگو كەلدى دە جەكە كۋالىگىمدى تەكسەرىپ، سەبەبىن ايتپاستان پوليسيا بولىمشەسىنە الىپ كەتىپ، تاڭعى 8-گە دەيىن قاماۋدا ۇستادى. «مال ۇرلاپ، كىسى ولتىرگەن» ايىبىم بولماسا دا سۋرەتكە ءتۇسىرىپ، بارماق ءىزىمدى كۇشپەن الدى. تەلەفونىمدى الىپ، تۇگەل اقتارىپ، ولاردىڭ زاڭسىز تەكسەرىسىن ءتۇسىرىپ العان سۋرەتتەرىم مەن بەينەجازبانى ءوشىرىپ تاستادى. بۇل جاعداي مەنىڭ عانا باسىمدا ەمەس، شىڭجاڭنان، ىشكى مونعولدان بارعان ۇلتى جۇڭگو ەمەس جۇڭگو ازاماتتارىنىڭ ءبارىنىڭ باسىنا كەلىپ جاتىر. بارىمىزگە دە تەرروريست سياقتى قارايدى. بۇل قىتايدا دارىپتەلەتىن «56 ۇلتتىڭ بۇزىلماس ىنتىماعىنا» قىتايلاردىڭ ءوز قولىمەن سىزات ءتۇسىرىپ وتىرعانىنىڭ ايعاعى. مەن قازاقتىڭ بالاسى رەتىندە قازاقستان بيلىگىنەن، پرەزيدەنتىنەن شەتەلدەگى قانداستارعا اراشا بولسا دەپ سۇرايمىن. ءپۋتيننىڭ ۋكرايناداعى ورىستارعا اراشا تۇسكەنى سياقتى ءبىزدى دە قولداسا دەيمىن. وسى ماسەلەنى قازاقستانداعى بارلىق اقپارات قۇرالدارىنا، 12 ميلليون قانداس باۋىرلارىما ايتامىن.

قىتايدا قىتايلار وزدەرىنەن باسقا ۇلت ازاماتتارىن ادام قاتارىنا قوسپاي وتىر. ءبىز ەشقانداي قىلمىس ىستەمەسەك تە، ادال كاسىپپەن شۇعىلدانىپ جۇرسەك تە بىتپەيتىن تەكسەرىس جاساي بەرەدى. ءبىز دە زاڭدى جۇڭگو قالاي بىلەدى، سول دەڭگەيدە بىلەمىز عوي. قۇقىعىمىزدى قورعاي الامىز. ءبىز، ياعني ۇلتى جۇڭگو ەمەس ۇلتتار قىتايدىڭ شىعىسىنداعى، تەڭىز جاعالاۋىنداعى قالالاردا ەركىن ءجۇرىپ تۇرا المايمىز.  باتىس وڭىرگە قاراعاندا دامىعان شىعىس جۇڭگو بىزگە جابىق. ال، قىتايلار شىڭجاڭعا الشاڭداپ كىرەدى. ەشقانداي قۇجاتسىز شىڭجاڭدا جۇرەدى، ءتىپتى قۇجاتسىز ۇشاققا بيلەت العانداردى دا كوردىم.

قوناقۇيگە جاتساق تۇنگى ۇشتە كەلىپ تەكسەرەدى تۇرعىزىپ الىپ. قارسىلىق كورسەتسەك سەن زاڭ ادامىن سىيلامادىڭ دەپ باسىڭا «قالپاقتى» كيگىزەدى. ءوز قۇقىعىمدى تالاپ ەتىپ، باستىقتارىمەن جولىقتىرۋدى وتىنەمىن. ۇجدانى بارلار كەزىكتىرەدى، باستىقتارى ىلعي دا «تۇسىنبەستىك بولدى، جوعارىدان بۇيرىق سولاي ەدى» دەپ قۇتىلادى. جۇڭگو ىشىندە ۆوكزالداردا، جولاۋشىلار بەكەتتەرىندە قۇجات تۇگىلى ءبىر جاپىراق قاعازسىز جوڭكىلە كوشىپ جۇرگەن «ساناقتا جوق» مىڭداعان جۇڭگو بار. ولارعا ءماۋ دەمەيدى دە، ءبىزدى مالشا تەكسەرەدى. بۇل شىنىن ايتقاندا قىتايدىڭ فاشيستىك ساياساتى.  قىتايعا امەريكانىڭ دا ءسوزى باتپاي وتىر. قازاقستاننىڭ ديپلوماتتارى قىتايداعى قازاقتارعا ارا ءتۇسىپ، جۇڭگو بيلىگىنىڭ باسقىنشىل ساياساتىنا توسقاۋىل بولسا ەكەن!»