كوپتەگەن ادامدار ۋاقىتىن جاقىندارىمەن، دوستارىمەن جاعاجايدا، تەاتردا، كورمەدە، كينودا وتكىزە الاتىن جاعدايى بار. الەمدەگى قاراپايىم ادامدار كۇن سايىن قالاعانىن ىستەي الادى.

ءبىراق كەيبىر ادامداردىڭ بۇعان دا قولى جەتە بەرمەيدى. باسقالارىنىڭ كومەگىنسىز قول جەتكىزە المايدى.

ناۋرىز ايىندا شاركو دەرتىنە شالدىققان 78 جاستاعى ايەلدىڭ سۋرەتى جەلىدە تانىمال بولدى. ءبىراق نازارىن اۋدارتقان ونىڭ دەرتى ەمەس. سۋرەتتە اتى بەلگىسىز كۇيىندە قالعان ايەلدىڭ ولەر الدىنداعى سوڭعى تىلەگى بولعان امستەردامداعى رەيكسميۋزەۋم مۋزەيىندە رەمبراندتىڭ كارتيناسىن تاماشالاپ تۇرعان ءساتى.

ونىڭ سوڭعى تىلەگىن ورىنداعان جەرگىلىكتى Stichting Ambulance Wens Nederlands اتتى ۇيىم (تىلەك ورىندايتىن ۇيىم).

بۇل قايىرىمدىلىق قورى ايىقپاس دەرتكە شالدىققان ادامداردىڭ ولەر الدىنداعى تىلەگىن ورىنداۋعا ارنالعان ۇيىمدى 2007 جىلى جەدەل جاردەم جۇرگىزۋشىسى كيس ۆەلدبوەر قۇرعان. ول ەرىكتىلەر مەن جەكە جەدەل جاردەمنىڭ كومەگى ارقىلى ىسكە اسىرىلادى.

ولەر الدىندا قايتادان قايىقپەن تەڭىزگە شىعۋدى ارمانداعان تەڭىزشىنىڭ جالعىز عانا تىلەگىن ورىنداعاننان كەيىن كيس ۆەلدبوەرعا وسىنداي ۇيىم اشۋىنا تۇرتكى بولادى. جانە سولاي ىستەدى دە، كيستىڭ جاڭا جۇمىسى – ادامداردىڭ تىلەگىن ورىنداۋ.

قور ءولىم اۋزىندا جاتقان ادامدىڭ كەز كەلگەن تىلەگىن ورىنداپ، كومەك كورسەتەدى.

كيستىڭ قورى قۇرىلعاننان باستاپ، ونىڭ كومانداسى 7000 تىلەكتى ورىنداعان. «مەن جاقىن ارادا قايتىس بولاتىن ادامعا كوپ نارسە كەرەك ەمەس ەكەنىن، ولاردىڭ تىلەكتەرى دە شاعىن بولاتىنىن ءبىلدىم»، – دەيدى.

ءبىزدىڭ ەڭ قارت ەمدەلۋشىمىزدىڭ جاسى 101-دە ەدى. ول سوڭعى رەت جىلقىنىڭ ۇستىنە وتىرىپ، سەرۋەندەگىسى كەلگەن. ءبىز ونى ات ۇستىنە وتىرعىزدىق – ونىڭ قۋانىشىندا شەك بولمادى، حانشايىمدار سياقتى اركىمگە قول بۇلعاپ وتىردى. كەرەمەت تىلەك بولعان ەدى!»، – دەپ ەسكە الدى كيس.

«ءبىزدىڭ ماقسات – ەمدەلۋشىنىڭ سوڭعى ۋاقىتتارىنداعى ءومىرىن جاقسارتۋ. سوڭعى تىلەكتەرىن ورىنداۋ ارقىلى الەمدى كىشكەنە بولسا دا – جارقىنىراق ەتۋ»، – دەپ جازىلعان ۇيىمنىڭ ۆەب-سايتىندا.