«قامشى» پورتالى قازاقتىڭ ونەرلى، ىسكەر ازاماتتارىن ۇزبەي جۇرتقا تانىستىرىپ، دارىپتەپ كەلەدى. سولاردىڭ ءبىرى قازاق قول ونەرىن زامان تالابىنا ساي دامىتۋعا اتسالىسىپ جۇرگەن باۋىرلارىمىزدىڭ ءبىرى – نۇردىن تۇرعىن بولاتىن. ول «قامشى» وقىرماندارىنا جاقسى تانىس، جىلعا جۋىق ۋاقىت بۇرىن ونىڭ ەسىمى «قامشى» پورتالى ارقىلى اتاجۇرتىنا تانىلعان بولاتىن.

3 جىلدان بەرى «مۇراعات» اتتى ساۋدا بەلگىسىمەن جۇڭگو قازاقتارى اراسىندا ءتۇرلى ۇلتتىق ونىمدەر ءوندىرىپ كەلەدى. نۇردىن تۇرعىن «مۇراعات» كومپانياسىنىڭ ديرەكتورى. مۇندا قازاقتىڭ ۇلتتىق كيىمىنەن باستاپ، وزگە دە بۇيىمدارى ۇلتتىق ناقىشپەن كومكەرىلىپ، كوپكە جول تارتادى. سەرىكتەستىكتىڭ ونىمدەرى دە سۇرانىسقا يە. ارعى بەتتە قازاق قولونەرىن ناسيحاتتاپ جۇرگەن سول سەرىكتەستىكتىڭ باس مەڭگەرۋشىسى نۇردىننىڭ اپكەسى گۇلميرا تۇرعىن قىزى. «مۇراعات» كومپانياسى ەسىمىن اپكەلى-ىنىلى تۇرعىن انالارىنىڭ قۇرمەتىنە قويعان، «انامىز كىشكەنە كەزىنەن ۇلتتىق كيىم-كەشەك تىگەتىن ىسمەر كىسى ەدى» دەيدى ولار. ال، مۇراعات كومپانياسىنىڭ قازاقستانداعى وكىلى سايابەك سالياقىن.

قۇلجا قالاسىندا ورنالاسقان كومپانيا ءقازىر 180 ادامعا جۇمىس بەرىپ وتىر. 2015 جىلى بيلىك ولاردىڭ ىسكەرلىگىن باعالاپ، كاسىپكەرلىكتى دامىتۋعا قولداۋ رەتىندە 2 ميلليون يۋانعا(شامامەن 300 مىڭ اقش دوللارى) جۇمىس ىستەيتىن ۇلكەن زاۋىت سالىپ بەرگەن. ىسكەرلىك زاۋىتى سوڭعى ۇلگىدەگى تەحنولوگيالىق جابدىقتارمەن قامتىلعان.

مۇراعات كومپانياسى جاقىندا جاڭا تاپقىرلىقتى نارىققا قوستى. كەز-كەلگەن ادامنىڭ تۇرمىستىق قاجەتىنە جارايتىن بۇيىم فۋنكسياسى بولەك تىرناقالعىش.

قازاقستانعا ءونىمىن تانىستىرا كەلگەن نۇردىن تۇرعىن الماتىعا جولى تۇسكەن ساتىندە، «قامشى» پورتالىنا ارناۋلى سۇحبات بەرىپ، ىسكەرلىگىنىڭ قىر-سىرىمەن ءبولىستى.

«مەنىڭ ينتەرنەت ارقىلى ىستەگەن جۇمىستارىم وتە جاقسى بولدى، ءىسىمىزدىڭ العا ىلگەرىلەۋىنە ءبىرشاما ىقپال ەتتى»، - دەپ عالامتوردىڭ ارتىقشىلىعىن پايدالانا ءبىلۋ قاجەتتىگىمەن باستادى اڭگىمەسىن نۇردىن تۇرعىن.

ول 2015-جىلعى قىتايداعى «ينتەرنەتتەن كاسىپتەنگەن جاس جۇلدىز كاسىپكەر بايقاۋىندا»  جۇلدەگەر بولعان.  سودان باستاپ كوپتەگەن باسەكەلەرگە قاتىسقان قانداسىمىز ايماقتىق «جاڭالىق جاراتۋ جانە كاسىپ اشۋ» باسەكەسىندە 600 نىساننىڭ ىشىندە 60 مىقتىنىڭ قاتارىندا كورىنگەن.  سونداي-اق، بۇكىل قىتايلىق «جاس كاسىپكەرلەردىڭ جاڭالىق جاراتۋ» جانە كاسىپ اشۋ جارىسىندا 150 مىقتىنىڭ قاتارىنان بوي كورسەتكەن. سونىمەن قاتار 2016 جىلى شىڭجاڭ بويىنشا «جاستار بىرلەستىگىنىڭ مۇشەسى» بولىپ قۇرىلتايعا قاتىستى. ءارى، شىڭجاڭ دارەجەلى جاس كاسىپكەرلەر بىرلەستىگىنىڭ مۇشەسى بولىپ بەكىتىلگەن. 

«وسىنداي بايقاۋلارعا قاتىسىپ ءجۇرىپ، كوپتەگەن ءبىلىم وردالارىندا، اۋىلداردا تالانتتى جاستاردىڭ، ىسكە قابىلەتتى قولداۋدى قاجەت ەتەتىن قانداستاردىڭ كوپ ەكەنىن بايقادىم. سودان كومپانيا اتىنان جوعارى وقۋ ورىندارىندا ءبىلىم الىپ، ءارى كاسىپتەنۋگە بەت العان، وزىندە تالانتى بار، قولىندا جاڭا بۇيىمى، يدەياسى بار جاستارعا قولداۋ كورسەتۋدى ماقسات تۇتتىم. جاسامپازدىقتارىن، جەتىستىكتەرىن، ونىمدەرىن نارىققا شىعارىپ بەرۋدى ويلاپ، ارى سول جوبانى قولعا العان ەدىم»، - دەيدى نۇردىن تۇرعىن ۇلى.

«قامشى» پورتالى ارقىلى جۇرتشىلىققا تانىستىرعالى وتىرعان بۇيىم ونىڭ وسىلاي «بۇلاق كورسەك كوزىن اش» دەپ باستاعان يگى ءىسى اياسىندا تاپقىرلانعان.

«نيەتىڭە قاراي بەرەدى دەمەكشى. جوعارى مەكتەپتە وقىپ جاتقان ەرشات ەسىمدى جىگىت حابارلاستى. «وسىنداي مەنىڭ ءبىر ءونىمىم بار بازارعا سالايىن دەسەم ماركام جوق، سەرىكتىگىم جوق، سونى كومەكتەسسەڭىز، سەرىكتىگىڭىزدىڭ اتىندا وسى جۇمىستى ىستەسەم» دەدى. سودان قولداۋ كورسەتتىم، ول جىگىتتىڭ شىعارعانى ەدى»، - دەپ وزىندىك ارتىقشىلىعى بار تىرناقالعىشتى تانىستىردى نۇردىن تۇرعىن.

تازالىقتى دارىپتەيتىن تىرناقالعىشتىڭ قالتاسى بار. ورتانى قورعايتىن تاماشا ءونىم «مۇراعات» ماركاسىن يەلەنىپ نارىققا شىققان. تىرناقتى العاندا تىرناق شاشىرامايدى، الىنعان تىرناق قالدىقتارى قوسىمشا قالتاعا جينالادى. ارينە الىپ بولعان سوڭ ءقاۋىپسىز جەرگە كومىپ تاستاۋعا بولادى.

مۇراعات سەرىكتىگىنىڭ ساۋدا ىستەۋ كولەمى كەڭ، ەڭ باستى ونىمدەرى قازاقي ۇلتتىق كيىم-كەشەك، قولونەر مەن كەستە بۇيىمدارى ەكەنىن جوعارىدا دا جازدىق. نۇردىن تۇرعىن مۇسىلماندار ءۇشىن وزىندىك ارتىقشىلىعى مەن پايداسى بار «مۇراعات تىرناق العىشىن بۇكىل قازاقستانعا تانىستىرسام دەيدى. سونداي-اق ءۇش جىلدان بەرى قىتايدا جەمىستى ەڭبەك ەتىپ، وزىندىك ساۋدا بەلگىسىمەن تانىلعان «مۇراعات» كومپانياسىن قازاقستانعا دا جۇمىس ىستەتكىسى كەلەدى. ءوندىرىسىن اتاجۇرتتا دا قولعا الىپ، شەتەلدىك تاجىريبەسىن پايدالانسام دەيدى.

ەرلان تولەۋباي