قازاقستان باس پروكۋرورى جاقىپ اسانوۆ بۇگىن استانادا 2016 جىلدىڭ قورىتىندىسى جانە الداعى كەزەڭگە ارنالعان مىندەتتەرى جايلى وتكەن باس پروكۋراتۋرانىڭ القا جيىنىندا پروكۋرورلاردىڭ جۇمىسىن سىنادى.

اسانوۆ پروكۋراتۋرا قۇرامىندا "ادال قىزمەتكەرلەردىڭ" كوپ ەكەنىن، ال "ماسىلداردىڭ" ودان دا كوبىن ايتتى. باس پروكۋرور جيىندا "ۆەدومستۆو قىزمەتكەرلەرى تاڭنان كەشكە دەيىن مەملەكەتكە پايدالى جۇمىسپەن اينالىسىپ جاتقانداي ءتۇر جاساماۋعا" شاقىردى. پروكۋراتۋرادا "زاماناۋي ويلايتىن" قىزمەتكەرلەردىڭ بارىن ايتقان اسانوۆ ارىپتەستەرىن جۇمىس ىستەۋ ءتاسىلىن، مەنتاليتەت پەن ويلاۋدى تۇبەگەيلى وزگەرتۋگە شاقىردى.

قازاقستان پرەزيدەنتىنىڭ كومەكشىسى - قاۋىپسىزدىك كەڭەسىنىڭ حاتشىسى ۆلاديمير جۇماقانوۆ وتكەن جىلى پروكۋراتۋرا كەڭسەلەرى الدىندا ءوزىن-وزى ورتەۋ وقيعالارى بولعانىن ايتىپ، پروكۋرورلاردى زاڭنىڭ ساقتالۋىن دۇرىس قاداعالاۋعا شاقىردى.

جەلتوقساننىڭ 6-سى كۇنى جامبىل وبلىسى شۋ قالاسىنىڭ 48 جاستاعى تۇرعىنى مايرا رىسمانوۆا ۇلىنىڭ سوتتالۋىنا قارسىلىق ءبىلدىرىپ، استاناداعى باس پروكۋراتۋرانىڭ كىرە بەرىسىندەگى جەردە ءوزىن ورتەگەن. دەنەسى قاتتى كۇيگەن ايەل بىرنەشە كۇننەن سوڭ اۋرۋحانادا كوز جۇمعان. باس پروكۋراتۋرا رىسمانوۆانىڭ تۋىستارىنا تەكسەرۋ جۇرگىزۋگە ۋادە بەرگەن.

22 جەلتوقساندا شىمكەنتتە وبلىستىق پروكۋراتۋرا الدىندا جەرگىلىكتى كاسىپكەر نۇركەن اينابەكوۆ ۇستىنە بەنزين قۇيىپ، ءوزىن-وزى ورتەگەن. ءوز-وزىن ورتەۋ كەزىندە ونىڭ ۇستىنەن الاياقتىق بابى بويىنشا قىلمىستىق ءىس قوزعالعان.

اقپارات كوزى: اzattyq.org