22 قاڭتار كۇنى «قامشى» پورتالىندا شىعىس قازاقستان وبلىستىق ءماسليحاتىنىڭ حاتشىسى گولوۆاتيۋك ۆلاديمير ءميحايلوۆيچتىڭ رەسەيدىڭ دە ازاماتى بولۋى مۇمكىن ەكەنى تۋرالى دابىل كوتەرگەن ماقالا شىققان بولاتىن.

«شىعىس قازاقستان وبلىسى رەسەي ازاماتىنىڭ قولاستىندا ما؟» اتتى ماقالادا رەسەي فەدەراسياسى فەدەرالدىق ميگراسيالىق قىزەتىنىڭ ەلەكروندى بازاسىنان كوشىرىلگەن ءتارىزدى قۇجات تا بار بولاتىن. وندا ۆ. م. گولوۆاتيۋكتىڭ 1998 جىلدان باستاپ كورشى ەلگە جىلىنا بىرنەشە رەت باراتىنى كورسەتىلگەن. ءدال وسى قاعازدا 1998 جىلدىڭ 12 تامىزىندا ۆ.م.گولوۆاتيۋككە رەسەي ازاماتتىعىن بەرۋ تۋرالى شەشىم قابىلدانعانى جازىلعان. شقو وبلىستىق ءماسليحاتى حاتشىسىنىڭ رەسەي ازاماتى رەتىندەگى جەكە ءىس-قۇجاتىنىڭ ءنومىرى دە انىقتالعان – 170309960.

سول مالىمەتكە سەنسەك، 1998 جىلدىڭ 12 تامىزىندا گولوۆاتيۋك ۆلاديمير ميحايلوۆيچ ەسىمدى ازامات رەسەي فەدەراسياسىنىڭ «ازاماتتىق تۋرالى» زاڭىنىڭ 3 بابىنىڭ نەگىزىندە استاناداعى رەسەي ەلشىلىگىنىڭ كونسۋلدىعىندا رەسەي ازاماتتىعىن الادى. تيىسىنشە پاسپورت راسىمدەمەگەن، تەك وزگە ەلدىڭ ازاماتتىعىن العان، سويتە تۇرا قازاقستان ازاماتتىعىنان باس تارتپاعان.

اتالعان ماقالادان سوڭ «قامشى» پوشتاسىنا وبلىس اكىمدىگىنەن حات كەلدى. وندا ۆ. م. گولوۆاتيۋك تۋرالى فاكتىلەر تەكسەرىلەتىنى جازىلعان.

«شىعىس قازاقستان وبلىستىق ءماسليحاتىنىڭ حاتشىسى ۆ.م. گولوۆاتيۋكتە قازاقستان رەسپۋبليكاسى مەن رەسەي فەدەراسياسىنىڭ قوس ازاماتتىعى بار بولۋى تۋرالى قازاقستاندىق ينتەرنەت-رەسۋرستاردا ورنالاستىرىلعان اقپارات بويىنشا 2017 جىلدىڭ 25 قاڭتارىندا وبلىس اكىمدىگىندە ءوڭىردىڭ قۇقىق قورعاۋ ورگاندارىنىڭ قاتىسۋىمەن كەڭەس ءوتىپ، وندا اتالمىش ماسەلە بويىنشا بۇرىنعى جۇمىس تۋرالى اقپارات تىڭدالدى.

كەڭەستىڭ قورىتىندىسى بويىنشا كورسەتىلگەن فاكتىلەردى تەكسەرۋدى جالعاستىرۋ تۋرالى شەشىم قابىلداندى»، - دەلىنگەن شىعىس قازاقستان وبلىسى اكىمىنىڭ باسپا ءسوز قىزمەتى جىبەرگەن مالىمدەمەدە.