قۋعىنداعى بۇرىنعى بانكير ءارى وپپوزيسيالىق وليگارح مۇحتار ءابليازوۆتىڭ سەرىگى، قازاقستان بيلىگى تۇركيادان الدىردى دەلىنگەن جاقسىلىق جارىمبەتوۆ ءوزىنىڭ مۇحتار ءابليازوۆتىڭ" قىلمىسىنا قاتىسى بارىن" جوققا شىعارىپ، تەرگەۋگە بولىساتىنىن مالىمدەدى، دەپ حابارلادى ازاتتىق.

بۇگىن استانادا وتكەن باسپا ءسوز كونفەرەنسياسىندا جاقسىلىق جارىمبەتوۆ ءوزىن 17 قاڭتار كۇنى ستامبۋلدىڭ Sabiha Gokcen اۋەجايىندا پوليسيا "جالعان پاسپورت جاساۋ" ايىبىمەن ۇستاعانىن راستادى. ءبىراق ول "ويلانا كەلە پوليسياعا ءوزىمنىڭ كىم ەكەنىمدى ايتتىم. قاشۋدان شارشادىم" دەدى. ول بۇدان سوڭ پوليسيا قازاقستان كونسۋلدىعىنا حابارلاسۋعا رۇقسات بەرگەنىن ايتتى. جارىمبەتوۆتىڭ سوزىنشە، ونى قازاقستان ارنايى قىزمەتى ۇشاقپەن ەلگە الدىرعان.

جارىمبەتوۆ باسپا ءسوز كونفەرەنسياسىندا "ءابليازوۆتىڭ اينالاسىنداعى ادامداردىڭ ءوزىن بۇرىنعى بانكيرمەن بايلانىستىرا اقپارات تاراتىپ جاتقانىن" جانە وتباسىنا قىسىم كورسەتۋگە تىرىسىپ جاتقانىن ايتتى. ونىڭ سوزىنشە، "ءابليازوۆتىڭ ادامدارى ءوزىنىڭ قازاقستانعا جەتكىزىلگەنىن ساياساتپەن بايلانىستىرعىسى كەلەدى". جارىمبەتوۆ ابليازوۆپەن بىرگە جۇمىس ىستەگەنى بولماسا وعان قارسى قىلمىستىق ىسكە قاتىسى جوعىن ايتتى. ول ابليازوۆپەن قاتار تاعىلعان "قارجىلىق الاياقتىق جاسادى" دەگەن ايىپتىڭ وزىنە قاتىسى جوعىن ايتىپ، قازاقستانداعى تەرگەۋمەن تىعىز جۇمىس ىستەيتىنىن مالىمدەدى.

25 قاڭتاردا Open Dialog ۇيىمى ارنايى مالىمدەمە تاراتىپ، جاقسىلىق جارىمبەتوۆتىڭ تۇركيادا جۇرگەن جەرىنەن "ۇرلانعانىن" حابارلاعان. پولشادا ورنالاسقان قۇقىق قورعاۋ ۇيىمى جارىمبەتوۆتىڭ ايەلى اقمارال جارىمبەتوۆاعا سىلتەمە جاساي وتىرىپ، بۇرىنعى بانكيردىڭ 17 قاڭتار كۇنى ستامبۋلداعى Sabiha Gokcen اۋەجايىندا "ەش نەگىزسىز ۇستالعانىن"، "تۇرىك بيلىگىنىڭ وعان ادۆوكات شاقىرۋعا مۇرشا بەرمەگەنىن"، "كەيىن وعان جالعان ءتولقۇجات جاساۋ ايىبى تۋرالى حابارلاعانىن" جازعان.

Open Dialog-تىڭ مالىمدەمەسىنە سايكەس "21 قاڭتاردا قازاقستاننىڭ ارنايى قىزمەتى جارىمبەتوۆتى تۇركيادان چارتەر ۇشاقپەن سىرتقا الىپ شىققان". ايەلىنىڭ سوزىنشە، جارىمبەتوۆ وعان ءبىر مارتە تەلەفون سوعىپ، "ءۇشىنشى ءبىر ەلدەمىن" دەپ ايتىپ ۇلگەرگەن. تۇركيا مەن قازاقستاننىڭ ءتيىستى ورگاندارىنان ازىرشە كوممەنتاريي الۋ مۇمكىن بولمادى.