قىسقى ۋنيۆەرسيادا قازاقتىڭ ءتول تەڭگەسىن نىعايتقان، دەپ حابارلايدى كتك ارناسى.

كەشە ءبىراز ۇزىلىستەن كەيىن قايتا كوتەرىلگەن ۇلتتىق ۆاليۋتانىڭ دوللارعا شاققانداعى باعامى 326-عا ءتۇستى. ساراپشىلار تەڭگەنىڭ كۇشەيۋىن ۋنيۆەرسياداعا وراي الماتىعا مىڭداعان تۋريستەردىڭ كەلۋىمەن  بايلانىستىرىپ وتىر.

جانكەلدى شىمشىقوۆ، ەكونوميست:

-قازىرگى تاڭدا  سۇرانىستان كورى ۇسىنىس ارتىپ وتىر. نەگە  دەيسىز عوي؟ ۋنيۆەرسيادا اشىلدى، قانشاما مىڭداعان قوناقتار كەلدى. تۋريستەر وزىمەن دوللارىن الا كەلدى. سوندىقتان دا 9-اقپانعا دەيىن تەڭگە كۇشەيە ءتۇسۋى مۇمكىن. تەك اقپاننىڭ ورتاسىنا قاراي دوللار كۇشەيىپ،  تەڭگە السىرەيدى.

ەكونوميستەر جازدا استانادا ەكسپو باستالعان كەزدە دە تەڭگە ءدال وسىلاي بىرنەشە ايعا نىعايۋى مۇمكىن دەگەن بولجام جاسادى. ياعني، بۇگىنگە دەيىن قور  بيرجاسىندا ۇستەم بولىپ كەلگەن اقش اقشاسىنىڭ السىرەۋى ۋاقىتشا قۇبىلىس ەكەن. ويتكەنى، ۆاليۋتا باعامى تىكەلەي الەمدىك نارىقتاعى مۇناي باعاسىنا بايلانىستى. ال قارا التىننىڭ قۇنى ازىرگە تۇراقتى، باررەلى 55 دوللاردان اسپاي تۇر. ۇلتتىق بانكتەگىلەردىڭ بولجامى كەرىسىنشە،  وپتيميزمگە تولى. ولار ەندى ۇلتتىق ۆاليۋتا بۇدان دا قىمباتتاپ، دوللار 300 تەڭگەگە دەيىن ارزانداۋى مۇمكىن دەيدى.