بۇگىن قازاقستان رەسپۋبليكاسى پرەمەر-مينيسترىنىڭ ورىنباسارى يمانعالي تاسماعامبەتوۆتىڭ توراعالىعىمەن الاشوردا قوزعالىسىنىڭ قۇرىلعانىنا 100 جىل تولۋىنا وراي الاش زيالىلارىنىڭ شىعارماشىلىق مۇرالارىن زەردەلەۋ جانە ونى جانداندىرۋ ماسەلەلەرى بويىنشا كەڭەس ءوتتى دەپ حابارلايدى «قامشى» پورتالى.

بۇل رەتتە، الاش قوزعالىسىنىڭ تاۋەلسىزدىك مۇراتتارى ءۇشىن كۇرەستەگى ءرولى مەن ماڭىزىن، ونىڭ كوشباسشىلارىنىڭ ساياسي-قۇقىقتىق، ۇلتتىق قۇندىلىقتارعا قاتىستى كوزقاراستارىن، تۇجىرىمدارىن جاڭا زاماننىڭ تالاپتارىنا ساي زەردەلەۋ وتە ماڭىزدى.

«حح عاسىردىڭ باسىندا ۇلتتىڭ زيالىلارى ازاتتىق ءۇشىن بولعان كوپ عاسىرلىق كۇرەستە ماڭىزدى ءرول اتقاردى. «الاش» العاشقى ساياسي پارتياسى جانە الاش وردا ۇكىمەتىنىڭ پايدا بولۋى ازاماتتىق كەمەلدەنگەن جانە حالىقتىڭ بولاشاق تاعدىرىن شەشە الاتىن قازاقتىڭ ساياسي زيالىلارىنىڭ جوعارعى الەۋەتىن كورسەتتى»، - دەپ اتاپ ءوتتى ق ر پرەمەر-مينيسترىنىڭ ورىنباسارى يمانعالي تاسماعامبەتوۆ.

بۇل ورايدا، ۆيسە-پرەمەر ەلىمىزدەگى الاشتانۋشى تاريحشىلار مەن ادەبيەتشىلەر، وتاندىق كينو جانە تەليەۆيزيا سالاسىنىڭ ماماندارىمەن بىرلەسە وتىرىپ، تىڭ باستامالاردى – كىتاپ شىعارۋ، كينو ءتۇسىرۋ ماسەلەسىن قولعا الۋ قاجەتتىگىنە توقتالدى.

«الاشتىڭ 100 جىلدىعىنا دۇرىستاپ دايىندالۋىمىز كەرەك. ءقازىر ەڭ باستىسى، جاقسى جوسپار قۇرۋىمىز قاجەت. وعان بىر-ەكى اپتاداي ۋاقىت الىپ، دۇرىس جوسپار قۇرىپ، ونى ەلباسىمەن كەلىسىپ، ۋاقىتىن بەلگىلەگەن ءجون. الاشتىڭ 100 جىلدىعى سول زامانمەن قالىپ قويماي، بۇگىنگى تاۋەلسىز مەملەكەتپەن بايلانىستىرۋ ورىندى بولادى. الاش زيالىلارىنىڭ ارمانى، ونىڭ ورىندالعانى، تاۋەلسىز ەل بولعانىمىز، وسىنىڭ بارلىعى ۇلتتىق، تاريحي سانانى كوتەرەتىن جاقسى دۇنيە بولۋى كەرەك»، - دەدى ۆيسە-پرەمەر يمانعالي تاسماعامبەتوۆ.

سونىمەن قاتار، كەڭەس بارىسىندا احمەت بايتۇرسىن ۇلى مۋزەي-ۇيىن مەملەكەتتىك مەنشىككە بەرىپ، ونىڭ مارتەبەسىن رەسپۋبليكالىق دەڭگەيگە كوتەرۋ، عالىمنىڭ عىلىمي ەڭبەكتەرىنىڭ 10 تومدىعىن جارىققا شىعارۋ ماسەلەسى قارالدى.

يمانعالي تاسماعامبەتوۆ ا. بايتۇرسىنوۆ جانە «الاش» قوزعالىسى جونىندە دەرەكتى فيلم ءتۇسىرۋ ماسەلەسىن جەدەل تۇردە قولعا الۋ قاجەتتىگىن اتادى.

كەڭەس قورىتىندىسى بويىنشا ۆيسە-پرەمەر يمانعالي تاسماعامبەتوۆ ق ر مادەنيەت جانە سپورت مينيسترىنە الاش وردا ۇكىمەتىنىڭ قۇرىلۋى مەن قالىپتاسۋىنا اتسالىسقان ۇلت زيالىلارىنىڭ ءومىربايانىن زەرتتەپ، ولار جونىندە كوركەم ءومىرباياندىق كىتاپ شىعارۋدى جانە احمەت بايتۇرسىنوۆ عىلىمي ەڭبەكتەرىنىڭ 10 تومدىعىن باسىپ شىعارۋدى تاپسىردى.

الداعى ۋاقىتتا احمەت بايتۇرسىن ۇلىنىڭ مۋزەي ءۇيىنىڭ  عيماراتى رەسپۋبليكالىق ماڭىزى بار تاريح جانە مادەنيەت ەسكەرتكىشتەرىنىڭ مەملەكەتتىك تىزىمىنە ەنگىزىلەتىن بولادى.

ق ر ءبىلىم جانە عىلىم مينيسترىنە مۋزەي-ۇيدى مەملەكەتتىك مەنشىككە الۋ جانە ونى ا. بايتۇرسىنوۆ اتىنداعى ءتىل ءبىلىمى ينستيتۋتى جانىنان                       ا. بايتۇرسىن ۇلى مۋزەي-ۇيى – عىلىمي ورتالىعى رەتىندە قۇرۋ تاپسىرىلدى.

ەسكە سالا كەتەيىك، بىلتىرعى جىلدىڭ جەلتوقسان ايىندا «قامشى» پورتالىندا «مەملەكەت قاراۋىنسىز قالعان ءىرى مەملەكەت قايراتكەرىنىڭ ءۇيى» اتتى ماقالا جاريالانىپ، بايتۇرسىن ۇلى مۇراجاي ءۇيىنىڭ ماسەلەسىن كوتەرگەن بولاتىن. سوعان بايلانىستى وتكەن اپتادا ق ر پرەمەر-مينيسترىنىڭ ورىنباسارى يمانعالي تاسماعامبەتوۆ الماتى قالاسىنا ءىس-ساپار اياسىندا احمەت بايتۇرسىن ۇلى مۇراجاي ۇيىندە بولىپ، ونىڭ جۇمىسىمەن تانىسقان ەدى.