پاۆلودار وبلىسىنداعى بالاباقشالاردىڭ بارلىعىن مەملەكەتتىك تىلدە ءبىلىم مەن تاربيەگە كوشىرۋدى قولعا الۋ. وسىنداي ۇسىنىستى ايماق باسشىسى بولات باقاۋوۆ وبلىستىڭ يدەولوگيالىق اكتيۆىنىڭ وتىرىسى بارىسىندا جاسادى، دەپ حابارلايدى Baq.kz اگەنتتىگى.

جيىن بارىسىندا مەملەكەت باسشىسى نۇرسۇلتان نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنىڭ باسىمدىقتارى تالقىلاندى.

«ادامي كاپيتالدىڭ دامۋى - ەكونوميكالىق ءوسىمنىڭ نەگىزگى فاكتورى. ونىڭ ىشىندە ءبىلىم بەرۋ، دەنساۋلىق ساقتاۋ، الەۋمەتتىك قامتاماسىز ەتۋ سالالارىنا باسا نازار اۋدارىلىپ وتىر. ەلباسىمىز، ەڭ الدىمەن، ءبىلىم بەرۋ جۇيەسىنىڭ ءرولىن وزگەرتۋدى اتاپ ءوتتى. بۇل باعىتتا وقۋشىلاردىڭ ءوز بەتىمەن ىزدەنۋ قابىلەتتەرىن ارتتىرىپ، IT ءبىلىمدى، قارجىلىق ساۋاتتىلىقتى، ۇلتجاندىلىقتى دامىتۋ بويىنشا جۇمىس جاساۋ قاجەتتىگىن اتاپ ءوتتى. سونداي-اق، ءۇش تىلدە وقىتۋدى كەزەڭ-كەزەڭىمەن جۇزەگە اسىرۋ بويىنشا ۇسىنىستار دايىنداۋدى تاپسىردى»، - دەپ اتاپ ءوتتى بولات باقاۋوۆ.

ايماق باسشىسى ءۇش تىلدە وقىتۋ جۇيەسى ەرتىس وڭىرىندە جۇيەلى تۇردە، بىرتىندەپ جالعاساتىنىن جەتكىزىپ، بۇل باعىتتاعى جۇمىستى بالاباقشا قابىرعاسىنان باستاۋ قاجەتتىلىگىن تىلگە تيەك ەتتى.

«جەتى ءتۇرلى ءىلىم ءبىل، جەتى جۇرتتىڭ ءتىلىن ءبىل» دەگەن قازاقتىڭ ماقالى بار. سوندىقتان، الەمدىك دەڭگەيدەگى اعىلشىن تىلىندەگى قارىم-قاتىناس - ەلىمىزدىڭ جاعدايىن جاقسارتۋعا جۇمىس جاساۋ كەرەك. ال قازاق ءتىلىنىڭ باسىمدىعى ساقتالىپ، ونىڭ دامۋى بويىنشا ناقتى شارالار جۇزەگە اساتىن بولادى. مەن، پاۆلودار وڭىرىندەگى بالاباقشالاردى مەملەكەتتىك تىلگە كوشىرۋدى قولعا الۋ تۋرالى ۇسىنىستى وبلىستىڭ ءبىلىم بەرۋ باسقارماسىنا جان-جاقتى قاراستىرۋدى تاپسىرعان ەدىم. ال كەيىن مەكتەپكە بەرگەندە، اتا-انالار وزدەرى تاڭداۋ جاسايتىن بولادى. بۇل ءوز كەزەگىندە، مەكتەپ جاسىنا دەيىنگى بالالارعا مەملەكەتتىك ءتىلدى ۇيرەنۋگە مۇمكىندىك بەرەدى. ال ورىس، اعىلشىن تىلدەرىن ءاربىر وقۋشى مەكتەپ جاسىندا، كەز كەلگەن ۋاقىتتا يگەرىپ الادى»، - دەيدى وبلىس اكىمى.

ايتا كەتەيىك، تاۋەلسىزدىك جىلدارى ىشىندە وبلىستا 93 مەكتەپكە دەيىنگى ءبىلىم بەرۋ ۇيىمى قايتا قالپىنا كەلتىرىلىپ سالىندى، 261 مەكتەپكە دەيىنگى شاعىن ورتالىق اشىلدى. قازىرگى تاڭدا وڭىردە 168 بالاباقشا جۇمىس ىستەيدى. 3-6 جاس ارالىعىنداعى بالعىنداردىڭ بارلىعى مەكتەپكە دەيىنگى بىلىممەن تولىق قامتىلعان.