ل.گۋميليەۆ اتىنداعى ەۇۋ-دىڭ جوعالىپ كەتكەن ستۋدەنتى رۋسلان يماشيەۆتىڭ اناسى ول جوعالعاننان كەيىن ون كۇننەن سوڭ، ورال قالالىق ىشكى ىستەر باسقارماسىنا ارىز جازدى، دەپ حابارلايدى قازاقپارات.

«ول استانادا وقيدى، ال ءوزى ورالدان. ورالدا جوعالىپ كەتكەندىكتەن بىزگە ءوتىنىش تۇسكەن جوق. ءبىز ونىڭ اناسىنا حابارلاستىق، ورال قالالىق ىشكى ىستەر باسقارماسىنا ارىز جازعان ەكەن. ويتكەنى، ونىڭ پويىزعا وتىرعانى نە وتىرماعانى بەلگىسىز. سول اۋداندا جوعالعان سياقتى. 28 قاڭتار كۇنى ول ورالدان شىعۋى ءتيىس بولعان. اناسى تەك 10 كۇن وتكەننەن كەيىن عانا ارىز جازىپ وتىر»، - دەدى استانا قالالىق ءىىد باسپا ءسوز قىزمەتىنەن.

دوستارىنىڭ مالىمەتتەرىنە قاراعاندا، ستۋدەنتتىڭ بانك كارتوچكاسىنان استانادا اقشا الىنعان.

ەستەرىڭىزگە سالا كەتسەك، رۋسلان يماشيەۆ 28 قاڭتار كۇنى جوعالىپ كەتكەن. سودان بەرى ەش حابار جوق. رۋسلاننىڭ اناسى ۇلىنىڭ جوعالعاندىعى تۋرالى ارىزىن 8 اقپان كۇنى عانا بەرگەن. ال ۋنيۆەرسيتەت ءتورتىنشى كۋرس ستۋدەنتىنىڭ جوعالىپ كەتكەندىگىنەن بەيحابار. دوستارى مەن كۋرستاستارى ونى ءوز بەتتەرىنشە ىزدەۋدە.

رۋسلاننىڭ تۇر-الپەتى: ورتا بويلى، ارىقشا كەلگەن، سارعىلت شاشتى، بەتىندە سەكپىلى بار، كاپيۋشونى بار كيىم كيگەندى ۇناتادى.

رۋسلان يماشيەۆ جايىندا كەز كەلگەن دەرەكتى بىلەتىن ازاماتتار مىنا نومىرلەرگە حابارلاسۋىنا بولادى: 8-702-715-36-12 (ءداۋىرحان)؛ 8-702-533-65-90 (ازات)؛ نەمەسە 102.