اۋىل شارۋاشىلىعى ۆيسە-مينيسترى قايرات ايتۋعانوۆ بۇگىن استانادا وتكەن باسپا ءسوز كونفەرەنسياسىندا بيلىك وزگەرتۋدى ۇسىنعان كونستيتۋسيانىڭ 26-بابىنىڭ "جەر مەن جەر قويناۋىنا" كۇشى جۇرمەيتىنىن مالىمدەدى. بۇل تۋرالى ازاتتىق حابارلايدى.
كونستيتۋسياداعى جەكە مەنشىك تۋرالى بابىنداعى "قازاقستان ازاماتى" دەگەن ءسوزدى "اركىم" دەپ اۋىستىرۋ ۇسىنىسى قىزۋ تالقى تۋدىرعان.
"جەكە مەنشىكتەگى جەرگە قاتىستى جايتتار نەگىزىنەن جەر كودەكسىندە رەتتەلەدى، ياعني كونستيتۋسيانىڭ 26-بابىنىڭ كۇشى جەر مەن ونىڭ قويناۋىنا جۇرمەيدى. سونىمەن قاتار جەر كودەكسىندە شەتەلدىكتەردىڭ جەردى مەنشىككە الۋىنا مۇمكىندىك بەرمەيتىن ءبىرقاتار شەكتەۋلەر بار" دەدى قايرات ايتۋعانوۆ.
قازاقپارات اگەنتتىگىنىڭ حابارلاۋىنشا، ۆيسە-مينيستر جاڭا ۇسىنىس بوينىشا قازاقستاندىقتاردىڭ، شەتەلدىكتەر مەنازاماتتىعى جوق ادامداردىڭ جەكە مەنشىك قۇقىعىنا كەپىلدىك بەرىلەدى.
قاڭتاردىڭ ورتاسىندا قازاقستاندا بيلىك تارماقتارى اراسىندا وكىلەتتىكتەردى ءبولىسۋ جايلى رەفورمالار اياسىندا كونستيتۋسيانىڭ ءبىرقاتار باپتارىنا وزگەرىستەر ەنگىزۋ ۇسىنىلعان. سولاردىڭ اراسىندا كونستيتۋسيانىڭ 26 بابىنىڭ ءبىرىنشى تارماعىندا "قازاقستان ازاماتى زاڭدى جولمەن يەلەنگەن كەز-كەلگەن مۇلكىن جەكەمەنشىگىنە الا الادى" دەگەن سويلەمدەگى "ازامات" ءسوزىن "اركىم" دەپ وزگەرتۋ ۇسىنىلعان. حالىق اراسىندا بۇل ۇسىنىس كونستيتۋسياعا ەنگىزىلسە وندا شەتەلدىكتەردىڭ قازاقستاندا اۋىل شارۋاشىلىعى جەرلەرىن يەلەنۋىنە مۇمكىندىك بەرەدى دەگەن الاڭداۋشىلىق تۋدىرىپ، الەۋمەتتىك جەلىلەردە وعان قارسىلىق بىلدىرۋشىلەر كوبەيدى.
وتكەن جىلى ۇكىمەتتىڭ اۋىل شارۋاشىلىعى جەرلەرىن جەكەشەلەندىرىپ، جەردى شەتەلدىكتەرگە جالعا بەرۋ مەرزىمىن ۇزارتۋعا مۇمكىندىك بەرەتىن رەفورماسى جاپپاي قارسىلىق تۋدىرعان. بىرنەشە قالادا قارسىلىق جيىندارى ءوتىپ، 2016 جىلى مامىردا قازاقستان پرەزيدەنتى نۇرسۇلتان نازاربايەۆ جەر كودەكسىنىڭ داۋ تۋدىرعان باپتارىنا موراتوريي جاريالاعان.
