ءبىزدىڭ رەداكسيامىزعا گۇلجان ءومىرزاقوۆا ەسىمدى وقىرمان حابارلاسىپ، اتا زاڭىمىزعا پەدوفيلدەرگە قاتىستى قاتاڭ جازا قولدانۋدى، «ءولىم جازاسىن» ەنگىزۋدى سۇرادى:

«مەن رۋدنىي قالاسىندا تۇرامىن. ەكى كىشكەنتاي قىزىم بار. كىشى قىزىم ءبىر جارىم جاستا، ۇلكەنى ءتورت جاستا. شىنى كەرەك، قىزدارىم ءۇشىن قاتتى الاڭدايمىن. ءتىپتى، ەسىك الدىنا ويناۋعا جىبەرمەيمىز. ويتكەنى ەلىمىزدە، قالامىزدا، ازعىندىق ارەكەتتەر ءورشىپ تۇر. ەش جازىعى جوق بالالارعا تيىسۋگە ءداتى بارعان پەدوفيلدەردى اياماۋ كەرەك. مەن ءولىم جازاسىن سۇرايمىن! اتا زاڭىمىزعا وسى جازا ءتۇرى ەنگىزىلسە ەكەن. ونداي ادامدارعا ەشقانداي كەشىرىم بولماۋ كەرەك! ءتىپتى، ولاردى تاماقتاندىرىپ، تۇرمەدە ۇزاق جىلدار بويى ۇستاپ وتىرۋدىڭ ءوزى ارتىق. شىن كىنالى ەكەندىگى دالەلدەنسە، ءولىم جازاسىنا كەسۋ كەرەك. مەن ءقازىر قىزمەتىمدى تاستاپ، ۇيدە وتىرمىن. بالالاردىڭ باسى-قاسىندا ءوزىم جۇرمەسەم، قوعامنىڭ ازعىن ادامدارىنان ۇلكەن ءقاۋىپ ءتونىپ تۇر. مەن – انامىن جانە جاۋىڭا دا تىلەمەيتىن جاعدايعا تاپ بولعان انالاردىڭ ءحالىن جاقسى تۇسىنەمىن. سوندىقتان جازىقسىز بالالار جاپا شەكپەسىن دەپ، اتا زاڭىمىزدا وسى ماسەلە قارالسا ەكەن دەپ، سىزدەردىڭ رەداكسيالارىڭىزعا حابارلاسىپ وتىرمىن. بۇل ءوتىنىشىم پرەزيدەنتتىڭ قۇلاعىنا جەتسە ەكەن!» – دەدى كىشكەنتاي بالالاردىڭ تاعدىرىنا الاڭداعان انا. 

ەلىمىزدەگى دەرەكتەرگە سۇيەنسەك، ماڭعىستاۋدىڭ ءبىر عانا تۇرمەسىندە 28 پەدوفيل جازاسىن وتەپ جاتىر. ولار 16-40 جاس ارالىعىنداعى ەر ازاماتتار. جازالارىنىڭ مەرزىمى ءارتۇرلى، قىلمىسىنىڭ اۋىرلىعىنا بايلانىستى، ياعني 10-15 جىل ارالىعىندا"، - دەيدى ارنايى ەسەپ ءبولىمىنىڭ باسشىسى ايدار دەنەيەۆ.

سوڭعى بەس جىلدا قازاقستاندا كامەلەتكە تولماعاندارعا زورلىق جاسالعان 5 مىڭنان استام وقيعا تىركەلگەن. تەك بىلتىرعى جىلدىڭ وزىندە عانا مىڭنان اسا بالا پەدوفيلدەردىڭ قۇربانى بولىپتى.

بالالارعا قاتىستى مۇنداي قىلمىستىڭ ءتۇرى جىل ساناپ ءوسىپ كەلەدى. سوڭعى 5 جىلدا قازاقستاندا پەدوفيلدەر جاساعان قىلمىس سانى ەكى ەسەگە ارتىپ وتىر. ەلىمىزدە پەدوفيلدەردى ءپىشتىرىپ تاستاۋعا زاڭمەن رۇقسات ەتىلگەن بولاتىن. ءتيىستى قۇجاتقا پرەزيدەنت نۇرسۇلتان نازاربايەۆ قول قويدى. مەملەكەت باسشىسى قول قويىپ بەرگەن قۇجات پەدوفيلدەردى ايامايدى. ەندى ۇل-قىزدى زورلاعان ازعىندار ۇزاق مەرزىمگە تۇرمەگە قامالىپ قويماي، جان   ازابىن شەگەدى. ياعني، اباقتىدا ولارعا ءدارى ەگىلىپ، ءبىر ايعا ەركەكتىك قۋاتىنان ايىرىپ تاستايدى. ءبىراق، حيميالىق كاستراسيا سوت ۇكىمى بويىنشا جاسالۋى ءتيىس. جانە ەركەكتىك قۋاتىنان ايىراتىن ءدارى ءبىر-اق رەت سالىنباقشى.

ال، قىتايدا قىلمىسى دالەلدەنسە، پەدوفيلدى بىردەن ءولىم جازاسىنا كەسەدى. ال، گەرمانيا مەن چەحيادا قىلمىسكەردىڭ ەركەك بەزىن وتا جاساپ الىپ تاستايدى. بالانىڭ قاۋىپسىزدىگىن قاداعالامايتىن اتا-انالار دا بۇل كەلەڭسىزدىكتىڭ ورشۋىنە سەبەپ بولىپ وتىرعانىن ايتادى ءتارتىپ ساقشىلارى. وعان پەرزەنتىنىڭ قايدا، نەمەن اينالىسىپ جۇرگەنىنەن مۇلدە بەيحابار وتباسىنى قوسىڭىز. قوعامنىڭ بالا زورلاعاندارعا ەڭ اۋىر جازا ەنگىزۋدى تالاپ ەتە باستاعانىنا تالاي ۋاقىت بولدى. الايدا، قىلمىستىق اتقارۋ جۇيەسىن ىشتەن جاقسى بىلگەندىكتەن ونداي قىلمىسكەرلەردىڭ تۇرمەدەگى ءحالى ولىمنەن دە ازاپتى بولارىنا سەنەتىن بولعانى ما، ازىرگە بىزدە پەدوفيلدەردى اتۋ جازاسى ەنگىزىلمەسە دە، سوتتاۋ مەرزىمى ۇزارتىلدى. ەندى، 2018 جىلدان باستاپ ولاردى حيميالىق جولمەن پىشتىرەتىن بولدى. بۇل شارا جۇيكەسىندە اقاۋى بار قىلمىسكەرلەرگە قاتىستى قولدانىلادى. ويتكەنى مۇنداي قىلمىستى الدىن الۋ بويىنشا باتىستا جۇرگىزىلگەن زەرتتەۋلەر پەدوفيليانىڭ ەمدەلمەيتىنىن كورسەتىپتى.

مارال شايحى