ءۇندىستاندا جۇزدەگەن اۋىلدار نەكە قيۋ ءتارتىبىن قاتاڭداتتى. ەندى جاستار نەكەگە تۇرۋ ءۇشىن جەكە سوعىلعان اجەتحاناسى بار ەكەنى تۋرالى انىقتاما الىپ كەلۋى كەرەك.
اۋىل باسشىسى كۋالاندىرعان انىقتاما بولمايىنشا يمامدار جاستاردىڭ نەكەسىن قيمايدى. جەرگىلىكتى تۇرعىندار ەلدەگى سانيتارلىق جاعدايدى وسىلاي جاقسارتۋدى قولعا الىپ وتىر، دەپ حابارلايدى Joinfo.ua جەرگىلىكتى باق-تارعا سىلتەمە جاساي وتىرىپ.
ءۇندىستاننىڭ سولتۇستىگىندەگى شتاتتىڭ مىڭداعان يمامدارى ەلدەگى سانيتارلىق جاعدايدى قالىپقا كەلتىرۋ ماقساتىندا وسىنداي قادامعا بارىپ وتىر. جاڭا ءتارتىپ ەلدەگى جۇزدەگەن اۋىلدارعا ەندىرىلەتىن بولادى.
جالپى، ءۇندىستانداعى سانيتارلىق جاعداي قازىرگى تاڭدا وتە وزەكتى ماسەلەگە اينالعان. اۋىلدىق جەرلەردە جەكە اجەتحانا سالۋ ۇلكەن پروبلەماعا اينالعان. سەبەبى، جازدىڭ اپتاپ ىستىعىندا اينالاداعى «لاس قوقىستار» ادام ومىرىنە ءقاۋىپ توندىرسە، جاۋىن كەزىندە ولار ەلدى مەكەندەردى باسىپ قالاتىن جاعدايلار ءجيى كەزدەسۋدە.
مىنە، سوندىقتان ءۇندىستاننىڭ پرەمەر-مينيسترى نارەندرا مودي (Narendra Damodardas Modi) 2016 جىلى جازدا تاۋەلسىزدىك كۇنىنە وراي سويلەگەن سوزىندە ەل تۇرعىندارىنا ارناپ 20 ملن-نان استام اجەتحانا سالىنعانىن حابارلاعان بولاتىن.
