باۋىرجان مومىش ۇلى اۋىلىندا ازىق-تۇلىك پەن كيىم-كەشەكتى تەگىن تاراتاتىن دۇكەن اشىلدى. بۇل تۋرالى 24.kz حابارلايدى.

جامبىل وبلىسىنداعى يگى باستامانى جەرگىلىكتى جاستار، ۇكىمەتتىك ەمەس ۇيىمدار مەن مەشىت قىزمەتكەرلەرى قولعا العان. تۇرمىسى تومەن، الەۋمەتتىك از قامتىلعان وتباسىلار ءۇشىن جاڭا دۇكەننىڭ ەسىگى ءارقاشان اشىق.

رايحان ايىموۆا – التى بالانىڭ اناسى. بالالارىنىڭ ۇشەۋى كامەلەتتىك جاسقا تولعان، قالعانى مەكتەپ جاسىندا. وعان قايىرىمدىلىق دۇكەنى تۋرالى مەكتەپتەن حابار بەرگەن. «ەستي سالا وسىندا كەلدىم»، - دەيدى كۇمىس القالى انا.

رايحان ايىموۆا، كوپبالالى انا:

- كوستيۋم. ءوزىم كورىپ جاتىرمىن. بالالارعا بولسا، السام با دەپ تۇرمىن. ءبىر كويلەك العانمىن. جاقسى. كومەك بەرەمىز دەگەنگە كورەيىنشى دەپ كەلدىم.

بازاركۇل ورىنبايەۆا، اۋىل تۇرعىنى:

- ادامنىڭ كۇنى اداممەن. قولدان كەلگەنىمىزشە بىر-بىرىمىزگە جاردەم بەرەيىك. نەمەرەمە جەمپىر الدىم. اياق-كيىم الىپ جاتىرمىن. راقمەت!

دۇكەندە كيىم-كەشەكتەن بولەك ازىق-تۇلىك تە تەگىن بەرىلەدى. مۇندا الەۋمەتتىك ماڭىزدى تاۋاردىڭ 10 شاقتى ءتۇرى تاراتىلادى. مۇقتاج جاندار اپتاسىنا ءبىر مارتە كەلىپ، اپتالىق ازىق الۋىنا مۇمكىندىك بار. سورەدەگى ءبىرقاتار زات كاسىپكەرلەردەن جانە مەشىتكە ساداقادان تۇسكەن قاراجات ەسەبىنەن الىنادى.

ەركەبۇلان نارىموۆ، جۋالى اۋداندىق ورتالىق مەشىتتىڭ باس يمامى:

- ەڭ الدىمەن، ءبىز – قاشاندا جەتىمىن جىلاتپاعان، جەسىرىن جەرگە قاراتپاعان قازاقپىز. قازاق ءارقاشان جاعدايى تومەن وتباسىلاردى قولداپ، كومەك كورسەتىپ، جاعدايىن جاساپ كەلگەن. بۇل – قازاقتىڭ ادەتىندە دە، سالتىندا دا بار نارسە.

ۇيىمداستىرۋشىلار از قامتىلعان تۇرعىنداردىڭ ءتىزىمىن جاساعان. اۋدان بويىنشا وسىنداي 100-گە جۋىق وتباسى تىركەلىپ وتىر. ونىڭ 25ء-ىنىڭ جاعدايى كەدەيشىلىك شەگىنەن تومەن دەڭگەيدە. سوندىقتان بەلسەندىلەر بۇل ءىستى مىقتاپ قولعا الماق.

جانىبەك مىرزالييەۆ، جۋالى اۋداندىق جاستار ورتالىعىنىڭ ديرەكتورى:

- قايىرىمدىلىق دۇكەنىنە جەرگىلىكتى جۋالى كاسىپتىك كوللەدجىن بىتىرگەن تۇلەكتى «جاستار تاجىريبەسى» باعدارلاماسى بويىنشا جۇمىسپەن قامتىپ وتىرمىز. ول وسىندا كيىمدەر مەن ازىق-تۇلىكتەردى تاراتىپ، قالعان ءبىر كۇنىندە جيناقتاۋ، ۇتىكتەۋ، رەتكە كەلتىرۋ جۇمىستارىن جۇرگىزەدى. الدا تاعى ءبىر ادام سۇراتامىز دەپ وتىرمىز.

جاسىراتىنى جوق، دۇكەندەگى زاتتاردىڭ بارلىعى بىردەي جاڭا ەمەس. ءبىرازى پايدالانىلعان، ءبىراق كيۋگە جارامدى. بۇل زاتتار ءسىزدىڭ ۇيدە دە بولۋى ابدەن مۇمكىن. سوندىقتان بوسقا تاستاعانشا...

قيىندىعى مەن قىزىعى، اۋىرى مەن جەڭىلى الما-كەزەك الماسىپ جاتقان مىنا ومىردە قولدان كەلسە، قايىرىمدىلىق جاساپ، كوپشىلىكتىڭ العىسىن العانعا نە جەتسىن، شىركىن!

اۆتورلارى: رۋسلان باقىتبەك ۇلى، تيمۋر سەيىلحان، رۋسلان ءاحاتىللا