اقتوبەدە جۇمىس ىستەيتىن شەتەلدىك ينۆەستور گەنناديي بەلس ق ر پرەزيدەنتىنە جازعان حاتىندا سالىق كوميتەتى مەن سوتقا شاعىمدانعان دەپ جازادى diapazon.kz. ول ۇنەمى وزگەرىپ تۇراتىن زاڭدار مەن ۇلكەن كولەمدەگى ايىپپۇلدار جانە ينۆەستورلاردىڭ قالا مەن وبلىس اكىمدەردىڭ قابىلداۋىن جارتى جىلداپ كۇتەتىنىنە كوڭىلى تولمايتىنىن جەتكىزدى.
«مەن گەرمانيا ازاماتى 1ء-شى توپتاعى مۇگەدەكپىن. «بريگ» ج ش س يەسى جانە باسشىسى بولعانىما 25 جىل تولدى. قازاقستان ازاماتتارىن جۇمىس ورنىمەن قامتاماسىز ەتتىم. جىل سايىن 450 ميلليون تەڭگەدەن استام قارجى سالىق جانە ت.ب سەبەپتەرمەن مىندەتتى تولەمدەرگە كەتەدى. ءبىزدىڭ كومپانيا قايىرىمدىلىققا كوپ قارجى بولەدى. ونىڭ ىشىندە الەۋمەتتىك ماسەلەلەردى شەشۋ، اقتوبەنى اباتتاندىرۋ جانە قالانىڭ سىرتقى كورىنىسىن جاقسارتۋ بار. جەكە وزىمدە جانە مەن باسقاراتىن كومپانيانىڭ وففشورلا شوتى جوق. ءتىپتى جەكە اقشامنىڭ ءوزىن قازاقستاندىق بانكتەردە ساقتايمىن.
نۇرسۇلتان ءابىش ۇلى، ءسىزدىڭ شەتەلدىك ينۆەستورلاردى تارتۋ ماقساتىندا جۇمساپ جاتقان كۇش پەن ەڭبەگىڭىزدى كورىپ قۋانامىن. ءبىراق شەنەۋنىكتەردىڭ ارەكەتى مەن سوت جۇيەسىندەگى زاڭسىزدىقتاردى كورىپ شەتەلدىك ينۆەستور جانە قازاقستاندا 25 جىل بويى جۇمىس ىستەپ جۇرگەن ادام رەتىندە ەرتەڭگى كۇنىمە سەنىمسىزدىكپەن قاراپ قانا قويماي، وزىمە جانە كاسىبىمە قاۋىپ-قاتەر بار ەكەنىن سەزەمىن. اقتوبەلىك سوت جانە مەملەكەتتىك كىرىس دەپارتامەنتىنىڭ قىزمەتكەرلەرى ءسىزدىڭ قۇپيا نۇسقاۋلىقتارىڭىزدى العا تارتىپ، سالىق تولەمىن جاساعانعا دەيىن زاڭسىز جانە نەگىزسىز ۇستەمە اقشالار مەن ايىپپۇلداردى تولەتەدى. وسىلايشا بيۋدجەتتى تولتىرىپ وتىر. مەنىڭ ويىمشا، ولار جەمقورلىققا جاعداي جاساۋدا. شەشىمدەر مەملەكەتتىڭ مۇددەسىنە ەمەس، قازاقستان ەكونوميكاسىنا زارداپ اكەلۋگە نەگىزدەلگەن.
اقتوبە وبلىسىنداعى مەملەكەتتىك كىرىس دەپارتامەنتىنىڭ قىزمەتكەرلەرى جاساندى تۇردە سالىق بويىنشا 19 ميلليون تەڭگەگە بەرەشەك ەتىپ جانە ۇستەمە اقشانى 7 ميلليون تەڭگەگە ەسەپتەدى. سوت حاتتاماسىندا سومما 3 ەسە كوپ بولىپ شىقتى. ايىپپۇلداردى تەكسەرۋ ناتيجەسىنە ەمەس، حاتتاماداعى دايەكسىز كورسەتىلگەن سومماعا نەگىزدەلىپ بەلگىلەندى. پروكۋرور بۇعان كوز جۇما قارادى.
2014 جىلدىڭ 12 ناۋرىزىندا شەتەلدىك كومپانيا «بريگا»-نى الكاگول ىشىمدىكتەرىن ساتۋ بارىسىندا تاۋار بەلگىسىندە زاڭسىزدىقتار بولدى دەپ سوتقا شاعىم ءتۇسىردى. ءبىرىنشى جانە كەلەسى سوت ينستانسيالارى ونىڭ ىشىندە جوعارعى سوت «بريگ» ج ش س قىزمەتىن زاڭدى دەپ تاپقان. الايدا وسىعان ۇقساس ىستە جوعارعى سوت القاسى باسقا شەشىم قابىلدادى. كاسىپكەر كومپانياسىنىڭ جۇمىس ىستەپ جاتقان 5 جىلىندا ءوز مۇددەسى مەن سوتتارداعى باسقا زاڭ بۇزۋشىلىقتارعا قاتىستى 20 مارتە سوتقا جۇگىنگەن.
«ىسكە اسۋى مۇمكىن ەمەس ءنورماتيۆتى-قۇقىقتىق اكتىلەر نە ءۇشىن قابىلدانادى؟ جەمقورلارعا جاقسى جاعداي جاساپ بەرۋ ءۇشىن بە؟ الدە كاسىپكەرلىكتى جويۋ ءۇشىن بە؟ كاسىپورىننىڭ بولماشى قاتەلىكتەرى ءۇشىن اكىمشىلىك جازاعا تارتاتىن مۇنداي نورمالار نە ءۇشىن ويلاپ تابىلعان؟ ينۆەستيسيالاۋعا قاتىستى شەشىم قابىلداعاندا ينۆەستور قازاقستانداعى سالىق جۇكتەمەسى، ەڭبەك زاڭناماسى سەكىلدى ساۋالداردى بارلىعىن قاراستىرادى. ساراپتاپ بولعاننان كەيىن ينۆەستور ەكونوميكانىڭ قانداي دا ءبىر سالاسىنا ينۆەستيسيا قۇيا ما، الدە جوق پا سونى شەشەدى. الايدا قالا مەن وبلىس اكىمىمەن ينۆەستيسيالىق نەمەسە كاسىپكەرلىكتى دامىتۋ جانە كەڭەيتۋگە قاتىستى سۇراقتاردى كەلىسۋ ءۇشىن جارتى جىل كۇتەسىڭ. وسىدان كەيىن ينۆەستورلار ءۇشىن قانداي جاقسى جاعداي تۋرالى ايتۋعا بولادى. وسى فاكتتەردىڭ بارلىعى قازاقستانداعى ينۆەستيسيالىق كليماتىنا جاعىمسىز اسەر ەتەدى. ءسىزدىڭ سوزدەرىڭىزدى كەيبىر جەرلەردە ەستىمەيدى نەمەسە ءسىزدىڭ بەدەلىڭىزدى ءتۇسىرۋ ءۇشىن ادەيى ينۆەستورلارعا ناشار جاعداي جاسايدى. مەن كوپتەگەن شەتەلدىك كاسىپكەرلەرمەن سويلەسەمىن. ولاردىڭ كوبى قازاقستان ەكونوميكاسىنا ينۆەستيسيا سالعىسى كەلەدى. الايدا جەتىلدىرىلمەگەن جانە جەمقورلىق جايلاعان سوت جۇيەسى، مۇقيات ويلاستىرىلماعان جانە ۇنەمى وزگەرىپ وتىراتىن زاڭ مەن باقىلاۋشى جانە سوت ورگاندارىنىڭ باسسىزدىقتارى ينۆەستورلاردى قاشىرادى» دەيدى ينۆەستور.
اۋدارعان: اسەم المۇحانبەت
