اقش-تا 100-دەن اسا جۇمىسشى «يمميگرانتتارسىز وتكەن ءبىر كۇن» اتتى اكسيا وتكىزىپ، سول ءۇشىن جۇمىستان قۋىلدى دەپ حابارلايدى bbc.com.

اكسيانى ۇيىمداستىرۋشىلار يمميگرانتتاردى ءبىر كۇن ۇيىندە قالىپ، جۇمىسقا شىقپاي، دۇكەن، كافەلەرگە بارماي، بالالارىن دا مەكتەپكە جىبەرمەۋگە شاقىردى. ونىڭ ماقساتى اقش ءۇشىن يمميگرانتتاردىڭ ماڭىزدىلىعىن ءتۇسىندىرۋ.

دجيم سەروۆسكيي كوممەرس-سيتيدە JVS Masonry قۇرىلىس كومپانياسىنىڭ نەگىزىن قالاعان كاسىپكەر. ول سي-ەن-ەن-گە بەرگەن سۇحباتىندا جۇمىسقا كەلمەگەن پروراب پەن  30-عا جۋىق تاس قالاۋشىنى ەشبىر وكىنىشسىز جۇمىستان شىعارىپ تاستاعانىن ايتقان.

سەروۆسكيي الدىن-الا جۇمىسقا شىقپاعانى ءۇشىن جۇمىستان شىعاراتىنىن ەسكەرتكەن.

تالسا قالاسىندا 12 ادام جۇمىستان شىعىپ قالعان. بۇلار اقش-قا لاتىن امەريكاسىنان كەلگەن جەرگىلىكتى مەيرامحانالاردا جۇمىس ىستەيتىندەر.

تەننەسيدەگى نولەنسۆيللدە عيماراتتى سىرلاۋمەن اينالىساتىن 18-گە جۋىق ادام جۇمىستان شىعىپ قالدى.

اكسيا وتكەن كۇنى اقش-تىڭ كوپتەگەن ءىرى قالالارىندا ونداعان دۇكەندەر، كافە، مەيرامحانالار اشىلماعان. ءتىپتى ۆاشينگتونداعى بىرنەشە كوفەينيالار جۇمىس ىستەمەگەن.  

كوپتەگەن كاسىپ يەلەرى اسىرەسە اقش-تان تىس ايماقتا تۋىلعاندار ءوز قىزمەتكەرلەرىنە جۇمىسقا شىقپاۋىنا رۇقسات بەرگەن.

اكسياعا قاتىسۋشىلار دونالد ترامپتىڭ قاڭتار ايىندا يمميگرانتتار تۋرالى بۇيرىعىنا ءوز قارسىلىقتارىن ءبىلدىردى. بۇل قۇجات ارقىلى اقش پرەزيدەنتى 7 مۇسىلمان ەلدەرىنىڭ ازاماتتارىنا ەلگە كىرۋىن شەكتەگەن.

سيەتلدەگى فەدەرالدى سوت (ۆاشينگتون) بۇيرىقتى توقتاتا  تۇرعان. ادىلەت مينيسترلىگى بۇل شەشىمدى وزگەرتۋگە تىرىسۋدا.

وتكەن اپتادا ترامپ پرەسس-كونفەرەنسيادا يمميگرانتتاردىڭ ەلگە كىرۋىن شەكتەيتىن جاڭا بۇيرىققا قول قوياتىنىن ايتقان. اسسوشييەتەد پرەسستىڭ مالىمەتىنشە، وندا اق ءۇيدىڭ يران، يراك، سيريا، يەمەن، سومالي، سۋدان جانە ليۆيا ەلدەرىنىڭ ازاماتتارىن اقش-قا كىرۋىنە شەكتەۋ قوياتىنى جازىلعان.