«قامشى.كز» پورتالى بۇعان دەيىن ەتنيكالىق قازاقتارعا ۆيزانى بەرۋ، قالپىنا كەلتىرۋ جانە  ۇزارتۋ تۋراسىندا بىرنەشە ماتەريال جاريالادى. وندا قازاقستان رەسپۋبليكاسىنىڭ زاڭىنا سايكەس ەتنيكالىق قازاقتاردىڭ ۆيزاعا قاتىستى بارلىق مەملەكەتتىك باج سالىعىنان بوساتىلاتىنى جازىلعان. وسىدان كەيىن رەداكسيامىزعا كامەلەت جاسقا تولماعان، قازاقستاندا تۇراقتى تىركەۋى بار ەكى بالاسىنىڭ ۆيزاسىن ۇزارتا الماي جۇرگەن ازامات حابارلاستى. ءقازىر استانا قالاسىندا تۇرادى. وعان كوشى-قون باسقارماسىندا 16 جاسقا تولماعان بالالاردىڭ ۆيزانى ۇزارتۋعا قاجەتتى 68 مىڭ تەڭگەنى تولەۋ كەرەكتىگىن ايتقان. ەكى بالاسىنا 140 مىڭعا جۋىق اقشانى تولەي المايتىنىن ايتادى قانداسىمىز.

ماسەلەنىڭ ءمان-جايىن انىقتاۋ ءۇشىن ق ر ءىىم حات جولداپ، رەسمي جاۋاپ الدىق. وعان سايكەس قازاقستان رەسپۋبليكاسىنىڭ «حالىقتىڭ كوشى-قون» تۋرالى  زاڭدا 1-بابتىڭ 28ء-شى تارماعىندا شەتەلدە تۇراقتى تۇراتىن ۇلتى قازاق شەتەلدىك نەمەسە ازاماتتىعى جوق ادامدار ەتنيكالىق قازاق ساناتىنا جاتاتىنى كورسەتىلگەنى جانە قازاقستان اۋماعىندا تۇراقتى تۇرۋعا رۇقساتى بار شەتەلدىك ەتنيكالىق قازاقتار ساناتىنا جاتپايدى، تيىسىنشە مەملەكەتتىك باج سالىعىن تولەۋدەن بوساتىلمايدى دەگەن جاۋاپ كەلدى.

قازاقستاندا تۇراقتى تىركەۋى جوق بالانى مەكتەپكە، بالاباقشاعا ورنالاستىرىپ، دارىگەرگە كورسەتىپ ت.ب شارۋالاردى اتقارۋ قيىن. ال تۇراقتى تىركەۋى بولعان جاعدايدا ەتنيكالىق قازاقتار مۇلدە باسقا ماسەلەمەن بەتپە-بەت كەلەدى. رەداكسيامىزعا حابارلاسقان ازاماتتىڭ ەكى بالاسى بار جانە بالالارىنىڭ ۆيزاسىن ۇزارتۋ ءۇشىن ءارقايسىسىنا 68 مىڭ تەڭگەدەن تولەۋى ءتيىس. 136 مىڭ تەڭگەنى اركىمنىڭ قالتاسى كوتەرە بەرمەيتىنى انىق. ال ودان دا كوپ بالاسى بارلار قايتپەك؟ ولاردىڭ جاعدايى تىپتەن قيىن. شەتەلدەن كەلىپ، قازاقستاندا ورنىعىپ العانشا ءبىراز ۋاقىت، كۇش-قايرات پەن قاراجات كەرەك.  ازاماتتىقتى الۋ ءۇشىن دە كوپتەگەن تابالدىرىقتى توزدىرادى. وسى رەتتە تاريحي وتانىنا ورالعاندارعا قۇجاتتاردى راسىمدەۋ مەن وعان قاجەتتى باج سالىعىندا جەڭىلدىكتەر بولسا دەگەن تىلەگىمىز بار.

قامشىگەر: اسەم المۇحانبەت