رەسەي پرەزيدەنتى ۆلاديمير پۋتين مەن ۋكراينا پرەزيدەنتى پەتر پوروشەنكو بەلارۋس استاناسى مينسكىدە بەتپە-بەت كەزدەسىپ، ۋكراينانىڭ شىعىسىنداعى جاعدايدى تالقىلادى. «ازاتتىق راديوسىنىڭ» جازۋىنشا پۋتين پوروشەنكومەن بولعان كەزدەسۋدى "ءپوزيتيۆتى" ءجۇردى دەپ، ماسكەۋ بىتىمگەرلىك پروسەستەردى نىعايتۋ ءۇشىن "بارلىق مۇمكىندىكتى جاسايتىنىن" مالىمدەگەن. ول بۇعان قوسا گاز تاسىمالداۋ ماسەلەسىنە قاتىستى كەلىسسوزدەر جۇرگىزۋ تۋرالى دا ۋاعدالاستىق جاسالعانىن ايتتى.
پوروشەنكونىڭ ايتۋىنشا، كييەۆ پەن ماسكەۋ ۋكراينانىڭ شىعىسىنداعى جاعدايدى رەتتەۋدىڭ العىشارتتارىن جاساۋ ءۇشىن ەكى ەلدىڭ شەكارا قىزمەتتەرى جانە بيلىك وكىلدەرى اراسىندا كەلىسسوزدەر باستاۋعا كەلىسىپتى.
مينسكىدە مۇنىڭ الدىندا پۋتين، پوروشەنكو، بەلارۋس پرەزيدەنتى الەكساندر لۋكاشەنكو جانە ەۋروپا وداعىنىڭ سىرتقى ساياسات جونىندەگى كوميسسارى كەترين ەشتوننىڭ قاتىسۋىمەن كوپجاقتى كەلىسسوزدەر ءوتتى. ماسكەۋ مەن كييەۆتىڭ ۇستانىمدارى ۇيلەسە بەرمەگەندىكتەن، ءتىپتى كەيبىر جاعدايدا تۇبىرىمەن قاراما-قايشى كەلىپ جاتقاندىقتان كەلىسسوزدەر كۇردەلى بولعان. سونداي-اق مينسكىدە كەدەن وداعى باسشىلارى دا كەزدەسىپ، ساۋدا كەڭىستىگىنىڭ جاڭا قادامدارى مەن الداعى الىس-بەرىس جوسپارلارىن دا تالقىلاعان. مينسكىگە بارعان ق ر پرەزيدەنتى نازاربايەۆ پەن ۋكراينا پرەزيدەنتى پوروشەنكونىڭ دا ءوزارا جەكە كەزدەسۋلەرى بولدى. ەكى جاقتى كەزدەسۋ بارىسىندا قازاقستان پرەزيدەنتى نۇرسۇلتان نازاربايەۆ بەيبىتشىلىكتى دارىپتەپ، قازاقستاننىڭ ۋكرايناعا گۋمانيتارلىق كومەك بەرەتىنىن جەتكىزدى ءارى الەم ەلدەرىن ۋكرايناعا كومەك كورسەتۋگە شاقىردى.
قامشى-اقپارات
