مەنى ءبىزدىڭ ەلدەگى مەملەكەتتىك مەكەمەلەردىڭ كونسەرت بەرۋ قىزمەتى كوپتەن تولعاندىرىپ جۇرگەن. بۇگىنگى تايجان قالماعامبەتوۆ اتىنداعى جەزقازعان فيلارمونياسىنىڭ قاراعاندى ءوڭىرىن ارالاي كەلگەندەگى كونسەرتىن سىرت كوز رەتىندە تاماشالاپ ءبىراز وي ءتۇيدىم. بۇل ۇجىم كەشە شاحان كەنتىندە (50 شاقتى ادامعا)، بۇگىن مايقۇدىقتا (20 شاقتى ادام) كەش وتكىزدى. ەرتەڭ سۇرىپتاۋ (مايقۇدىقتان ءسال ارىرەك جەر، سورتيروۆكا) ەلدى مەكەنىنىڭ مادەنيەت ۇيىندە كونسەرتىن قويادى.
جوسپاردا كورسەتىلگەن، بەكىتىلگەن كونسەرتتەر. كومەرسيالىق جوبا ەمەس. ارينە، جارناما از، ناسيحات جۇمىسى جەتكىلىكتى جاسالىنباعان سوڭ كەلۋشى دە از. مادەنيەت باسقارماسى "ءوز بوقتارىڭدى وزدەرىڭ شۇقىڭدار" دەگەن سىڭاي تانىتقان. بوتەن قالاعا الدىن الا بيلەت تاراتۋشىلار جىبەرىپ، جارنامادان بولەك ونىڭ باسقا دا شىعىندارىن وتەۋ قىمباتقا تۇسەدى. سودان سوڭ وسىنداي ءجۇردىم-باردىم كەشتەر ۇيىمداستىرىلادى. بۇل ماسەلەلەر كادىمگىدەي مەملەكەتتىك دەڭگەيدە قولعا الىنۋى ءتيىس. مادەنيەت باسقارماسى جىلدىڭ باسىندا جوسپار سۇرايدى، جىلدىڭ اياعىندا، كۆارتال سوڭىندا اتقارىلعان جۇمىستاردىڭ ەسەبىن سۇرايدى. جوسپارلى كونسەرتتەرگە كومەگىن تيگىزە الماسا "جوسپار ورىندامادىڭدار" دەپ نەمەنەگە كىجىنەدى؟ نەمەسە "كەرەمەت، جوسپار ورىندالدى" دەپ نەمەنەگە قۋانادى؟
كەشەگى شاحانداعى كونسەرتكە قاراعاندى وبلىسى مادەنيەت باسقارماسىنىڭ وكىلى باردى دەگەنگە سەنبەيمىن. سەبەبى، اناۋ شاحان تۇرماق، ىرگەدەگى مايقۇدىققا كەلگەن جوق. ونداي ادامدار نە ءۇشىن باسقارما باسقارىپ وتىر؟ اشەيىندە الاشاپقىن بولىپ جۇرەتىن جاندايشاپتارى قايدا؟
بۇل كەز كەلگەن فيلارمونيانىڭ باسقا جاققا بارسا باسىنان وتكەرەتىن جاعدايى.
ەندى باسقا جاعىنان قارايىقشى بۇل ماسەلەگە. ارقاداعى ءداستۇرلى انشىلەر قايدا؟ ءبىر تەرىنىڭ پۇشپاعىن يلەسىپ جۇرگەن عالىم مۇحامەديننىڭ (ق ر ەڭبەك سىڭىرگەن ءارتيسى) جانىنان نەگە تابىلمادى؟ مەن ايتايىن، ون ءانشى بار دەسەك سونىڭ جەتەۋى تويدا. جەتىسكەننەن جۇرمەگەن شىعار. ءبىراق، توي-تومالاق اڭدىپ جۇرگەندەرى حاق. بۇل دا ونەرگە دەگەن وگەي كوزقاراستىڭ كەسىرى.
مادەنيەت سالاسى ىشىنەن ءىرىپ-شىرىپ جاتىر. انىعى وسى. بارلىق سالادا سول. ءبىر كۇنى ەكسپو قۇرىلىسى سەكىلدى "گۇرس" ەتىپ قۇلايدى-اۋ...

ايسۇلتان جاقىپوۆ