«تۇركسوي» حالىقارالىق ۇيىمى، ق ر مادەنيەت جانە سپورت مينيسترلىگى جانە وڭتۇستىك قازاقستان وبلىسى اكىمدىگى بىرلەسىپ بەكىتكەن ءىس-شارالار جوسپارىنا سايكەس 21 ناۋرىز كۇنى «تۇركىستان – تۇركى الەمىنىڭ مادەني استاناسى» اتتى سالتاناتتى شاراسى باستاۋ الدى.

ءىس-شارانىڭ اشىلۋىندا ءسوز باستاعان وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ بارشا جۇرتشىلىقتى «تۇركىستان - تۇركى الەمىنىڭ مادەني استاناسى» اتانعان جىلدىڭ باستالۋىمەن قۇتتىقتاپ، وسى ابىرويلى مىندەتتى بىرلەسە وتكىزۋگە شاقىردى. كەلەسى ءسوز كەزەگىن العان «ازىرەت سۇلتان» مەملەكەتتىك تاريحي-مادەني قورىق-مۇراجايىنىڭ ديرەكتورى جاندوس اۋباكىر كەلگەن قوناقتارعا قوجا احمەت ياساۋي كەسەنەسىندە جەرلەنگەن حان-سۇلتاندار، باتىرلار مەن بيلەر، يگى جاقسىلار مەن تاريحي تۇلعالار جايلى مالىمەت بەرىپ قازاقستان تاريحىندا ساۋلەتتىڭ كورنەكتى ەسكەرتكىشى، تۇركىستاننىڭ نەگىزگى مادەني ورىندارىنىڭ ءبىرى سانالاتىنىن اتاپ ءوتتى.

رۋحاني استاناعا كەلگەن مەيماندار ەڭ الدىمەن قوجا احمەت ياساۋي كەسەنەسىنە زيارات ەتىپ،  سونىمەن قاتار، ورتا عاسىرلىق كوشە بويىندا ورنالاسقان ەتنوگرافيالىق جادىگەرلەر مەن قولونەر شەبەرلەرىنىڭ تۋىندىلارىن تاماشالاي كەلە جاڭارتىلعان «تۇركىستان تاريحى» مۋزەيى ەكسپوزيسياسىمەن تانىستى. مۋزەي ەكسپوزيسياسىنىڭ باستى باعىتتارى (كونسەپسياسى) رەتىندە تۇركىستان ولكەسىن العاشقى ادامداردىڭ قونىستانۋىنان باستاپ قولا، ەرتە تەمىر داۋىرلەرى تۇسىنداعى ەسكەرتكىشتەر، العاشقى تۇراقتار مەن وتىرىقشىلىق قونىستارى جانە ەجەلگى ءداۋىر قالالارى، ەرتە ورتا عاسىرداعى قالاقۇرىلىسى ەسكەرتكىشتەرى مەن تۇركى مادەنيەتى، ولكەنىڭ ساياسي، ەكونوميكالىق جانە رۋحاني ورتالىقتارىنىڭ دامۋ تاريحى، تۇركىستاننىڭ قازاق حاندىعى تۇسىنداعى دامۋى مەن استاناعا، كەسەنەنىڭ ۇلتتىق پانتەونعا اينالۋى جانە تاۋەلسىزدىك تۇسىنداعى تۇركىستان مەن ولكەدەن شىققان تاريحي تۇلعالار جايلى كەڭ كولەمدەگى تاريحي، ارحەولوگيالىق، ەتنوگرافيالىق، نۋميزماتيكالىق ءتۇپنۇسقا جادىگەرلەرمەن، ماتىندەرمەن نەگىزدەلگەن كەشەندى مۋزەيلىك قۇرىلىمدار ۇسىنىلدى. ەكسپوزيسيا 8 بولىمنەن تۇرادى.

ءاز-ناۋرىز مەرەكەسىنە ارنالعان «ناۋرىزناما» ءىس-شاراسىنا جانە قوجا احمەت ياساۋي كەسەنەنەسىن تاماشالاۋعا 23 تۇركىتىلدەس ەلدەن مىڭعا جۋىق قوناقتار كەلدى. ونىڭ ىشىندە تۇركسوي حالىقارالىق ۇيىمىنىڭ باس حاتشىسى دۇيسەن قاسەيىنوۆ باستاعان رەسمي دەلەگاسيا، تۇركىتىلدەس جانە باسقا دا مەملەكەتتەردەن كەلگەن قوناقتار. ق ر مادەنيەت جانە سپورت ءمينيسترى ارىستانبەك مۇحامەدي ۇلى، وقو اكىمى جانسەيىت تۇيمەبايەۆ، سەنات جانە ءماجىلىس دەپۋتاتتارى، قازاقستاندىق زيالى قاۋىم جانە ونەر تۇلعالارى، مەملەكەت جانە قوعام قايراتكەرلەرى، جوعارى جانە ورتا ارناۋلى وقۋ ورىندارىنىڭ باسشىلارى مەن وقۋشىلارى، ستۋدەنتتەر، ب ا ق وكىلدەرى جانە مۋزەي قىزمەتكەرلەرى قاتىستى.