قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ اقوردادا وزبەكستان پرەزيدەنتى شاۆكات ميرزيەيەۆپەن كەزدەستى دەپ حابارلايدى Qamshy.kz

پرەزيدەنت نازاربايەۆ وزبەك باسشىسىن زور سالتاناتپەن قارسى الدى.

ەلباسى ناۋرىز مەرەكەسىنە وراي ەلگە كەلىپ جاتقان وزبەك باسشىسىنىڭ قادامىن جاقسىلىققا بالاپ، العىسىن ايتتى. بۇل كەزدەسۋدىڭ ايماقتىق ىنتىماقتاستىق پەن ەكونوميكالىق ماڭىزى جوعارى ەكەنىن ايرىقشا اتاپ ءوتتى.

«ءسىز قىزمەتكە كەلگەلى ەكى ەلدىڭ اراسىنداعى تاۋار اينالىمى وتىز پايىزعا ارتتى. ميلليارد دوللاردىڭ كەلىسىمشارتتارىنا قول قويىلدى»، - دەدى نازاربايەۆ وزبەكستاننىڭ جاڭا پرەزيدەنتىنە.

«قۇرمەتتى تۋعان باۋىرلار!»، - دەپ باستادى ميرزيويەۆ ءوز ءسوزىن.

«ەكى ەل اراسىنداعى يسلام كاريموۆ ەكەۋىڭىز قالىپتاستىرعان ىنتىماقتاستىق ودان ءارى نىعايا تۇسەدى. ءبىز قازاقستاندى ەڭ جاقىن ءارى سەنىمدى سەرىكتەسىمىز دەپ سانايمىز»  دەپ، ورتالىق ازيانىڭ ىنتىماقتاستىعى تۋرالى ءسوز ەتكەن وزبەك باسشىسى قازاقستاندى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولۋىمەن قۇتتىقتادى.

«بۇگىنگى كەزدەسۋ ءبىزدىڭ بولاشاق قاتىناسىمىز ءۇشىن ۇلكەن ماڭىزعا يە. ءبىز ءجيى كەزدەسىپ تۇرامىز. وسىلاي شاقىرعانىڭىز ءۇشىن «راقمەت» ايتامىن دەدى وزبەك تىلىندە ميرزيويەۆ . سونداي-اق ەلباسى نازاربايەۆتى وزبەكستانعا ساپارمەن كەلۋگە شاقىردى.

ايتا كەتسەك، وزبەكستان باسشىسى ناۋرىز مەرەكەسى قارساڭىندا كەشە 22 ناۋرىزدا رەسمي ىس-ساپارمەن كەلدى. پرەمەر-مينيستر باقىتجان ساعىنتايەۆ قارسى العان بولاتىن.

ەستەرىڭىزگە سالساق، 5 جەلتوقساندا شاۆكات ميرزيويەۆ وزبەكستان پرەزيدەنتى بولىپ سايلاندى. سايلاۋ 4 جەلتوقساندا ءوتتى. وزبەكستان پرەزيدەنتىنىڭ مىندەتىن اتقارۋشى، پرەمەر-مينيستر شاۆكات ميرزيويەۆ مەملەكەت باسشىسى سايلاۋىندا 88،61% داۋىسپەن جەڭىسكە جەتتى. وزبەكستاندا سايلاۋ وتە سالا نازاربايەۆ پەن ميرزيويەۆ وڭىرلىك قاۋىپسىزدىكتى نىعايتۋ ماسەلەلەرى جونىندە پىكىر الماستى. قازاقستان پرەزيدەنتى نۇرسۇلتان نازاربايەۆ وزبەكستان رەسپۋبليكاسىنىڭ سايلانعان پرەزيدەنتى شاۆكات ميرزيويەۆپەن تەلەفون ارقىلى سويلەستى.
 

نۇرعالي نۇرتاي