ۇلىستىڭ ۇلى كۇنى ناۋرىز مەرەكەسىنە وراي ۇلتتىق ونەرىمىزدى ۇلىقتاپ، ءداستۇرلى جىر، تەرمە، تولعاۋلارىمىزدى دارىپتەۋ ماقساتىندا "الاتاۋ" ءداستۇرلى ونەر تەاترىندا "ماڭگىلىك ەل" جىر-تەرمە كەشى ءوتتى.

التاي-اتىراۋ، ارقا-الاتاۋ باۋىرىنان كەلىپ، الماتى باۋرايىندا باس قوسقان ءداستۇرلى ونەردىڭ كىل مىقتىلارى 21-22 ناۋرىز كۇندەرى الىپ شاھار الماتىنىڭ تۇرعىندارى مەن قوناقتارىنا ارناپ ونەر كورسەتتى.

21 ناۋرىز "تۇلپار ءمىنىپ، تۋ العان" اتتى ۇلت-ازاتتىق جىر-تولعاۋلار كەشىن بەلگىلى جىرشى، ونەرتانۋشى عالىم، فولكلورشى، مەملەكەتتىك "دارىن" سىيلىعىنىڭ يەگەرى بەرىك ءجۇسىپ جۇرگىزسە، 22 ناۋرىز "اتىمدى ادام قويعان سوڭ..." اتتى ادامگەرشىلىك پەن ىزگىلىكتى جىرلايتىن كەشتىڭ تىزگىنىن  ەربولات شالدىبەك ۇستادى.

ەلىمىزدىڭ تۇكپىر-تۇكپىرىنەن كەلگەن جىر تۇلپارلارىنىڭ ورىنداۋىنداعى حV عاسىردان باستاۋ العان حاندىق ءداۋىر ادەبيەتىنىڭ كورنەكتى وكىلدەرى اقتامبەردى، بۇقار جىراۋ، ابۋباكىر كەردەرىنىڭ تولعاۋلارى مەن ماحامبەت وتەمىس ۇلى، جامبىل جابايەۆتىڭ جىرلارى كورەرمەندەر كوڭىلىنەن شىقتى. سونىمەن قاتار كەشكە قاتىسۋشى جىر-تەرمەشىلەر ءوز ورىنداۋلارىنداعى تۋىندىلاردى ۇسىندى.

ونەرمەن اۋىزدانىپ، جىرمەن جۇبانعان، اتالى سوزگە توقتالىپ، باتالى سوزگە باس يگەن xالقىمىز ۇلتتىق ونەردى جوعارى باعالايدى. بۇگىندە كورەرمەننىڭ ەستەتيكالىق تالعام، تارازىسى بيىك، تالابى زور. سوعان قاراي ورىنداۋشىلار دا شەبەرلىگىن شىڭداپ، سىنعا دەس بەرمەيدى. ونى «ماڭگىلىك ەل» جىر-تەرمە كەشىنە قاتىسۋشىلاردىڭ ونەرلەرىنەن بايقاۋعا بولادى. شەتىنەن «سەن تۇر، مەن اتايىن» دەيتىندەي قايتالانباي دارىن يەلەرى. ءوز كەزەگىندە كوزقاراقتى كورەرمەن دە جىر-تەرمە ورىنداۋشىلارىنىڭ اڭىسىن اڭداپ، قابىلەتتەرىن باعامداپ وتىرعانداي بولدى.

الماتى قالاسى مادەنيەت باسقارماسىنىڭ ۇيىمداستىرۋىمەن «الاتاۋ» ءداستۇرلى ونەر تەاترىندا وتكەن كەش ۇلتتىق ونەرىمىزدىڭ وسىپ-وركەندەۋىنە قوسار ۇلەسى زور دەپ ەسەپتەيمىز.