اتىراۋدا ەر ادام مەتالل كونتەينەردەن جاسالعان ۇيدەگى ءورت پەن جارىلىستان تەرەزەدەن سەكىرىپ كەتىپ امان قالدى. وقيعا 23 ناۋرىزدا تاڭعى ۋاقىتتا ءابىلقايىر حان داڭعىلىنىڭ ماڭىنداعى قۇرىلىس الاڭىندا بولعان، - دەپ حابارلايدى «اق جايىق».
باسىلىم رەداكسياسىنا جولدانعان ۆيدەوعا قاراعاندا، ءورت گاز باللونىنىڭ بۇلىنۋىنەن شىققان. وسى ۇيدە بولعان ەر ادام تەرەزەدەن سەكىرىپ تۇسكەندە ارتىندا جارىلىس بولعان.
«اۋدانى 12 شارشى مەتر بولاتىن كونتەينەر تۇگەلدەي ورتەنىپ كەتتى. زارداپ شەككەن ءبىر ادام بار، كۇيىك ەمەس، دەنەسى تىلىنگەن. اۋرۋحاناعا جاتۋدان باس تارتتى»، - دەپ پىكىر ءبىلدىردى اتىراۋ وبلىستىق تجد كەزەكشى بولىمىندەگىلەر.
