كوكتەمگى ناۋرىز مەرەكەسى كەزىندە «Sociëteit De Witte» بەدەلدى ساياسي كلۋبىندا (گااگا ق.) كونستيتۋسيالىق رەفورمالار مەن ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىن ءتۇسىندىرۋ ماقساتىندا «دوڭگەلەك ۇستەل» ءوتتى، دەپ حابارلايدى Qamshy.kz سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.
ءىس-شارا نيدەرلاندتاعى قازاقستان رەسپۋبليكاسىنىڭ ەلشىلىگىمەن جانە 1802 جىلى قۇرىلىپ، ءۇش مىڭنان استام تۇراقتى مۇشەلەرلەر سانىنان تۇراتىن «Sociëteit De Witte» كلۋبىمەن ۇيىمداستىرىلدى. نيدەرلاندتاعى قازاقستاننىڭ ەلشىسى ماعجان ءىلياسوۆ «دوڭگەلەك ۇستەل» قاتىسۋشىلارىنا زاماناۋي قازاقستان تۋرالى جانە مەملەكەت تاۋەلسىزدىگىنىڭ قۇرىلۋى مەن تۇراقتىلىعىنداعى پرەزيدەنت نۇرسۇلتان نازاربايەۆتىڭ جەتەكشى ءرولى تۋرالى، سونىمەن قاتار مەملەكەتتىڭ ەكونوميكالىق جانە ينۆەستيسيالىق الەۋەتى مەن نيدەرلاندپەن ىسكەرلىك ىنتىماقتاستىقتىڭ مۇمكىندىكتەرى تۋرالى مۋلتيمەديالىق پرەزەنتاسياسىن ۇسىندى.
قازاقستاندىق ديپلومات «قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋلار ەنگىزۋ تۋرالى» زاڭنىڭ قابىلدانۋى جالپى قازاقستان رەسپۋبليكاسىنىڭ ساياسي جۇيەسىن دەموكراتيالاندىرۋعا، پارلامەنت پەن ۇكىمەتتىڭ ءرولىن ساپالى ارتتىرۋعا، سونداي-اق حالىق الدىندا مەملەكەتتiك بيلiكتiڭ بارلىق تارماقتارىنىڭ جاۋاپكەرشىلىگىن ارتتىرۋعا باعىتتالعانىن جەتكىزىپ ءتۇسىندىردى. كونستيتۋسيالىق رەفورمانىڭ، قازاقستاننىڭ تۇراقتى دامۋى مەن دامىعان مەملەكەتتەردىڭ وتىزدىعىنا كىرۋىنە جۇمىلدىرىلعان بەس ينستيتۋسيونالدىق رەفورمالاردى جۇزەگە اسىرۋ بويىنشا «100 ناقتى قادام» ۇلت جوسپارى مانماتىنىندە اسا ماڭىزدى ماعىناعا يەلى ەكەندىگى اتاپ كورسەتىلدى.
سونىمەن بىرگە، «دوڭگەلەك ۇستەل» قاتىسۋشىلارى پرەزيدەنت ن. نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىن جۇزەگە اسىرۋ مانماتىنىندە ىسكەرلىك ىنتىماقتاستىقتىڭ مۇمكىندىكتەرى تۋرالى وي-پىكىرلەرىمەن ءبولىستى. شەتەلدىك ينۆەستورلار ءۇشىن قۇقىقتىق كەپىلدىكتەر، جەڭىلدىكتەر مەن پرەفەرەنسيالار جۇيەسىن قۇرۋ شەتەل كاپيتالىنىڭ قاتىسۋىمەن كاسىپورىنداردىڭ بەلسەندىلىگىن ىنتالاندىرۋ بويىنشا قازاقستان رەسپۋبليكاسى ۇكىمەتىنىڭ كۇش-جىگەرى مەن شارالارى اتاپ ءوتىلدى. تالقىلاۋ شەڭبەرىندە «KB Enterprises» گوللاندتىق-قازاقستاندىق بىرلەسكەن كاسىپورىن ديرەكتورى گەربەن پەك شەتەلدىك ينۆەستورلاردى تارتۋ مەن قولداۋ بويىنشا قازاقستاننىڭ ورتالىق جانە جەرگىلىكتى بيلىك ورگاندارىنىڭ بەلسەندى جۇمىسىن اتاپ، نيدەرلاندىق كومپانيانىڭ قازاقستانداعى قىزمەتىنىڭ تاجىريبەسى تۋرالى ايتتى.
«KB Enterprises» كومپانياسى استانا ماڭىنداعى قۋاتتىلىعى 100 مۆت كۇن ەلەكتر ستانسيالارىن سالۋ مەن پايدالانۋ بويىنشا ءىرى جوبانى جۇزەگە اسىرىپ جاتقانى اتاپ كورسەتىلدى. ءىس-شاراعا قاتىسقاندار «سۇراق-جاۋاپ» فورماتىندا مەملەكەت باسشىنىڭ بىتىمگەرشىلىك باستامالارىنا، سونداي-اق حالىقارالىق ديالوگ الاڭى رەتىندە استانانىڭ تابىستى رولىنە جوعارعى باعا بەرىپ، تاۋەلسىزدىك جىلدارىنداعى قازاقستاننىڭ جەتىستىكتەرىن تالقىلادى. بەس ينستيتۋسيونالدىق رەفورمالاردى جۇزەگە اسىرۋ، قازاقستاننىڭ ءححى عاسىرداعى ورنىقتى دامۋى ءۇشىن ساپالى جاڭا نەگىز قالىپتاستىراتىنى اتاپ كورسەتىلدى.
